അഭിനേത്രി, മോഡൽ, അവതാരക എന്നീ നിലകളിലെല്ലാം പ്രശസ്തയായ താരമാണ് പാർവതി ആർ കൃഷ്ണ. 'അമ്മമാനസം', 'ഈശ്വരൻ സാക്ഷി' തുടങ്ങിയ ടെലിവിഷൻ പരമ്പരകളിലൂടെയാണ് പാർവതി കുടുംബപ്രേക്ഷകർക്കിടയിൽ ഏറെ സ്വീകാര്യത നേടിയത്. അഭിനയത്തിന് പുറമെ, സൗന്ദര്യ സംരക്ഷണത്തിന്റെ ഭാഗമായി 'ഫെയ്‌സ് യോഗ' പരിശീലിക്കുകയും മറ്റുള്ളവരെ പഠിപ്പിക്കുകയും ചെയ്യുന്ന പാർവതി, ഈ വിഷയത്തിൽ ഒരു അഭിമുഖം നൽകിയതിന് പിന്നാലെയാണ് കടുത്ത വിമർശനങ്ങൾക്ക് ഇരയായത്.

അവതാരക ധന്യ വർമ്മയുടെ യൂട്യൂബ് ചാനലിൽ പാർവതി നൽകിയ അഭിമുഖം സോഷ്യൽ മീഡിയയിൽ ഏറെ ശ്രദ്ധ നേടിയിരുന്നു. ഫെയ്‌സ് യോഗയിലൂടെ തന്റെ ചർമ്മത്തിലും മുഖത്തും വന്ന നല്ല മാറ്റങ്ങളെക്കുറിച്ചും, സെലിബ്രിറ്റികൾ ഉൾപ്പെടെ ആയിരത്തിലധികം പേരെ താൻ ഇത് പഠിപ്പിച്ചതിനെക്കുറിച്ചും താരം അഭിമുഖത്തിൽ വിശദീകരിച്ചിരുന്നു. എന്നാൽ, ഈ വീഡിയോയുടെ താഴെ വന്ന കമന്റുകളിൽ ചിലർ താരത്തിന്റെ രൂപത്തെ വിമർശിക്കുകയും, "ഇതൊക്കെ ചെയ്തിട്ടും പാർവതിയെ കണ്ടാൽ ഒരമ്പതു വയസ് തോന്നിക്കുമല്ലോ" എന്ന രീതിയിൽ അഭിപ്രായം പറയുകയും ചെയ്തു.

ഈ വിമർശനങ്ങളോട് രൂക്ഷമായ ഭാഷയിൽ പ്രതികരിച്ചുകൊണ്ട് പാർവതി രംഗത്തെത്തി. താൻ അറ്റൻഡ് ചെയ്ത ആ അഭിമുഖത്തിനായി തിരുവനന്തപുരത്തുനിന്ന് എറണാകുളം വരെ യാത്ര ചെയ്തിരുന്നുവെന്ന് പാർവതി വ്യക്തമാക്കി. മാത്രമല്ല, ഇന്റർവ്യൂവിന് മുൻപ് താനൊരു കെമിക്കൽ പീലിംഗ് ചെയ്തിരുന്നതിനാലും, ആ സമയത്ത് മുഖത്ത് ഫെയ്‌സ് യോഗയോ ഫേഷ്യൽ മസാജോ ചെയ്യാൻ സാധിച്ചിരുന്നില്ലെന്നും താരം വിശദീകരിച്ചു.

"എന്റെ ഫെയ്‌സ് യോഗ ക്ലയന്റ്‌സിന് അതറിയാം. എന്റെ ക്ലാസ് അറ്റൻഡ് ചെയ്ത ഓരോ ആളുകളും അത്രയും സന്തോഷത്തോടെയാണ് ക്ലാസ് കഴിഞ്ഞുപോയിട്ടുള്ളതെന്ന ആത്മവിശ്വാസം എനിക്കുണ്ട്," പാർവതി കൂട്ടിച്ചേർത്തു.

കൂടുതൽ എന്തെങ്കിലും പറയാനുള്ളവർ ഇൻബോക്സിൽ വന്ന് നേരിട്ട് സംസാരിക്കണമെന്നും, "അവിടെ കിടന്ന് ഇങ്ങനെ പെൺപിള്ളേരെപ്പോലെ, അല്ലെങ്കിൽ ആൺപിള്ളേരെ പോലേ വർത്തമാനം പറയാതെ നേരിട്ടുവന്ന് സംസാരിക്ക്. ഞാൻ വെല്ലുവിളിക്കുന്നു," എന്നും പാർവതി വ്യക്തമാക്കി. നടി ശ്രീവിദ്യ മുല്ലച്ചേരി അടക്കമുള്ളവർ പാർവതിക്ക് ശക്തമായ പിന്തുണയുമായി രംഗത്തെത്തിയിട്ടുണ്ട്.

പാർവതി ആർ കൃഷ്ണ

സ്വന്തം ലേഖകൻ