ആ സമയത്ത് എന്റെ ശരീരത്തിന്റെ അവസ്ഥ വളരെ മോശമായി; എന്നിട്ടും ഞാൻ പിടിച്ചു നിന്നു; ഒരു പോയന്റ് കഴിഞ്ഞപ്പോൾ ഓരോരുത്തർ ചോദിച്ചു തുടങ്ങി; തുറന്നുപറഞ്ഞ് നടി മംമ്ത

ഒന്നിലധികം തവണ കാൻസറിനെയും പിന്നീട് ഓട്ടോ ഇമ്മ്യൂൺ അവസ്ഥയെയും അതിജീവിച്ച നടി മംമ്ത മോഹൻദാസ്, തൻ്റെ രോഗകാലത്തെക്കുറിച്ചുള്ള വാക്കുകൾ വീണ്ടും ശ്രദ്ധ നേടുന്നു. കരിയറിൽ തിരക്കേറിയ 2009-ലാണ് തനിക്ക് രോഗം സ്ഥിരീകരിച്ചതെന്ന് മംമ്ത പറഞ്ഞു.

"എന്റെ ജീവിതം തന്നെ സിനിമയാണെന്ന് തോന്നി. അന്ന് അച്ഛൻ എല്ലാവരെയും വിളിച്ച് എനിക്ക് വർക്ക് ചെയ്യാൻ കഴിയില്ലെന്ന് പറഞ്ഞു." എന്നാൽ ആ സമയത്തും ജോലി ചെയ്യാനുള്ള തന്റെ തീരുമാനം മികച്ചതായിരുന്നു എന്ന് മംമ്ത പറയുന്നു.

"ഓരോ മാസം കഴിയുന്തോറും ആരോഗ്യനില മോശമാകും. ഫിസിക്കലി കാണാൻ മോശമാകും. എങ്കിലും നാഗാർജുനയ്ക്കൊപ്പമുള്ള 'കെഡി' എന്ന തെലുങ്ക് സിനിമയിലെ കഥാപാത്രത്തിനുവേണ്ടി ഞാൻ പിടിച്ചുനിന്നു." ആ സിനിമ പൂർത്തിയാക്കിയ ശേഷം ചികിത്സ പൂർത്തിയാക്കി താൻ തിരിച്ചെത്തി.

കീമോതെറാപ്പി കഴിഞ്ഞ ഉടനെ സത്യൻ അന്തിക്കാടിന്റെ 'കഥ തുടരുന്നു', പിന്നീട് 'അൻവർ' എന്നീ സിനിമകൾ ലഭിച്ചു. മുടി കൊഴിച്ചിലിനെക്കുറിച്ച് ആളുകൾ ചോദിച്ചുതുടങ്ങിയപ്പോൾ, ഒളിച്ചുവെക്കേണ്ടെന്ന് അമ്മ പറഞ്ഞതനുസരിച്ച് താൻ തന്നെ മാധ്യമങ്ങളോട് രോഗവിവരം തുറന്നുപറഞ്ഞെന്നും മംമ്ത വെളിപ്പെടുത്തി.