പട്ടികയിൽ ഇടം നേടിയത് രണ്ട് ബോളിവുഡ് താരങ്ങൾ മാത്രം; ഓർമാക്സ് മീഡിയുടെ ജനപ്രീതിയില്‍ മുന്നിലുള്ള ഇന്ത്യൻ നായികാ താരങ്ങളിൽ സാമന്ത വീണ്ടും ഒന്നാമത്
കൊച്ചി: ഇന്ത്യയിലെ ഏറ്റവും ജനപ്രിയരായ നായികമാരുടെ പട്ടികയിൽ തെന്നിന്ത്യൻ താരങ്ങളുടെ ആധിപത്യം. ഓർമാക്സ് മീഡിയ പുറത്തുവിട്ട സെപ്റ്റംബർ മാസത്തെ കണക്കുകൾ പ്രകാരം, നടി സാമന്ത വീണ്ടും ഒന്നാം സ്ഥാനം നിലനിർത്തി. ബോളിവുഡ് താരം ആലിയ ഭട്ടിനെയാണ് സാമന്ത പിന്നിലാക്കിയത്.
പട്ടികയിൽ രണ്ടാം സ്ഥാനത്ത് ആലിയ ഭട്ടും, മൂന്നാം സ്ഥാനത്ത് കാജൽ അഗർവാളും ഇടം നേടി. നാലാം സ്ഥാനത്ത് തൃഷയും, അഞ്ചാം സ്ഥാനത്ത് ദീപിക പദുകോണും എത്തുന്നു. മലയാളികളുടെ പ്രിയതാരം നയൻതാര ആറാം സ്ഥാനത്തും, 'നാഷണൽ ക്രഷ്' രശ്മിക മന്ദാന ഏഴാം സ്ഥാനത്തുമാണ്. തുടർച്ചയായ ഹിറ്റുകളിലൂടെ പ്രേക്ഷകശ്രദ്ധ നേടിയ സായ് പല്ലവിയാണ് പട്ടികയിൽ എട്ടാം സ്ഥാനത്ത്.
കമൽ ഹാസൻ നിർമ്മിച്ച 'അമർ' എന്ന തമിഴ് ചിത്രത്തിലെയും നാഗചൈതന്യ നായകനായ തെലുങ്ക് ചിത്രം 'തണ്ടേൽ' എന്നിവയിലെയും പ്രകടനം താരത്തിന് ഈ സ്ഥാനം നേടികൊടുത്തു. ഇവയെല്ലാം ആഗോള തലത്തിൽ 300 കോടി ക്ലബിൽ ഇടം നേടിയ ചിത്രങ്ങളാണ്. തൊട്ടുപിന്നാലെ തമന്ന ഭാട്ടിയയും ശ്രീലീലയും പട്ടികയിൽ ഇടം നേടി.ഇന്ത്യയിലെ ആദ്യ പത്ത് ജനപ്രിയ നായികമാരിൽ രണ്ട് ബോളിവുഡ് താരങ്ങൾ മാത്രമാണ് ഇടം നേടിയത് എന്നതും ശ്രദ്ധേയമാണ്.
