കൊച്ചി: മലയാളത്തിൽ തന്നെ വളരെ ചുരുക്കം സിനിമകളിൽ അഭിനയിച്ച് ഒരു പാൻ ഇന്ത്യൻ ലെവലിലേക്ക് വളരെ പെട്ടെന്ന് ഉയർന്നുവന്ന താരമാണ് ഫഹദ് ഫാസിൽ. ഇപ്പോഴിതാ, ബോളിവുഡ് നടി ആലിയ ഭട്ട് തൻ്റെ വലിയ ആരാധികയാണെന്നും ഒന്നിച്ച് അഭിനയിക്കാൻ ആഗ്രഹമുണ്ടെന്നും പറഞ്ഞതിനെക്കുറിച്ച് പ്രതികരിച്ചിരിക്കുകയാണ് നടൻ ഫഹദ് ഫാസിൽ. സിനിമയിൽ തൻ്റെ പ്രകടനം ഒരു പ്രത്യേക കാലഘട്ടത്തിൽ മാത്രം നിൽക്കുന്നതാണെന്നും ഒന്നും ദീർഘകാലം നിലനിൽക്കില്ലെന്നും അതിനാൽ ഇത്തരം പ്രശംസകളോട് സ്ഥിരമല്ലാത്ത ഒരു വികാരമാണ് തോന്നാറുള്ളതെന്നും അദ്ദേഹം പറഞ്ഞു.

പേളി മാണിക്ക് നൽകിയ അഭിമുഖത്തിലാണ് ഫഹദ് ഫാസിൽ തൻ്റെ നിലപാട് വ്യക്തമാക്കിയത്. "അത് വളരെ നല്ല അനുഭവമാണ്, പക്ഷെ എല്ലാ സിനിമയിലും നമ്മൾ മികച്ചതായിരിക്കണമെന്നില്ല. ഇതെല്ലാം ഒരു പ്രത്യേക സമയത്ത് നിൽക്കുന്ന കാര്യങ്ങളായിട്ടാണ് തോന്നുന്നത്. ഒന്നും ദീർഘകാലത്തേക്ക് നിലനിൽക്കില്ല.

അതുകൊണ്ട് തന്നെ അതിനെ ആസ്വദിക്കാനും അവഗണിക്കാനും ഞാൻ ശ്രമിക്കാറില്ല," ഫഹദ് വ്യക്തമാക്കി. "ആലിയ അങ്ങനെ പറഞ്ഞതിൽ സന്തോഷമുണ്ട്, അഭിനയിക്കാൻ അവസരം കിട്ടിയാൽ തീർച്ചയായും ചെയ്യും. അതിൽ സംശയമില്ല. പക്ഷെ സിനിമയിൽ ഒന്നും ശാശ്വതമല്ലെന്ന് പറയാറില്ലേ. അതുകൊണ്ട് തന്നെ ഈ പ്രശംസയോടും സ്ഥിരമല്ലാത്ത ഒരു വികാരമാണ് എനിക്ക് തോന്നുന്നത്," അദ്ദേഹം കൂട്ടിച്ചേർത്തു.

അതേസമയം, 'ഞണ്ടുകളുടെ നാട്ടിൽ ഒരിടവേള' എന്ന ചിത്രത്തിന് ശേഷം അൽത്താഫ് സലിം സംവിധാനം ചെയ്യുന്ന 'ഓടും കുതിര ചാടും കുതിര'യാണ് ഫഹദിൻ്റെ ഏറ്റവും പുതിയ ചിത്രം. ഓണം റിലീസായി എത്തുന്ന ചിത്രത്തിനായി പ്രേക്ഷകർ വലിയ പ്രതീക്ഷയോടെയാണ് കാത്തിരിക്കുന്നത്.

ആലിയ ഭട്ട്ഫഹദ് ഫാസിൽ

സ്വന്തം ലേഖകൻ