ഇത് എന്നെ ഉദ്ദേശിച്ചാണ്..എനിക്കിട്ട് മനഃപൂർവം പണി തന്നതാണ്..!!; വർഷങ്ങൾക്കിപ്പുറം കോടതിയിൽ ഒരാളുടെ റീഎൻട്രി; പോര് മുറുക്കി ആര്യന്‍ ഖാന്റെ പുത്തൻ വെബ് സീരിസിനെതിരെ സമീര്‍ വാംഖഡെ രംഗത്ത്; 2 കോടി നഷ്ടപരിഹാരം വേണമെന്നും ആവശ്യം; ഷാരൂഖ് കുടുംബത്തെ ആ മുൻ ഉദ്യോഗസ്ഥൻ വിടാതെ വേട്ടയാടുന്നതെന്തിന്?
മുംബൈ: ബോളിവുഡ് താരം ഷാരൂഖ് ഖാന്റെ മകൻ ആര്യൻ ഖാൻ സംവിധാനം ചെയ്ത 'ദ ബാഡ്‌സ് ഓഫ് ബോളിവുഡ്' എന്ന വെബ് സീരിസിനെതിരെ നാർക്കോട്ടിക്സ് കൺട്രോൾ ബ്യൂറോയുടെ (എൻസിബി) മുൻ മുംബൈ സോണൽ ഡയറക്ടർ സമീർ വാംഖഡെ കോടതിയെ സമീപിച്ചു. തന്റെ പ്രതിച്ഛായ തകർക്കാനും ദുരുദ്ദേശ്യപരമായി അപകീർത്തിപ്പെടുത്താനും ലക്ഷ്യമിട്ടുള്ള തെറ്റായ വിവരങ്ങൾ സീരീസിൽ ഉൾക്കൊള്ളുന്നുവെന്ന് ആരോപിച്ചാണ് ഐആർഎസ് ഉദ്യോഗസ്ഥനായ വാംഖഡെ 2 കോടി രൂപ നഷ്ടപരിഹാരം ആവശ്യപ്പെട്ട് മാനനഷ്ടക്കേസ് ഫയൽ ചെയ്തിരിക്കുന്നത്.
ഷാരൂഖ് ഖാനും ഗൗരി ഖാനും ചേർന്ന് ഉടമസ്ഥതയിലുള്ള റെഡ് ചില്ലീസ് എന്റർടെയ്ൻമെന്റ് പ്രൈവറ്റ് ലിമിറ്റഡ്, ആഗോള സ്ട്രീമിംഗ് പ്ലാറ്റ്‌ഫോമായ നെറ്റ്ഫ്ലിക്സ് എന്നിവർക്കെതിരെയാണ് കേസ് നൽകിയിട്ടുള്ളത്. ലഹരിവിരുദ്ധ ഏജൻസികളെയും ഉദ്യോഗസ്ഥരെയും തെറ്റായ രീതിയിൽ ചിത്രീകരിക്കുന്നതിലൂടെ തന്റെ ഔദ്യോഗിക ജീവിതത്തിലൂടെ നേടിയെടുത്ത സത്‌പേരിന് കോട്ടം വരുത്തുന്നതായാണ് മുൻ എൻസിബി ഉദ്യോഗസ്ഥന്റെ പ്രധാന ആരോപണം.
2021 ഒക്ടോബറിൽ ക്രൂയിസ് കപ്പലിൽ നടത്തിയ റെയ്ഡിനിടെ ആര്യൻ ഖാനെ അറസ്റ്റ് ചെയ്ത സംഭവവുമായി ബന്ധപ്പെട്ട കേസ് ബോംബെ ഹൈക്കോടതിയിലും മുംബൈയിലെ എൻഡിപിഎസ് പ്രത്യേക കോടതിയിലും നിലനിൽക്കുന്ന സാഹചര്യത്തിൽ, ഈ വെബ് സീരീസ് ബോധപൂർവം തന്നെ ലക്ഷ്യമിട്ട് ആസൂത്രണം ചെയ്ത് നിർമ്മിച്ചതാണെന്നും അദ്ദേഹം കൂട്ടിച്ചേർത്തു. കോടതികളുടെ പരിഗണനയിലുള്ള സമയത്ത് വ്യക്തിപരമായ വിദ്വേഷത്തോടെയാണ് ഈ നീക്കം നടന്നിരിക്കുന്നതെന്നും അദ്ദേഹം ഹർജിയിൽ ചൂണ്ടിക്കാണിക്കുന്നു.
വെബ് സീരീസിലെ ഒരു പ്രത്യേക രംഗം 1971-ലെ ദേശീയ ചിഹ്നങ്ങളെ അപമാനിക്കുന്നത് തടയുന്നതിനുള്ള നിയമത്തിലെ വ്യവസ്ഥകളുടെ ഗുരുതരമായ ലംഘനമാണെന്നും ഇത് നിയമപ്രകാരം ശിക്ഷാർഹമാണെന്നും ഹർജിയിൽ പറയുന്നു. കൂടാതെ, അശ്ലീലവും നിന്ദ്യവുമായ ഉള്ളടക്കം ഉപയോഗിച്ച് ദേശീയ വികാരത്തെ വ്രണപ്പെടുത്താൻ ശ്രമിക്കുന്നതിലൂടെ, സീരീസിലെ ഉള്ളടക്കം ഇൻഫർമേഷൻ ടെക്നോളജി നിയമത്തിലെയും ഭാരതീയ ന്യായ സംഹിതയിലെയും (ബിഎൻഎസ്) വിവിധ വ്യവസ്ഥകൾക്ക് വിരുദ്ധമാണെന്നും വാംഖഡെ ആരോപിക്കുന്നു.
തനിക്ക് ലഭിക്കുന്ന 2 കോടി രൂപ നഷ്ടപരിഹാരം കാൻസർ രോഗികളുടെ ചികിത്സയ്ക്കായി വിനിയോഗിക്കാൻ ഉദ്ദേശിക്കുന്നതായും അദ്ദേഹം അറിയിച്ചിട്ടുണ്ട്. ഈ കേസ്, അടുത്തിടെ പുരോഗതി പ്രാപിച്ച ലഹരി മരുന്നുമായി ബന്ധപ്പെട്ട നിയമ നടപടികൾക്കിടയിൽ പുതിയ ചർച്ചകൾക്ക് വഴി തുറന്നിരിക്കുകയാണ്.
