ലൊക്കേഷനിൽ വച്ച് ഷർട്ടിന്റെ കോളറിൽ പിടിച്ചു വലിച്ചു; ഒരുതരം ഭ്രാന്ത് പോലെ; ആണുങ്ങൾക്ക് നേരെയും 'സെക്ഷ്വൽ ഹരാസ്മെന്റ്' ഉണ്ടാകുന്നുണ്ട്; ആ സംഭവത്തെ കുറിച്ച് നടി മൃദുല

സീരിയൽ നടൻ റെയ്‌ജൻ രാജൻ ഒരു വനിതാ ജൂനിയർ ആർട്ടിസ്റ്റിൽ നിന്ന് ആറ് വർഷമായി നേരിട്ട ലൈംഗികാതിക്രമത്തെക്കുറിച്ച് പരസ്യമായി വെളിപ്പെടുത്തിയതിന് പിന്നാലെ, സഹനടി മൃദുല വിജയ് താൻ റെയ്‌ജന് പിന്തുണ നൽകിയതിൻ്റെ കാരണം വ്യക്തമാക്കി.

തൻ്റെ സഹപ്രവർത്തകൻ ലൊക്കേഷനിൽ വെച്ച് ഷർട്ടിൻ്റെ കോളറിൽ പിടിച്ചു വലിക്കുന്നതടക്കമുള്ള കടുത്ത ദുരനുഭവങ്ങൾ നേരിടുന്നത് താൻ നേരിൽ കണ്ടിട്ടുണ്ട്. ഒരു പുരുഷൻ ഇത്തരത്തിൽ പീഡനം നേരിട്ടപ്പോൾ ആരും പിന്തുണയ്ക്കാൻ തയ്യാറായില്ല. എന്നാൽ ഒരു സ്ത്രീ വ്യാജ ആരോപണം ഉന്നയിച്ചാൽ പോലും പിന്തുണയ്ക്കാൻ നിരവധി പേർ ഉണ്ടാകും. തുല്യതയുണ്ടെന്ന് പറയുമ്പോഴും പുരുഷന്മാർ പല കാര്യങ്ങളിലും താഴെയാണ്.

"കൂടെ നിൽക്കുന്നവരെ പിന്തുണയ്ക്കാൻ നമുക്ക് മാത്രമല്ലേ പറ്റൂ" എന്ന് മൃദുല ചോദിച്ചു. ലൈവായി സംഭവങ്ങൾ കണ്ട വ്യക്തി എന്ന നിലയിലാണ് താൻ സ്റ്റോറി ഇട്ട് റെയ്‌ജന് ഒപ്പം നിന്നത്. ഈ വിഷയത്തിൽ വാർത്തകൾ വന്നതോടെ ചിലരെങ്കിലും ശ്രദ്ധിച്ചു. പുരുഷന്മാർക്കെതിരെയുള്ള ലൈംഗികാതിക്രമത്തെക്കുറിച്ച് തൻ്റെ വീഡിയോ കണ്ട ശേഷം നിരവധി പേർ സന്ദേശം അയക്കുന്നുണ്ടെന്നും മൃദുല കൂട്ടിച്ചേർത്തു.