തിരുവനന്തപുരം: സംസ്ഥാന സർക്കാരിനെതിരായ പ്രതിഷേധം ശക്തമാക്കുന്നതിന്റെ ഭാഗമായി ഈ മാസം 21-ന് സൂചനാ പണിമുടക്ക് പ്രഖ്യാപിച്ച് വിവിധ ചലച്ചിത്ര സംഘടനകൾ. അമ്മ, പ്രൊഡ്യൂസേഴ്സ് അസോസിയേഷൻ, ഫിലിം ചേംബർ എന്നീ സംഘടനകൾ സംയുക്തമായി നടത്തുന്ന ഈ സമരത്തിലൂടെ ഷൂട്ടിംഗുകൾ പൂർണ്ണമായും നിർത്തിവെക്കുകയും തിയേറ്ററുകൾ അടച്ചിടുകയും ചെയ്യും. ഇത് ചലച്ചിത്ര മേഖലയെ പൂർണ്ണമായും സ്തംഭിപ്പിക്കും.

ജിഎസ്ടി (ചരക്ക് സേവന നികുതി) നിലവിൽ വന്നതിനുശേഷവും തുടരുന്ന തദ്ദേശ നികുതി ഒഴിവാക്കണമെന്നതാണ് സംഘടനകളുടെ പ്രധാന ആവശ്യം. നിലവിലെ സാഹചര്യത്തിൽ, ജിഎസ്ടിക്ക് പുറമെ തദ്ദേശ നികുതിയും ഈടാക്കുന്നത് ഫലത്തിൽ ഇരട്ട നികുതിക്ക് തുല്യമാണെന്നും ഇത് ചലച്ചിത്ര വ്യവസായത്തിന് വലിയ സാമ്പത്തിക ഭാരമുണ്ടാക്കുന്നുവെന്നും സംഘടനകൾ ചൂണ്ടിക്കാട്ടുന്നു.

ഈ വിഷയങ്ങളിൽ സർക്കാർ ചർച്ചയ്ക്ക് തയ്യാറാകുന്നില്ലെന്നും, അടുത്തിടെ സംഘടിപ്പിച്ച സിനിമാ കോൺക്ലേവ് വെറും കണ്ണിൽ പൊടിയിടാൻ മാത്രമായിരുന്നു എന്നും സംഘടനകൾ വിമർശിച്ചു. ജനുവരി 21-ലെ സൂചനാ പണിമുടക്കിനുശേഷവും സർക്കാർ അനുകൂല നിലപാട് സ്വീകരിക്കുകയോ ചർച്ചയ്ക്ക് തയ്യാറാകുകയോ ചെയ്തില്ലെങ്കിൽ തുടർസമര പരിപാടികളുമായി മുന്നോട്ട് പോകാനാണ് തീരുമാനം.

സംസ്ഥാന സർക്കാർപണിമുടക്ക്അമ്മപ്രൊഡ്യൂസേഴ്സ് അസോസിയേഷൻഫിലിം ചേംബർ

സ്വന്തം ലേഖകൻ