മാസ്ക് ധരിച്ച് ആളെ തിരിച്ചറിയാൻ പറ്റാത്ത രീതിയിൽ നടത്തം; ഒരു കടയുടെ മുന്നിലെത്തിയതും എന്റെ മുത്തേ..എന്നൊരു വിളി; ഒന്നും നോക്കാതെ ഓടിപ്പോയി ചേർത്തുപിടിച്ച് അസീസ്; വൈറലായി വീഡിയോ
പ്രശസ്ത സിനിമാ-ടെലിവിഷൻ താരം അസീസ് നെടുമങ്ങാട് 18 വർഷം മുൻപ് ബഹ്റൈനിൽ താൻ ജോലി ചെയ്തിരുന്ന കടയിൽ പഴയ സുഹൃത്തിനെ സന്ദർശിച്ചതിന്റെ ഹൃദയസ്പർശിയായ വീഡിയോ സമൂഹമാധ്യമങ്ങളിൽ തരംഗമാകുന്നു. പഴയകാല ഓർമ്മകൾ പങ്കുവെച്ച് സഹപാഠിയെ കണ്ടുമുട്ടിയതിന്റെ സന്തോഷം അസീസ് തന്റെ ഇൻസ്റ്റാഗ്രാം പേജിലൂടെയാണ് ആരാധകരുമായി പങ്കുവെച്ചത്.
ബഹ്റൈനിലെ പഴയ ജോലിസ്ഥലത്തെത്തിയ അസീസിനെ കണ്ടയുടൻ സുഹൃത്ത് ആശ്ചര്യത്തോടെ കെട്ടിപ്പിടിച്ച് "എന്റെ മുത്തേ നീ എപ്പോ എത്തി" എന്ന് ചോദിക്കുന്നത് വീഡിയോയിൽ കാണാം. സാധാരണയായി "അളിയാ" എന്ന് വിളിച്ചാണ് വരാറുള്ളതെന്നും സുഹൃത്ത് സ്നേഹത്തോടെ പറയുന്നുണ്ട്. "18 വർഷങ്ങൾക്കു മുന്നേ ബഹ്റൈനിൽ ജോലി ചെയ്ത കടയിൽ ഞാൻ പോയി, കൂടെ വർക്ക് ചെയ്തിരുന്ന എന്റെ സഹപാഠി... ഇപ്പോഴും അവൻ അവിടെയുണ്ട്, അവനെ കണ്ടപ്പോൾ ഒരുപാട് സന്തോഷം," എന്ന കുറിപ്പോടെയാണ് അസീസ് വീഡിയോ പങ്കുവെച്ചത്.
ടെലിവിഷൻ റിയാലിറ്റി പ്രോഗ്രാമുകളിലൂടെയും കോമഡി ഷോകളിലൂടെയും അഭിനയരംഗത്തെത്തിയ അസീസ്, നിലവിൽ സിനിമകളിൽ കൂടുതൽ സജീവമാണ്. ഹാസ്യകഥാപാത്രങ്ങൾക്കപ്പുറം വൈവിധ്യമാർന്ന വേഷങ്ങളിലൂടെയും പ്രേക്ഷകശ്രദ്ധ നേടിയിട്ടുള്ള അസീസ്, അഭിനയരംഗത്ത് എത്ര തിരക്കുണ്ടായിട്ടും പഴയ സൗഹൃദങ്ങളും ഓർമ്മകളും ചേർത്തുപിടിക്കുന്ന വ്യക്തിയാണെന്ന് ഈ വീഡിയോ ഓർമ്മിപ്പിക്കുന്നു.
