കൊച്ചി: ഗ്രേഡ് ത്രീ ഫാറ്റി ലിവറും ടൈഫോയിഡും ബാധിച്ചതായി വെളിപ്പെടുത്തി 'പാട്ടുവർത്തമാനം' എന്ന പരിപാടിയിലൂടെ ശ്രദ്ധേയനായ ദിവാകൃഷ്ണ. കഴിഞ്ഞ കുറച്ചു മാസങ്ങളായി സാമൂഹിക മാധ്യമങ്ങളിൽ സജീവമല്ലാതിരുന്നതിന്റെ കാരണം തന്റെ രോഗാവസ്ഥയാണെന്നും താരം വ്യക്തമാക്കി. നിലവിൽ 'ഐഡിയ സ്റ്റാർ സിംഗർ' പരിപാടിയിലെ നിറസാന്നിധ്യമാണ് ദിവാകൃഷ്ണ. പുറത്തുനിന്നുള്ള ഭക്ഷണം അമിതമായി കഴിച്ചതാണ് തന്റെ രോഗാവസ്ഥയ്ക്ക് കാരണമെന്ന് ദിവാകൃഷ്ണ പറയുന്നു.

ഏകദേശം ഒൻപത് വയസ് മുതലാണ് താൻ പുറത്തുനിന്നുള്ള ഭക്ഷണം കഴിച്ചു തുടങ്ങിയതെന്നും കോളേജ് കാലഘട്ടത്തിൽ ഇത് വർധിച്ചെന്നും അദ്ദേഹം സൂചിപ്പിച്ചു. കഴിഞ്ഞ ഒന്നര വർഷമായി എല്ലാ മാസവും പനി വരാറുണ്ടായിരുന്നെന്നും നാലോ അഞ്ചോ ദിവസങ്ങൾ കിടപ്പിലായിരുന്നെന്നും അദ്ദേഹം ഓർത്തെടുത്തു. പനി വന്ന് വണ്ടിയോടിക്കുമ്പോൾ ഒരു തവണ ബോധം നഷ്ടപ്പെട്ടതായും ഭാഗ്യം കൊണ്ട് അന്ന് അപകടമൊന്നും സംഭവിച്ചില്ലെന്നും അദ്ദേഹം പറഞ്ഞു.

സെപ്റ്റംബറിൽ വീണ്ടും കടുത്ത പനി വരികയും ഇത് പിന്നീട് വയറിളക്കമായി മാറുകയും ചെയ്തു. മരിച്ച് പോകുമോ എന്ന് പോലും തോന്നിപ്പിച്ച ദിവസങ്ങളായിരുന്നു അതെന്ന് ദിവാകൃഷ്ണ കൂട്ടിച്ചേർത്തു. തുടർന്ന് ഭാര്യയോടൊപ്പം ആശുപത്രിയിൽ പോയപ്പോൾ ഡോക്ടറെ കാണുകയും ബ്ലഡ് ടെസ്റ്റ് നടത്തുകയും ചെയ്തു. പരിശോധനാഫലം വന്നയുടൻ തന്നെ ആശുപത്രിയിൽ അഡ്മിറ്റ് ചെയ്യാൻ ഡോക്ടർ ആവശ്യപ്പെടുകയായിരുന്നു.

രക്തത്തിൽ അണുബാധയാണെന്നും പിന്നീട് നടത്തിയ പരിശോധനകളിലാണ് ടൈഫോയിഡും ഗ്രേഡ് ത്രീ ലിവർ സിറോസിസും സ്ഥിരീകരിച്ചതെന്നും ദിവാകൃഷ്ണ വ്യക്തമാക്കി. ഈ ആരോഗ്യപ്രശ്നങ്ങൾക്കിടയിലും താൻ ഒരു കുഞ്ഞിന്റെ അച്ഛനായെന്ന സന്തോഷവാർത്തയും അദ്ദേഹം പങ്കുവെച്ചു.

പാട്ടുവർത്തമാനംദിവാകൃഷ്ണഐഡിയ സ്റ്റാർ സിംഗർ

സ്വന്തം ലേഖകൻ