'കാണിക്കാത്തവരുമായി പിണക്കത്തിലാണ്, ഇപ്പോൾ സമാധാനമായല്ലോ'; ബുദ്ധിയും ബോധവുമുണ്ടെങ്കിൽ മറ്റുള്ളവരുടെ കുടുംബത്തിൽ നുഴഞ്ഞുകയറില്ല; കുത്തിത്തിരിപ്പ് ഉണ്ടാക്കുന്നവർക്കെതിരെ നടി ശ്രീക്കുട്ടി

കൊച്ചി: തൻ്റെ യൂട്യൂബ് ചാനലിലെ വീഡിയോകൾക്ക് താഴെ വരുന്ന അനാവശ്യ കമന്റുകൾക്കും കുടുംബകാര്യങ്ങളിലുള്ള അതിരുവിട്ട ഇടപെടലുകൾക്കുമെതിരെ മറുപടിയുമായി മലയാളം മിനിസ്‌ക്രീൻ പ്രേക്ഷകർക്ക് സുപരിചിതയായ നടി ശ്രീക്കുട്ടി. തൻ്റെ വീഡിയോകളിൽ കാണിക്കാത്ത ചിലരുമായി പിണക്കത്തിലാണെന്ന് തുറന്നുപറഞ്ഞുകൊണ്ടാണ് ശ്രീക്കുട്ടി വിമർശകരുടെ വായടപ്പിച്ചത്. ഏഷ്യാനെറ്റിലെ 'ഓട്ടോഗ്രാഫ്' എന്ന സീരിയലിലൂടെ പ്രേക്ഷകർക്ക് പ്രിയങ്കരിയായ ശ്രീക്കുട്ടി നിലവിൽ അഭിനയത്തിൽ സജീവമല്ലെങ്കിലും, യൂട്യൂബ് ചാനലിലൂടെ ആരാധകരുമായി നിരന്തരം സംവദിക്കാറുണ്ട്.

ക്യാമറാമാൻ മനോജ് കുമാറാണ് ശ്രീക്കുട്ടിയുടെ ഭർത്താവ്. തൻ്റെ പുതിയ വീഡിയോയിലൂടെയാണ് വ്യക്തിജീവിതത്തെക്കുറിച്ചും കുടുംബാംഗങ്ങളെക്കുറിച്ചും നിരന്തരമായി ചോദ്യങ്ങൾ ഉന്നയിക്കുന്നവർക്ക് അവർ മറുപടി നൽകിയത്. "എൻ്റെ വീഡിയോകൾ കാണുന്ന കുറച്ചുപേർക്ക് ചിലരെ കണ്ടില്ലെങ്കിൽ ഭയങ്കര വിഷമമാണ്," ശ്രീക്കുട്ടി പറഞ്ഞു. ഒരു കുടുംബത്തിൽ പലവിധ പ്രശ്നങ്ങളും വ്യക്തിപരമായ കാര്യങ്ങളും ഉണ്ടാകാമെന്നും, അതെല്ലാം പൊതുവേദികളിൽ പങ്കുവെക്കാനാകില്ലെന്നും താരം ചൂണ്ടിക്കാട്ടി.

"കുറച്ചു ബുദ്ധിയും ബോധവുമുണ്ടെങ്കിൽ മറ്റുള്ളവരുടെ കുടുംബജീവിതത്തിൽ ഇങ്ങനെ നുഴഞ്ഞുകയറില്ല. അല്ലാത്തവരാണ് മറുപടി പോലും കിട്ടാതിരുന്നിട്ടുപോലും വീണ്ടും വീണ്ടും ചോദിക്കുന്നത്," അവർ കൂട്ടിച്ചേർത്തു. ഒരേ ആളുകൾ തന്നെയാണ് എന്നും ഈ കമന്റുകളിടുന്നത്, അത് കുത്തിത്തിരിപ്പ് ഉണ്ടാക്കാൻ വേണ്ടി മാത്രമാണെന്നും ശ്രീക്കുട്ടി ആരോപിച്ചു. സംസാരവിഷയം ആക്കരുതെന്ന് കരുതിയിട്ടും വീണ്ടും വീണ്ടും ചോദ്യങ്ങൾ ഉയർത്തുന്ന പശ്ചാത്തലത്തിലാണ് താരം നിലപാട് വ്യക്തമാക്കിയത്. "വീഡിയോയിൽ കാണിക്കാത്തവരും ഞാനും തമ്മിൽ പിണക്കത്തിലാണ്, ഇപ്പോൾ സമാധാനം ആയല്ലോ. ഇനി ഇതിനെപ്പറ്റി ചോദിക്കേണ്ട ആവശ്യം ഇല്ല," അവർ ഉറച്ച ശബ്ദത്തിൽ പറഞ്ഞു.