ഞാൻ വെറുമൊരു ലക്കി പ്രൊഡ്യൂസർ..; പടം ഇത്രയും ഇഷ്ടപ്പെടുമെന്ന് വിചാരിച്ചില്ല; 'ലോക'യുടെ വിജയത്തിൽ ഞാൻ സന്തോഷവാനാണ്; ആരാധകർക്ക് നന്ദി പറഞ്ഞ് നടൻ ദുൽഖർ

തിരുവനന്തപുരം: കല്യാണി പ്രിയദർശൻ, നസ്ലൻ എന്നിവരെ കേന്ദ്രകഥാപാത്രങ്ങളാക്കി ഡൊമിനിക് അരുൺ സംവിധാനം ചെയ്ത 'ലോക ചാപ്റ്റർ വൺ: ചന്ദ്ര' എന്ന ചിത്രം വൻ വിജയമായതിന്റെ സന്തോഷം നിർമ്മാതാവ് ദുൽഖർ സൽമാൻ പങ്കുവെച്ചു. സിനിമയുടെ വിജയത്തിന്റെ മുഴുവൻ ക്രെഡിറ്റും അണിയറപ്രവർത്തകർക്കാണെന്നും താൻ ഒരു 'ലക്കി പ്രൊഡ്യൂസർ' മാത്രമാണെന്നും അദ്ദേഹം പറഞ്ഞു.

അബുദാബിയിലെ 369 സിനിമാസിൽ 'ലോക' പ്രദർശിപ്പിക്കാനെത്തിയപ്പോഴായിരുന്നു ദുൽഖറിന്റെ പ്രതികരണം. ചിത്രത്തിലെ താരങ്ങളായ കല്യാണി പ്രിയദർശൻ, നസ്ലൻ എന്നിവരോടൊപ്പം ടൊവിനോ തോമസും ചടങ്ങിൽ പങ്കെടുത്തു. "ചെറിയ സ്വപ്നത്തോടെയാണ് ഈ ചിത്രം ആരംഭിച്ചത്. നിങ്ങളിത്രയധികം ഇഷ്ടപ്പെടുമെന്ന് കരുതിയില്ല," ദുൽഖർ കൂട്ടിച്ചേർത്തു.

വമ്പൻ ബഡ്ജറ്റിൽ ഒരുക്കിയ 'ലോക' സൂപ്പർഹീറോ സിനിമാറ്റിക് യൂണിവേഴ്സിലെ ആദ്യ ചിത്രമാണ് 'ചന്ദ്ര'. ചിത്രത്തിൽ നിരവധി അതിഥി താരങ്ങളും അണിനിരക്കുന്നുണ്ട്. യാനിക്ക് ബെൻ ഒരുക്കിയ സംഘട്ടന രംഗങ്ങൾ ഏറെ പ്രശംസ നേടി.