പഹല്‍ഗാമിലെ ഭീകരതയുടെ മനുഷ്യത്വരഹിതമായ പ്രവൃത്തി; പ്രിയപ്പെട്ടവരെ നഷ്ടപ്പെട്ടവരുടെ കുടുംബാംഗങ്ങളുടെ വേദന സങ്കല്‍പ്പിക്കാന്‍ കഴിയുന്നില്ല; അനുശോചനങ്ങളും പ്രാര്‍ത്ഥനകളും: പഹല്‍ഗാം ഭീകരാക്രമണത്തെ അപലപിച്ച് സിനിമാലോകം
ജമ്മു കശ്മീരിലെ പഹല്‍ഗാമിന് സമീപം പുല്‍മേട്ടില്‍ നടന്ന ഹീനമായ ഭീകരാക്രമണം രാജ്യത്തെ അമ്പരപ്പിലാഴ്ത്തിയപ്പോള്‍, സിനിമാ ലോകം അതിനെ ശക്തമായി അപലപിച്ചു. വിനോദസഞ്ചാരികളെ ലക്ഷ്യമിട്ട് നടന്ന വെടിവെപ്പില്‍ 29 പേരാണ് ജീവഹാനിയുണ്ടായത് 2019ലെ പുല്‍വാമ സംഭവത്തിന് ശേഷമുള്ള ഏറ്റവും മാരകമായ ആക്രമണമായി ഇതിനെ വിലയിരുത്തുന്നു.
അക്ഷയ് കുമാര്‍, കമല്‍ ഹാസന്‍, മോഹന്‍ലാല്‍, അല്ലു അര്‍ജുന്‍, നാനി, സണ്ണി ഡിയോള്‍, കരീന കപൂര്‍, സിദ്ധാര്‍ത്ഥ് മല്‍ഹോത്ര, സുനില്‍ ഷെട്ടി തുടങ്ങിയവരെല്ലാം സാമൂഹ്യമാധ്യമങ്ങളിലൂടെ അനുശോചനം രേഖപ്പെടുത്തി.
പഹല്‍ഗാമില്‍ വിനോദസഞ്ചാരികള്‍ക്ക് നേരെയുണ്ടായ ഭീകരാക്രമണത്തെക്കുറിച്ച് അറിഞ്ഞപ്പോള്‍ ഭയം തോന്നിയെന്നും നിരപരാധികളെ കൊല്ലുന്നത് കൊടും ക്രൂരതയാണെന്നും അക്ഷയ് കുമാര്‍ പറഞ്ഞു. അവരുടെ കുടുംബങ്ങള്‍ക്ക് വേണ്ടി പ്രാര്‍ത്ഥനകള്‍ എന്ന് അക്ഷയ് കുമാര്‍ എക്സില് എഴുതി.
പഹല്‍ഗാമിലെ ഹീനമായ ഭീകരാക്രമണത്തെ ശക്തമായി അപലപിക്കുന്നതായി കമല്‍ ഹാസന്‍ അറിയിച്ചു. പ്രിയപ്പെട്ടവരെ നഷ്ടപ്പെട്ട കുടുംബങ്ങളോടൊപ്പമാണ് തന്റെ ചിന്തകളെന്നും പരിക്കേറ്റവര്‍ക്ക് ശക്തിയും വീണ്ടെടുക്കലും നേരുന്നതായും അദ്ദേഹം കുറിച്ചു.
ഇന്‍സ്റ്റാഗ്രാം സ്റ്റോറി പോസ്റ്റ് ചെയ്തുകൊണ്ടാണ് വിക്കി കൗശല്‍ പ്രതികരിച്ചത്. 'പഹല്‍ഗാമിലെ ഭീകരതയുടെ മനുഷ്യത്വരഹിതമായ പ്രവൃത്തിയില്‍ പ്രിയപ്പെട്ടവരെ നഷ്ടപ്പെട്ടവരുടെ കുടുംബാംഗങ്ങളുടെ വേദന സങ്കല്‍പ്പിക്കാന്‍ കഴിയുന്നില്ല. അഗാധമായ അനുശോചനങ്ങളും പ്രാര്‍ത്ഥനകളും. ഈ ഹീനകൃത്യത്തിന് പിന്നിലെ കുറ്റവാളികളെ നീതിപീഠത്തിന് മുന്നില്‍ കൊണ്ടുവരുമെന്ന് പ്രതീക്ഷിക്കുന്നതായി അദ്ദേഹം വ്യക്തമാക്കി.
