'ഐ ആം അൺപ്രഡിക്റ്റബിൾ...'; ഇത്തവണ വരുന്നത് ഇന്ത്യൻ താത്ത പോലെയാവില്ല; ഗെയിം ചേഞ്ചറുമായി ശങ്കർ; രാം ചരൺ ചിത്രത്തിന്റെ ടീസർ പുറത്ത്
തമിഴ് സിനിമയിൽ നിരവധി ഹിറ്റ് ചിത്രങ്ങൾ ഒരുക്കിയ സംവിധായകനാണ് ശങ്കർ. ചെയ്ത സിനിമകളിൽ മിക്കതും ബോക്സ് ഓഫീസ് ഹിറ്റ്. അദ്ദേഹം സംവിധാനം ചെയ്ത് 1996 ൽ പുറത്തിറങ്ങിയ 'ഇന്ത്യൻ' കമൽ ഹാസന്റെ കരിയറിൽ തന്നെ ഏറ്റവും മികച്ച ചിത്രങ്ങളിൽ ഒന്നായിരുന്നു. ഈ വർഷം പുറത്തിറങ്ങിയ അതിന്റെ രണ്ടാം ഭാഗമായിരുന്നു ശങ്കറിന്റെ അവസാന ചിത്രം. വലിയ പ്രതീക്ഷകളോടെ തീയേറ്ററിൽ എത്തിയ ചിത്രം പ്രതീക്ഷക്കൊത്ത് ഉയർന്നില്ല.
മാത്രമല്ല ആരാധകർക്കിടയിൽ ഉണ്ടായ നിരാശ വൻ വിമർശനങ്ങൾക്കും കാരണമായി. ചിത്രം ബോക്സ് ഓഫിസിലും പരാജയമായി. എന്നാൽ തെലുങ്കിൽ ഭാഗ്യ പരീക്ഷണത്തിന് ഒരുങ്ങുകയാണ് ഹിറ്റ് മേക്കർ ശങ്കർ. തെലുങ്കിലെ സൂപ്പര്‍ താരം രാം ചരണ്‍ നായകനാകുന്ന 'ഗെയിം ചേഞ്ചര്‍' എന്ന ചിത്രത്തിന്റെ അപ്ഡേറ്റുമായാണ് ശങ്കർ പ്രേക്ഷകരെ ഞെട്ടിച്ചിരിക്കുന്നത്. ആക്ഷനും ബ്രഹ്മാണ്ഡ കാഴ്ചകളുമായി ചിത്രത്തിൻറെ ടീസര്‍ പുറത്തിറങ്ങിയിരിക്കുകയാണ്.
ശ്രീ വെങ്കടേശ്വര ക്രിയേഷന്‍സിന്‍റെ ബാനറില്‍ ദില്‍ രാജുവും സിരീഷും ചേര്‍ന്നാണ് ചിത്രം നിര്‍മ്മിക്കുന്നത്. ചിത്രത്തിലെ നേരത്തെ വന്ന രണ്ട് ഗാനങ്ങള്‍ വലിയ ശ്രദ്ധ നേടിയിരുന്നു. എസ് തമന്‍ ആണ് ചിത്രത്തിന്റെ സംഗീതം. കിയാര അദ്വാനിയാണ് ചിത്രത്തില്‍ നായികയായി എത്തുന്നത്. എസ്ജെ സൂര്യ വില്ലനായി എത്തുന്നു. അഞ്ജലി, ജയറാം, സുനിൽ, ശ്രീകാന്ത്, സമുദ്രക്കനി, നാസർ തുടങ്ങിയ വലിയ താര നിര ഗെയിം ചേഞ്ചറിൽ അഭിനയിക്കുന്നുണ്ട്. ഷങ്കറിന്റെ ആദ്യ തെലുങ്ക് ചിത്രമെന്ന പ്രതീക്ഷയോടെയാണ് ഗെയിം ചേഞ്ചർ എത്തുന്നത്.
ഐഎഎസ് ഓഫീസറുടെ വേഷമാണ് രാം ചരൺ അവതരിപ്പിക്കുന്നത്. അഴിമതിക്കെതിരെ പോരാടുന്ന മദൻ കഥാപാത്രമാണ് രാം ചരൺ വെള്ളിത്തിരയിൽ എത്തിക്കുന്നത്. തമിഴ് സംവിധായകന്‍ കാർത്തിക് സുബ്ബരാജാണ് ചിത്രത്തിന്റെ രചന നിര്‍വഹിച്ചിരിക്കുന്നത്. ചിത്രത്തിന്റെ ടീസര്‍ ലോഞ്ച് ലഖ്നൗവിലാണ് നടന്നത്. ചിത്രം ഈ വർഷം ക്രിസ്മസ് റിലീസായി എത്തും എന്നാണ് അടുത്തിടെ നിർമാതാവായ ദിൽ രാജു അറിയിച്ചത്.
