'ഇങ്ങേരുടെ പടത്തിൽ അഭിനയിക്കാത്തത് കൊണ്ട് മോഹൻലാൽ സൂപ്പർ സ്റ്റാർ ആയി'; 'ലാൽ സലാം' പരിപാടിയുമായി ബന്ധപ്പെട്ട വിവാദങ്ങളിൽ അടൂരിനെ വിമർശിച്ച് ബൈജു സന്തോഷ്

തിരുവനന്തപുരം: ദാദാസാഹേബ് ഫാൽക്കെ പുരസ്‌കാരം നേടിയ നടൻ മോഹൻലാലിനെ ആദരിക്കാൻ സർക്കാർ സംഘടിപ്പിച്ച 'വാനോളം മലയാളം ലാൽ സലാം' പരിപാടിയുമായി ബന്ധപ്പെട്ട വിവാദങ്ങൾക്കിടെ സംവിധായകൻ അടൂർ ഗോപാലകൃഷ്ണനെതിരെ നടൻ ബൈജു സന്തോഷ് സാമൂഹിക മാധ്യമങ്ങളിൽ ഇട്ട കമന്റ് വൈറലാകുന്നു. ലാൽ സലാം ചടങ്ങിൽ അടൂർ നടത്തിയ പ്രസംഗവും അതിന് മോഹൻലാൽ നൽകിയ മറുപടിയും മുൻപ് അടൂർ മോഹൻലാലിനെക്കുറിച്ച് നടത്തിയ ഒരു പരാമർശവും ഉൾപ്പെടുത്തിക്കൊണ്ടുള്ള വിഡിയോ ചർച്ചാവിഷയം ആയതോടെയാണ് ബൈജു സന്തോഷിന്റെ പ്രതികരണം.

'ഇങ്ങേരുടെ പടത്തിൽ അഭിനയിക്കാത്തത് കൊണ്ട് മോഹൻലാൽ സൂപ്പർ സ്റ്റാർ ആയി' എന്നായിരുന്നു ബൈജുവിന്റെ കമന്റ്. സംസ്ഥാന സർക്കാർ മോഹൻലാലിനെ ആദരിക്കുന്ന ചടങ്ങിൽ സംസാരിക്കവേ, അടൂർ ഗോപാലകൃഷ്ണൻ തൻ്റെ സിനിമകളിൽ മോഹൻലാൽ അഭിനയിച്ചിട്ടില്ലെന്നും, താൻ ഒരു പ്രമുഖ നടനെ നല്ലവനായ റൗഡി ആയി ചിത്രീകരിക്കാൻ തയ്യാറല്ലെന്നും മുൻപ് പറഞ്ഞിരുന്നു. അടൂരിൻ്റെ പ്രസ്താവനക്കെതിരെ സാമൂഹിക മാധ്യമങ്ങളിൽ വിമർശനം ഉയർന്നുവന്ന സാഹചര്യത്തിലാണ് ബൈജുവിൻ്റെ പ്രതികരണം.

ചടങ്ങിൽ മോഹൻലാൽ നൽകിയ മറുപടിയും ശ്രദ്ധേയമായിരുന്നു. 'എന്നെക്കുറിച്ച് ആദ്യമായി പറഞ്ഞ.., അല്ല മുൻപ് പലപ്പോഴും സംസാരിച്ചിട്ടുള്ള അടൂർ സാറിനും നന്ദി' എന്നായിരുന്നു മോഹൻലാലിൻ്റെ മറുപടി. മോഹൻലാലിനെ ഒരിക്കലും സിനിമകളിൽ കാസ്റ്റ് ചെയ്യാത്തതിനെക്കുറിച്ച് അടൂർ മുൻപ് ഒരു അഭിമുഖത്തിൽ പറഞ്ഞ വാക്കുകളും ഇതിനോടകം ചർച്ചയായിരുന്നു. ഈ സാഹചര്യങ്ങളെല്ലാം ഉൾക്കൊള്ളുന്ന ഒരു വീഡിയോ സാമൂഹിക മാധ്യമങ്ങളിൽ പ്രചരിച്ചപ്പോഴാണ് ബൈജു സന്തോഷ് രൂക്ഷമായ കമൻ്റുമായി രംഗത്തെത്തിയത്. ബൈജുവിൻ്റെ ഈ പരാമർശം നിമിഷനേരം കൊണ്ട് വൈറലാവുകയും നിരവധി പേർ പിന്തുണച്ചുകൊണ്ട് രംഗത്തുവരികയും ചെയ്തു.