അവളുടെ കണ്ണുകൾക്ക് പറയാനുള്ളത് ഒരുപാട് കഥകൾ; ഒന്ന് വിടരും മുമ്പ് കൊഴിഞ്ഞുപോയ കുഞ്ഞ് മകൾ!! വെള്ളിനക്ഷത്രത്തിലെ ആ കുസൃതിക്കാരി ഇന്നും ഓർമകളിൽ; ഹൃദ്യമായ കുറിപ്പുമായി വിനയൻ
'വെള്ളിനക്ഷത്രം' എന്ന ചിത്രത്തിലൂടെ മലയാളി മനസ്സുകളിൽ ഇടം നേടിയ ബാലതാരം തരുണി സച്ച്ദേവിനെ അനുസ്മരിച്ച് സംവിധായകൻ വിനയൻ. 2012-ൽ നേപ്പാളിലുണ്ടായ വിമാന അപകടത്തിൽ 12-ആം വയസ്സിൽ അമ്മയോടൊപ്പം മരണപ്പെട്ട തരുണിയുടെ ഓർമ്മകളും പഴയകാല ചിത്രവും അദ്ദേഹം ഫേസ്ബുക്കിൽ പങ്കുവെച്ചു. ആരെയും അതിശയിപ്പിക്കുന്ന അഭിനയ ചാരുതയുള്ള 'അത്ഭുത ബാലിക' എന്നാണ് വിനയൻ തരുണിയെ വിശേഷിപ്പിച്ചത്.
നാലു വയസ്സുള്ളപ്പോഴാണ് തരുണി തന്റെ 'വെള്ളിനക്ഷത്രം' എന്ന സിനിമയിൽ അഭിനയിച്ചതെന്ന് വിനയൻ ഫേസ്ബുക്കിൽ കുറിച്ചു. അതേ വർഷം തന്നെ സത്യം എന്ന ചിത്രത്തിലും തരുണി അഭിനയിച്ചിരുന്നു. ഈ രണ്ടു സിനിമകളിലും പൃഥ്വിരാജായിരുന്നു നായകൻ. "ആരെയും അതിശയിപ്പിക്കുന്ന അഭിനയ ചാരുതയുള്ള ആ അത്ഭുത ബാലിക 12 വയസുള്ളപ്പോൾ 2012 ൽ നേപ്പാളിൽ വച്ചുണ്ടായ ഹെലിക്കോപ്ടർ അപകടത്തിൽ അമ്മ ഗീതയോടൊപ്പം മരണപ്പെട്ടു," വിനയൻ ഓർമ്മപ്പെടുത്തി.
ദേശീയ തലത്തിൽ ശ്രദ്ധ നേടിയ ബാലതാരമാണ് തരുണി സച്ച്ദേവ്. കരിഷ്മ കപൂറിനൊപ്പം അഭിനയിച്ച രസ്നയുടെ പരസ്യം തരുണിയെ ദേശീയ ശ്രദ്ധയിലേക്ക് കൊണ്ടുവന്നു. അമിതാഭ് ബച്ചൻ പ്രധാന വേഷത്തിലെത്തിയ 'പാ' എന്ന ചിത്രത്തിൽ അദ്ദേഹത്തിന്റെ സുഹൃത്തായും തരുണി തിളങ്ങി.
സിനിമാ ലോകത്തെ നടുക്കിയ ദുരന്തം നടന്നത് 2012 മെയ് 14-നായിരുന്നു. നേപ്പാളിലെ പൊഖാറയിൽ നിന്നും ഒരു വിനോദസഞ്ചാര കേന്ദ്രത്തിലേക്ക് വിമാനത്തിൽ യാത്ര ചെയ്യവേ, തന്റെ പതിനാലാം ജന്മദിനം ആഘോഷിക്കാനിരിക്കെയായിരുന്നു തരുണിയുടെയും അമ്മ ഗീതയുടെയും അന്ത്യം. വിമാനം തകർന്നുണ്ടായ അപകടത്തിൽ ഏകദേശം ഇരുപതോളം പേർക്കാണ് ജീവൻ നഷ്ടമായത്. 2014-ൽ പുറത്തിറങ്ങിയ തമിഴ് ചിത്രം 'വെട്രി സെൽവൻ' ആണ് തരുണിയുടെ അവസാന സിനിമ. ഈ ചിത്രത്തിന്റെ ഷൂട്ടിംഗ് പൂർത്തിയാക്കിയെങ്കിലും സിനിമ റിലീസ് ചെയ്യുന്നതിന് മുൻപ് തന്നെ വിധി തരുണിയെ തട്ടിയെടുത്തു.
