തലമുടി പോയി; വര്‍ക്കൗട്ട് ചെയ്താല്‍ ഉടന്‍ ആര്‍ത്തവം എത്തും; സ്റ്റിറോയിഡ് കുത്തിവയ്പ്പുകള്‍ തുടരുന്നു: 2024ല്‍ നേരിട്ട പ്രതിസന്ധികള്‍ പങ്കുവെച്ച് ഷോണ്‍ റോമി
തലമുടി പോയി; സ്റ്റിറോയിഡ് കുത്തിവയ്പ്പുകള്‍ തുടരുന്നു: 2024ല്‍ നേരിട്ട പ്രതിസന്ധികള്‍ പങ്കുവെച്ച് ഷോണ്‍ റോമി
കൊച്ചി: മെലിഞ്ഞ് കൊലുന്നനേയുള്ള മുടിയുമായി അതിസുന്ദരിയായിരുന്നു നടിയും മോഡലുമായ ഷോണ്‍ റോമി. ഷോണിന്റെ സുന്ദരമായ മുഖം തന്നെയാണ് കമ്മട്ടിപ്പാടം എന്ന ചിത്രത്തിലൂടെ മലയാള സിനിമയിലേക്കും താരത്തിന് അവസരം ഒരുക്കിയത്. ഇപ്പോഴിതാ കഴിഞ്ഞ വര്‍ഷം താന്‍ നേരിട്ട പ്രതിസന്ധികള്‍ തുറന്നു പറഞ്ഞ് തന്റെ ചിത്രം പങ്കുവെച്ച് രംഗത്തെത്തിയിരിക്കുകയാണ് ഷോണ്‍.
ചര്‍മ്മത്തെ ബാധിച്ച ഓട്ടോ ഇമ്യൂണ്‍ അവസ്ഥ തന്നെ വലച്ചുവെന്നാണ് പുതുവര്‍ഷത്തില്‍ ഇട്ട ഇന്‍സ്റ്റപോസ്റ്റില്‍ ഷോണ്‍ റോമി പറയുന്നത്. മുടിയെല്ലാം പോയി പഴയ ഷോണിന്റെ നിഴല്‍ മാത്രമാണ് ഫോട്ടോയിലുള്ളത്. ഭ്രാന്താമായിരുന്നു 2024, എന്റെ ഓട്ടോ ഇമ്മ്യൂണ്‍ അവസ്ഥ എല്ലാ പിടിയും വിട്ടു. ചിലത് കൈവിടേണ്ടിവന്നു, ചിലത് ദൈവത്തില്‍ ഏല്‍പ്പിക്കേണ്ടിവന്നു. ഞാന്‍ എന്റെ ബെസ്റ്റിയെ ബന്ധപ്പെട്ടു, അവളെ സ്വര്‍ഗ്ഗത്തില്‍ നിന്നും അയച്ചതാണെന്ന് കരുതുന്നു. അവളുടെ വാക്കുകള്‍ വിശ്വസിച്ചത് ഞാന്‍ ഓര്‍ക്കുന്നു. ഇത് ഒരു ഘട്ടം മാത്രമാണെന്ന് അവള്‍ പറഞ്ഞു. ഒരു മാസത്തിനുള്ളില്‍ നിന്റെ മുടിയെല്ലാം തിരികെ വരും എന്ന് അവള്‍ പറഞ്ഞു. അങ്ങനെ സംഭവിച്ചു.
ആദ്യ രണ്ടാഴ്ച കൂടുമ്പോഴും ആഗസ്ത് മുതല്‍ ഇപ്പോള്‍ വരെ എല്ലാ മാസവും സ്റ്റിറോയിഡ് കുത്തിവയ്പ്പുകള്‍ എടുക്കുന്നു. വര്‍ക്ക് ഔട്ട് ചെയ്യാന്‍ എനിക്ക് ഭയമായിരുന്നു, കാരണം ചെയ്താല്‍ എനിക്ക് ഉടന്‍ തന്നെ ആര്‍ത്തവം ആരംഭിക്കും. എനിക്ക് ശരിക്കും ജീവിതത്തിന്റെ വേഗത കുറയ്‌ക്കേണ്ടി വന്നു. ഗോവയിലേക്ക് മാറിയത് ഏറെ സഹായിച്ചു. 2024 കഠിനവും എന്നാല്‍ ശക്തിയും പരിവര്‍ത്തനവും നല്‍കി. അറിയാതെയും നിയന്ത്രണത്തിലാകാതെയും സുഖമായിരിക്കാന്‍ ഞാന്‍ പഠിച്ചു - ഷോണ്‍ റോമി റീലിന്റെ കൂടെ എഴുതി.
കമ്മട്ടിപ്പാടം എന്ന ചിത്രത്തിലെ റോളിലൂടെ ശ്രദ്ധിക്കപ്പെട്ട ഷോണ്‍, നീലാകാശം പച്ചക്കല്‍ ചുവന്ന ഭൂമി, ലൂസിഫര്‍ എന്നീ ചിത്രങ്ങളിലും ശ്രദ്ധേയമായ വേഷങ്ങള്‍ ചെയ്തിട്ടുണ്ട്. ഷോണിന്റെ ഇന്‍സ്റ്റയിലെ ചിത്രങ്ങളും മറ്റും വൈറലാകാറുണ്ട്.
