പ്രമുഖ നടി രജിഷ വിജയൻ സോഷ്യൽ മീഡിയ ഉപയോഗത്തെക്കുറിച്ചും വ്യക്തിപരമായ ജീവിതശൈലിയെക്കുറിച്ചും നിർണായക വെളിപ്പെടുത്തലുകൾ നടത്തി. കഴിഞ്ഞ എട്ടു വർഷമായി താൻ വാട്‌സാപ്പ് ഉപയോഗിക്കുന്നില്ലെന്നും നിലവിൽ ഫെയ്‌സ്ബുക്കും ഉപേക്ഷിച്ചതായും രജിഷ വ്യക്തമാക്കി. വെർച്വൽ ലോകത്തേക്കാൾ നേരിട്ടുള്ള ആശയവിനിമയത്തിനാണ് താൻ പ്രാധാന്യം നൽകുന്നതെന്നും നടി കൂട്ടിച്ചേർത്തു.

ഇൻസ്റ്റാഗ്രാം മാത്രമാണ് നിലവിൽ അപൂർവമായി ഉപയോഗിക്കുന്ന ഏക സാമൂഹിക മാധ്യമ പ്ലാറ്റ്‌ഫോം. റീലുകളുടെ വർദ്ധനയോടെ ആളുകൾ ഫോണുകൾക്ക് മുന്നിൽ അമിതമായി സമയം ചെലവഴിക്കുന്നതിനെ അവർ വിമർശിച്ചു. പുസ്തകങ്ങൾ വായിക്കാനും സിനിമകൾ കാണാനും കുടുംബത്തോടൊപ്പം സമയം ചെലവഴിക്കാനും ആർക്കും സമയമില്ലാതായിരിക്കുന്നു. ഇത് വലിയൊരു അടിമത്തമാണെന്ന് ചൂണ്ടിക്കാട്ടിയ രജിഷ, ഫോൺ ഉപയോഗം തന്റെ ചിന്തകളെ നിയന്ത്രിക്കുന്നത് ഒഴിവാക്കാൻ പല ആപ്ലിക്കേഷനുകളും നീക്കം ചെയ്തതായും അറിയിച്ചു.

ഭാവി ജീവിതത്തെക്കുറിച്ച് തനിക്ക് വലിയ പദ്ധതികളൊന്നുമില്ലെന്നും നിലവിലെ നിമിഷത്തിൽ ജീവിക്കാനാണ് താൻ ഇഷ്ടപ്പെടുന്നതെന്നും രജിഷ പറയുന്നു. പത്തു വർഷം കഴിഞ്ഞ് താൻ എവിടെയായിരിക്കുമെന്ന് ചിന്തിക്കാറില്ല. ഒരു ആർമി ഡോക്ടർ ആകുക എന്നതായിരുന്നു പണ്ടത്തെ ആഗ്രഹം. നടിയാകുമെന്ന് പ്രതീക്ഷിച്ചിരുന്നില്ലെങ്കിലും ആഗ്രഹിച്ച പല ചെറിയ കാര്യങ്ങളും ജീവിതത്തിൽ നടന്നുവെന്നും അവർ കൂട്ടിച്ചേർത്തു.

സംവിധായകൻ കൃഷാന്ദ് ഒരുക്കിയ ‘മസ്തിഷ്ക മരണം; സൈമൺസ് മെമ്മറീസ്’ എന്ന ചിത്രത്തിലൂടെ പുതിയൊരു വേഷപ്പകർച്ചയിലാണ് രജിഷ ഇപ്പോൾ. ഈ ചിത്രത്തിലെ ‘കോമള താമര’ എന്ന ഗാനം കഴിഞ്ഞ ദിവസം പുറത്തിറങ്ങുകയും വലിയ ശ്രദ്ധ നേടുകയും ചെയ്തിരുന്നു. രജിഷയുടെ കരിയറിലെ ആദ്യ ഐറ്റം ഡാൻസാണിത്. ഗ്ലാമറസ് രൂപത്തിലുള്ള താരത്തിന്റെ പ്രകടനം മികച്ച പ്രതികരണമാണ് ആരാധകരിൽ നിന്ന് നേടിയത്.

നടി രജിഷ വിജയൻ

സ്വന്തം ലേഖകൻ