പ്രശാന്ത് വര്‍മ്മയുടെ ജയ് ഹനുമാന്; നായകനായി റിഷഭ് ഷെട്ടി; ഫസ്റ്റ് ലുക്ക് പുറത്ത്
പാന്‍-ഇന്ത്യന്‍ ബ്ലോക്ക്ബസ്റ്റര്‍ ഹിറ്റായ ഹനുമാന് ശേഷം പ്രശാന്ത് വര്‍മ്മ ഒരുക്കുന്ന ജയ് ഹനുമാനില്‍ നായകനായി ദേശീയ അവാര്‍ഡ് ജേതാവായ കന്നഡ സൂപ്പര്‍താരം റിഷഭ് ഷെട്ടി. ചിത്രത്തിന്റെ ഫസ്റ്റ് ലുക്ക് പുറത്ത്. 'ഹനുമാന്' എന്ന ചിത്രത്തിന്റെ രണ്ടാം ഭാഗമായ 'ജയ് ഹനുമാന്' നിര്‍മ്മിക്കുന്നത് തെലുങ്കിലെ വമ്പന്‍ നിര്‍മാണ കമ്പനിയായ മൈത്രി മൂവി മേക്കേഴ്സ് ആണ്. പ്രശാന്ത് വര്‍മ്മ- റിഷഭ് ഷെട്ടി- മൈത്രി മൂവി മേക്കേഴ്സ് കൂട്ടുകെട്ട്, പ്രേക്ഷകര്‍ ഏറ്റവുമധികം കാത്തിരിക്കുന്ന ഇന്ത്യന്‍ ചിത്രങ്ങളിലൊന്നായി ജയ് ഹനുമാനെ മാറ്റുന്നു.
കാന്താരയിലൂടെ വലിയ ജനശ്രദ്ധ നേടിയ റിഷഭ് ഷെട്ടി, സമകാലിക കഥകളെ പുരാണങ്ങളുമായി സംയോജിപ്പിക്കുന്നതില്‍ വൈഭവമുള്ള പ്രശാന്ത് വര്‍മ്മക്കും, ബ്ലോക്ക്ബസ്റ്റര്‍ ചിത്രങ്ങള്‍ സമ്മാനിക്കുന്ന മൈത്രി മൂവി മേക്കേഴ്സിനുമൊപ്പം ഒന്നിക്കുമ്പോള്‍ ഇന്ത്യന്‍ സിനിമാ പ്രേമികള്‍ ഏറെ ആകാംക്ഷയോടെയാണ് ഈ ചിത്രത്തെ കാത്തിരിക്കുന്നത്. ഹനുമാന് എന്ന കഥാപാത്രത്തെ അവതരിപ്പിക്കുന്ന നടന്‍ ആരാണെന്ന് വെളിപ്പെടുത്തിയതിനൊപ്പം ആ കഥാപാത്രത്തിന്റെ ആത്മാവിനെ യഥാര്‍ത്ഥത്തില്‍ ആവാഹിക്കുന്ന അതിശയകരമായ ഫസ്റ്റ് ലുക്ക് പോസ്റ്ററും ചിത്രത്തിന്റെ നിര്‍മ്മാതാക്കള്‍ പുറത്ത് വിട്ടിട്ടുണ്ട്. കൈയ്യില്‍ ശ്രീരാമ ഭഗവാന്റെ വിഗ്രഹം ആദരവോടെ പിടിച്ച്, കാലില്‍ ഇരിക്കുന്ന ഹനുമാന് എന്ന കഥാപാത്രമായി റിഷഭ് ഷെട്ടിയെ പോസ്റ്ററില്‍ ചിത്രീകരിച്ചിരിക്കുന്നു.
ഈ ആകര്‍ഷകമായ പോസ്റ്റര്‍ റിഷഭിന്റെ ബലിഷ്ഠമായ ശരീരത്തോടൊപ്പം ഹനുമാന്റെ അഗാധമായ ഭക്തിയും ശക്തിയും പ്രതിഫലിപ്പിക്കുകയും ചെയ്യുന്നു. ഈ ഐതിഹാസിക വ്യക്തിത്വത്തെ അദ്ദേഹം എങ്ങനെ സ്‌ക്രീനില്‍ ജീവസുറ്റതാക്കുന്നു എന്നറിയാന്‍ ആരാധകര്‍ ആകാംക്ഷയോടെ കാത്തിരിക്കുകയാണ്. തകര്‍ക്കാനാവാത്ത ശക്തിയുടെയും വിശ്വസ്തതയുടെയും പ്രതീകമായ ഹനുമാന്റെ കഥ പറയുന്ന ചിത്രം വമ്പന്‍ ആക്ഷന്‍ ചിത്രമായാണ് പ്രശാന്ത് വര്‍മ്മ ഒരുക്കാന്‍ പോകുന്നത്. പ്രശാന്ത് വര്‍മ്മ സിനിമാറ്റിക് യൂണിവേഴ്‌സിന്റെ ഭാഗമാണ് ജയ് ഹനുമാന്. നവീന്‍ യെര്‍നേനിയും വൈ രവിശങ്കറും ചേര്‍ന്ന് നിര്‍മ്മിക്കുന്ന ചിത്രം ഉയര്‍ന്ന ബജറ്റിലും മികച്ച സാങ്കേതിക നിലവാരത്തിലുമായിരിക്കും ഒരുക്കുന്നത്. പിആര്‍ഒ- ശബരി.
