ബിജു മേനോനും ജോജു ജോർജും പ്രധാന വേഷങ്ങളിൽ; ജീത്തു ജോസഫിന്റെ 'വലതുവശത്തെ കള്ളൻ'ന്റെ; പോസ്റ്റർ പുറത്ത്

കൊച്ചി: ജീത്തു ജോസഫ് ഒരുക്കുന്ന പുതിയ ചിത്രം 'വലതുവശത്തെ കള്ളൻ'ന്റെ പുതിയ പോസ്റ്റർ പുറത്ത്. മലയാള സിനിമയിലെ പ്രധാന നടന്മാരായ ബിജു മേനോനും ജോജു ജോർജുമാണ് ചിത്രത്തിൽ കേന്ദ്ര കഥാപാത്രങ്ങളെ അവതരിപ്പിക്കുന്നത്. സമൂഹത്തിലെ വ്യത്യസ്ത തലങ്ങളിൽ ജീവിക്കുന്ന രണ്ട് വ്യക്തികളുടെ ജീവിതത്തിൽ അരങ്ങേറുന്ന സംഘർഷങ്ങളെ ഇമോഷണൽ ഡ്രാമയുടെ പശ്ചാത്തലത്തിൽ, പൂർണ്ണമായും ത്രില്ലർ സ്വഭാവത്തോടെയാണ് ജീത്തു ജോസഫ് ഈ ചിത്രത്തിൽ അവതരിപ്പിക്കുന്നത്. വിവിധ ഭാവങ്ങളിലുള്ള ബിജു മേനോന്റെയും ജോജു ജോർജിന്റെയും ചിത്രങ്ങൾ ഉൾക്കൊള്ളുന്ന പോസ്റ്റർ ഇതിനോടകം സിനിമാ പ്രേമികൾക്കിടയിൽ വലിയ ശ്രദ്ധ നേടിക്കഴിഞ്ഞു.

ആഗസ്റ്റ് സിനിമയുടെ ബാനറിൽ ഷാജി നടേശനാണ് 'വലതുവശത്തെ കള്ളൻ' നിർമ്മിക്കുന്നത്. ബഡ് ടൈംസ്റ്റോറീസുമായി സഹകരിച്ചാണ് ഈ ചിത്രത്തിന്റെ നിർമ്മാണം. കെറ്റിനാ ജീത്തു, മിഥുൻ എബ്രഹാം എന്നിവർ എക്സിക്യൂട്ടീവ് പ്രൊഡ്യൂസർമാരാകുന്നു. സിനി ഹോളിക്സിന്റെ സാരഥികളായ ടോൺസൺ, സുനിൽ രാമാടി, പ്രശാന്ത് നായർ എന്നിവർ സഹനിർമ്മാതാക്കളാണ്.

ബിജു മേനോനും ജോജു ജോർജിനും പുറമെ ലെന, നിരഞ്ജന അനൂപ്, ഇർഷാദ്, ഷാജു ശ്രീധർ, സംവിധായകൻ ശ്യാമപ്രസാദ്, മനോജ് കെ.യു., ലിയോണാ ലിഷോയ് തുടങ്ങിയ വലിയൊരു താരനിരയും ചിത്രത്തിൽ അണിനിരക്കുന്നു. ഡിനു തോമസ് ഈലാനാണ് 'വലതുവശത്തെ കള്ളൻ' എന്ന ചിത്രത്തിന്റെ തിരക്കഥ രചിച്ചിരിക്കുന്നത്. മുൻപ് 'കൂദാശ' എന്ന ചിത്രം തിരക്കഥയെഴുതി സംവിധാനം ചെയ്ത പരിചയം ഡിനു തോമസ് ഈലാനുണ്ട്.

സംഗീതം വിഷ്‍ണു ശ്യാം, ഛായാഗ്രഹണം സതീഷ് കുറുപ്പ്, എഡിറ്റിംഗ് വിനായക്, കലാസംവിധാനം പ്രശാന്ത് മാധവ്, മേക്കപ്പ് ജയൻ പൂങ്കുളം, കോസ്റ്റ്യൂം ഡിസൈൻ ലിൻഡ ജീത്തു, സ്റ്റിൽസ് സബിത്ത് എന്നിങ്ങനെയാണ് മറ്റ് പ്രധാന അണിയറ പ്രവർത്തകർ. അറഫാസ് അയൂബ് ചീഫ് അസ്സോസ്സിയേറ്റ് ഡയറക്ടറായും, ഫഹദ് (അപ്പു), അനിൽ ജി നമ്പ്യാർ എന്നിവർ പ്രൊഡക്ഷൻ എക്സിക്യൂട്ടീവ്‌സ് ആയും പ്രവർത്തിക്കുന്നു. ഷബീർ മലവെട്ടത്ത് പ്രൊഡക്ഷൻ കൺട്രോളറും, വാഴൂർ ജോസ്, ആതിര ദിൽജിത്ത് എന്നിവർ ചിത്രത്തിന്റെ പി.ആർ.ഒ. മാരും ആണ്.