അമ്മ വിവാഹം കഴിക്കാതെ ഒരാളോടൊപ്പം ജീവിക്കുന്നു; സത്യത്തിൽ..അന്ന് അവിടെ നടന്നത് എന്റെ ആഗ്രഹമല്ല; വിവാഹത്തെക്കുറിച്ച് തുറന്നുപറഞ്ഞ് ആര്യ

കൊച്ചി: നടിയും അവതാരകയുമായ ആര്യ ബാബു വിവാഹിതയായി. കൊറിയോഗ്രാഫറും ഡി.ജെ.യുമായ സിബിൻ ബെഞ്ചമിനാണ് വരൻ. സമൂഹമാധ്യമങ്ങളിലൂടെയാണ് ആര്യ തന്റെ വിവാഹ ചിത്രങ്ങൾ പുറത്തുവിട്ടത്. മകൾ ഖുഷിയുടെ കൈപിടിച്ചാണ് ആര്യ വിവാഹ വേദിയിലേക്ക് എത്തിയത്. രണ്ടാമതൊരു വിവാഹം കഴിക്കാൻ തീരുമാനിച്ചപ്പോൾ സ്വന്തം ഇഷ്ടത്തിനല്ല, മറിച്ച് മകളുടെ ഇഷ്ടത്തിനാണ് മുൻഗണന നൽകിയതെന്ന് ആര്യ വ്യക്തമാക്കി.

ജിഞ്ചർ മീഡിയ എന്റർടെയിൻമെന്റ്സിന് നൽകിയ അഭിമുഖത്തിൽ സംസാരിക്കുകയായിരുന്നു ആര്യയും സിബിനും. "വിവാഹത്തിന് മുമ്പ് ഞാൻ സിംഗിൾ മദർ ആയിരുന്നു. വേണമെങ്കിൽ ലിവ്-ഇൻ ടുഗെദർ എന്ന ഓപ്ഷൻ തിരഞ്ഞെടുക്കാമായിരുന്നു. എന്നാൽ ടീനേജുകാരിയായ മകളുള്ളതുകൊണ്ട്, അവൾ സ്കൂളിൽ പോകുന്ന കുട്ടിയാണ്. നാളെ അവളെ ആരും ചോദ്യം ചെയ്യരുത്. അമ്മ വിവാഹം കഴിക്കാതെ ഒരാളോടൊപ്പം താമസിക്കുന്നു എന്ന സംസാരം സമൂഹത്തിൽ വരരുത്. മകൾക്ക് വേണ്ടിയാണ് ഞങ്ങൾ ഈ തീരുമാനമെടുത്തത്," ആര്യ പറഞ്ഞു.

ഒരു പങ്കാളിയെ തനിക്ക് ഏറെ ആഗ്രഹമുണ്ടായിരുന്നുവെന്നും, എന്നാൽ മകളുള്ളതിനാൽ ലിവ്-ഇൻ റിലേഷൻഷിപ്പ് തനിക്ക് പറ്റില്ലെന്നും അവർ കൂട്ടിച്ചേർത്തു. "എനിക്ക് കല്യാണം കഴിച്ച് ഒരു കുടുംബം വേണമായിരുന്നു. അതിന് മാനസികമായി ഞാൻ വളരെ മുമ്പേ തയ്യാറെടുത്തിരുന്നു. എന്റെ ആഗ്രഹമാണെങ്കിൽ പോലും, എന്റെ മകൾക്ക് കംഫർട്ടബിൾ ആയ ഒരാളെ മാത്രമേ ആ സ്ഥാനത്തേക്ക് കൊണ്ടുവരാൻ എനിക്ക് കഴിയൂ. അവളാണ് എന്റെ പ്രയോരിറ്റി," ആര്യ വ്യക്തമാക്കി.