തമിഴര്ക്ക് അഭിമാനിക്കാന് വകയുള്ള പടമാണ് 'പരാശക്തി'; പക്ഷെ നിങ്ങൾ കാണിക്കുന്നത് എന്താണ്..; ഇത് ആർക്കും നല്ലതല്ല; വിജയ് ആരാധകര്ക്കെതിരെ തുറന്നടിച്ച് ക്രിയേറ്റീവ് ഡയറക്ടര്
ശിവകാര്ത്തികേയൻ നായകനായ തമിഴ് ചിത്രം 'പരാശക്തി'ക്ക് നേരെ വിജയ് ആരാധകരുടെ ഭാഗത്തുനിന്ന് കടുത്ത സൈബര് ആക്രമണം നടക്കുന്നതായി ചിത്രത്തിന്റെ ക്രിയേറ്റീവ് ഡയറക്ടറും നടനുമായ ദേവ് രാംനാഥ് ആരോപിച്ചു. സമൂഹമാധ്യമമായ എക്സിലൂടെയാണ് അദ്ദേഹം ഈ വിഷയത്തിൽ പ്രതികരണം രേഖപ്പെടുത്തിയത്. ഇതൊരു സാധാരണ മത്സരമല്ലെന്നും സിനിമയെത്തന്നെ തകർക്കാനുള്ള ബോധപൂർവമായ ശ്രമമാണെന്നും ദേവ് രാംനാഥ് ചൂണ്ടിക്കാട്ടി.
"നിങ്ങളുടെ ചിത്രത്തിനൊപ്പമാണ് റിലീസ് ചെയ്യുന്നത് എന്നത് ഞങ്ങളുടെ ചിത്രത്തെ തകർക്കാനുള്ള ലൈസൻസ് നിങ്ങൾക്ക് നൽകുന്നില്ല. ഞങ്ങളാണ് ആദ്യം റിലീസ് തീയതി പ്രഖ്യാപിച്ചത്. എന്നിട്ടും നിങ്ങളുടെ ചിത്രത്തെ തടയാൻ ഞങ്ങൾ ശ്രമിച്ചില്ലല്ലോ," ദേവ് രാംനാഥ് ചോദ്യമുയർത്തി. റിലീസിന് മുൻപ് 'പരാശക്തി'ക്ക് നേരിടേണ്ടിവന്ന പ്രതിബന്ധങ്ങളെക്കുറിച്ചും അദ്ദേഹം വിശദീകരിച്ചു. ചെന്നൈയിലും മുംബൈയിലുമായി സെൻസർ ബോർഡ് (CBFC) ഓഫീസുകളിൽ ദിവസവും കയറി ഇറങ്ങേണ്ടിവന്നു. റിലീസിന് വെറും 18 മണിക്കൂർ മാത്രമാണ് അനുമതിക്കായി ലഭിച്ചത്.
വിജയ് ആരാധകരിൽ ചിലർ സിനിമക്കെതിരെ നടത്തുന്ന ദുഷ്പ്രചാരണങ്ങളെ ദേവ് രാംനാഥ് എടുത്തുപറഞ്ഞു. വ്യാജവും പ്രതികൂലവുമായ അവലോകനങ്ങൾ പ്രചരിപ്പിക്കുക, പഴയ വീഡിയോകൾ ദുരുപയോഗം ചെയ്ത് ജനങ്ങളെ സ്വാധീനിക്കാൻ ശ്രമിക്കുക, തിയറ്ററുകളിൽ രാഷ്ട്രീയ മുദ്രാവാക്യങ്ങൾ ഉയർത്തുക, ബുക്ക് മൈ ഷോ പോലുള്ള പ്ലാറ്റ്ഫോമുകളിലെ റേറ്റിംഗുകൾ കൃത്രിമം കാട്ടി സ്വാധീനിക്കാൻ ശ്രമിക്കുക തുടങ്ങിയവയാണ് നടക്കുന്നത്. "ഇതൊരു മത്സരമല്ല. കഴിഞ്ഞ വർഷം മറ്റൊരു വലിയ ചിത്രത്തോടും നിങ്ങൾ ഇതുതന്നെയാണ് ചെയ്തത്. ഒരു ചലച്ചിത്ര പ്രേമി എന്ന നിലയിൽ പറയാം, ഇത് ആർക്കും നല്ലതല്ല," അദ്ദേഹം കൂട്ടിച്ചേർത്തു.
നമ്മൾ തമിഴർക്ക് അഭിമാനിക്കാൻ വകയുള്ള ഒരു വിദ്യാർത്ഥി പ്രക്ഷോഭത്തെക്കുറിച്ചാണ് 'പരാശക്തി' എന്നും, ആ വിദ്യാർത്ഥികൾ ചെയ്തതുപോലെ ഇതിനെതിരെ തങ്ങളും പോരാടുമെന്നും ദേവ് രാംനാഥ് പ്രഖ്യാപിച്ചു.
കഴിഞ്ഞ ശനിയാഴ്ച തിയറ്ററുകളിൽ എത്തിയ 'പരാശക്തി'ക്ക് ബോക്സ് ഓഫീസിൽ സമ്മിശ്ര പ്രതികരണമാണ് ലഭിച്ചത്. ഇന്ത്യയിൽ നിന്ന് ആദ്യ ദിനം 12.5 കോടി രൂപയും രണ്ടാം ദിനം 10.1 കോടി രൂപയും (നെറ്റ് കളക്ഷൻ) നേടിയ ചിത്രം മൂന്നാം ദിനമായ തിങ്കളാഴ്ച 3 കോടി രൂപ മാത്രമാണ് നേടിയത്. ഇത് വരുമാനത്തിൽ കാര്യമായ ഇടിവ് രേഖപ്പെടുത്തുന്നു. അതേസമയം, ഈ ആരോപണങ്ങൾക്കിടയിലും ആഗോള ബോക്സ് ഓഫീസിൽ നിന്ന് ചിത്രം 50 കോടി രൂപ പിന്നിട്ടതായി നിർമ്മാതാക്കൾ അറിയിച്ചിരുന്നു. തമിഴ് സിനിമാ മേഖലയിലെ ആരാധക സംഘടനകൾ തമ്മിലുള്ള മത്സരങ്ങളുടെയും വെല്ലുവിളികളുടെയും തീവ്രത എടുത്തു കാണിക്കുന്നതാണ് ദേവ് രാംനാഥിന്റെ ഈ ആരോപണങ്ങൾ.