'പഹല്‍ഗാം ഭീകരാക്രമണത്തിന്റെ ഇരയായവരെ ഓര്‍ത്ത് ഹൃദയം വേദനിക്കുന്നു. ഇത്രയും ക്രൂരതക്ക് സാക്ഷ്യം വഹിക്കുന്നത് വളരെ വേദനാജനകമാണ് എന്നാണ് മോഹന്‍ലാല്‍ എഴുതിയത്. നിരപരാധികളുടെ ജീവന്‍ അപഹരിക്കുന്നതിന് ഒരു കാരണവും ഒരിക്കലും ന്യായീകരിക്കാനാവില്ല. നിങ്ങളുടെ ദുഃഖം വാക്കുകള്‍ക്ക് അതീതമാണ്. നിങ്ങള്‍ ഒറ്റക്കല്ല. രാജ്യവും മുഴുവന്‍ ദുഃഖത്തില്‍ നിങ്ങളോടൊപ്പം നില്‍ക്കുന്നു. നമുക്ക് പരസ്പരം മുറുകെ പിടിക്കാം. ഇരുട്ടിലും സമാധാനം നിലനില്‍ക്കുമെന്ന പ്രതീക്ഷ ഒരിക്കലും കൈവിടരുത്' മോഹന്‍ലാല്‍ കുറിച്ചു.
അല്ലു അര്‍ജുനും തന്റെ ദുഃഖം പ്രകടിപ്പിച്ചു. ''പഹല്‍ഗാം ആക്രമണത്തില്‍ എത്ര ഹൃദയം തകര്‍ന്നു. ദയയുള്ള ആളുകളുള്ള മനോഹരമായ സ്ഥലം. ഇരകളുടെ പ്രിയപ്പെട്ടവര്‍ക്കും എല്ലാ കുടുംബങ്ങള്‍ക്കും അനുശോചനം. നിരപരാധികളായ ആത്മാക്കള്‍ക്ക് നിത്യശാന്തി നേരുന്നു. ശരിക്കും ഹൃദയം പൊട്ടുന്നു'' എന്നാണ് അദ്ദേഹം എഴുതിയത്.
തെലുങ്ക് താരം നാനി ഷൂട്ടിങ്ങിനായി പഹല്‍ഗാമില്‍ എത്തിയ കാര്യം ഒര്‍മിച്ചു. 'മൂന്ന് മാസം മുമ്പ് ഞങ്ങള്‍ അവിടെ ഉണ്ടായിരുന്നു. 200-ലധികം പേര്‍ ഏകദേശം 20 ദിവസത്തേക്ക് ഒരുമിച്ച് അഭിനയിച്ചു. പഹല്‍ഗാം ഒരു സ്വപ്‌നം പോലെയായിരുന്നു. സ്ഥലം, ആളുകള്‍, ഊഷ്മളത. ഹൃദയം തകര്‍ന്നു, വാക്കുകള്‍ക്ക് വകയില്ല' -നാനി എക്സില് കുറിച്ചത്.
ഈ സമയത്ത്, ലോകത്തിന്റെ ചിന്ത തീവ്രവാദത്തെ അവസാനിപ്പിക്കുന്നതിനെക്കുറിച്ചായിരിക്കണം, കാരണം അതിന്റെ ഇരകള്‍ നിരപരാധികള്‍ മാത്രമാണ്, മനുഷ്യര്‍ സ്വയം നോക്കേണ്ടതുണ്ട്. ദുരിതബാധിത കുടുംബങ്ങള്‍ക്കൊപ്പം നില്‍കുന്നതായി സണ്ണി ഡിയോള്‍ അറിയിച്ചു.
ഹൃദയം തകര്‍ന്നു. നഷ്ടപ്പെട്ട ജീവനുകള്‍ക്കായി പ്രാര്‍ഥിക്കുന്നു എന്ന് കരീന കപൂറും ജമ്മു കശ്മീരിലെ പഹല്‍ഗാമില്‍ നടന്ന ഭീകരാക്രമണം ഒരു ഭീരുത്വപരമായ പ്രവൃത്തിയാണെന്ന് സിദ്ധാര്‍ഥ് മല്‍ഹോത്രയും പറഞ്ഞു. നമ്മുടെ സായുധ സേനയില്‍ പൂര്‍ണ വിശ്വാസമുണ്ട്, അവര്‍ ആവശ്യമായത് ചെയ്യുമെന്നും നീതി ഉറപ്പാക്കുമെന്നും ഉറപ്പുണ്ടെന്ന് സിദ്ധാര്‍ഥ് കൂട്ടിച്ചേര്‍ത്തു..
പഹല്‍ഗാമില്‍ വിനോദസഞ്ചാരികള്‍ക്ക് നേരെയുണ്ടായ ഭീരുത്വം നിറഞ്ഞ വളരെയധികം അസ്വസ്ഥനാണെന്ന് സുനില്‍ ഷെട്ടി എക്സില് എഴുതി. നിരപരാധികളായ സന്ദര്‍ശകര്‍ക്കെതിരായ അക്രമം കശ്മീരിന്റെ ആത്മാവിനും നൂറ്റാണ്ടുകള്‍ പഴക്കമുള്ള ആതിഥ്യമര്യാദക്കും നേരെയുള്ള ആക്രമണമാണ്. പരിക്കേറ്റവര്‍ക്കുവേണ്ടിയുള്ള പ്രാര്‍ത്ഥനകള്‍. ഇത്തരം ക്രൂരതകളെ അപലപിക്കുന്നതിലും വേഗത്തിലുള്ള നീതി ആവശ്യപ്പെടുന്നതിലും ഒറ്റക്കെട്ടായി നില്‍ക്കാമെന്ന് അദ്ദേഹം കുറിച്ചു.
