'ഒരു വ്യക്തിയെ ശരിയായ സമയത്താണോ വിവാഹം കഴിച്ചതെന്ന് എങ്ങനെ ഉറപ്പിക്കാം?'; വിവാഹബന്ധത്തിന് എക്സ്പയറി ഡേറ്റ്' വേണം, അത് പുതുക്കാനും അവസരമുണ്ടാകാണാം; തുറന്ന് പറഞ്ഞ് കജോൾ

മുംബൈ: വിവാഹബന്ധങ്ങൾക്ക് ഒരു 'എക്സ്പയറി ഡേറ്റ്' നിശ്ചയിക്കണമെന്നും, പിന്നീട് അത് 'പുതുക്കാനുള്ള' ഓപ്ഷനും ഉണ്ടാകണമെന്നും ബോളിവുഡ് നടി കജോൾ. ആമസോൺ പ്രൈമിൽ സംപ്രേക്ഷണം ആരംഭിച്ച 'ടൂ മച്ച് വിത്ത് കജോൾ ആൻഡ് ട്വിങ്കിൾ' എന്ന പരിപാടിയുടെ പുതിയ എപ്പിസോഡിലാണ് താരം ഈ പരാമർശം നടത്തിയത്. നടൻ വിക്കി കൗശലും നടി കൃതി സനോണും അതിഥികളായി എത്തിയ എപ്പിസോഡിലാണ് വിവാഹത്തെക്കുറിച്ചുള്ള കജോളിന്റെ തുറന്നുപറച്ചിൽ.

വിവാഹബന്ധങ്ങൾക്ക് കാലപരിധി നിശ്ചയിക്കുന്നതിനോട് അതിഥികൾ വിയോജിപ്പ് പ്രകടിപ്പിച്ചെങ്കിലും, സഹ അവതാരകയായ കജോൾ തന്റെ നിലപാടിൽ ഉറച്ചുനിന്നു. 'ഒരു വ്യക്തിയെ ശരിയായ സമയത്ത്, ശരിയായ ആളാണോ വിവാഹം ചെയ്തതെന്ന് എങ്ങനെ ഉറപ്പിക്കാൻ സാധിക്കും? വിവാഹബന്ധം പുതുക്കാൻ അവസരമുണ്ടാകുന്നത് വളരെ നല്ല കാര്യമാണ്,' കജോൾ പറഞ്ഞു. 'വിവാഹത്തിന് ഒരു കാലപരിധി ഉണ്ടെങ്കിൽ, ആർക്കും ആ ബന്ധം അധികകാലം സഹിക്കേണ്ടി വരില്ല,' അവർ കൂട്ടിച്ചേർത്തു.

'ടൂ മച്ച് വിത്ത് കജോൾ ആൻഡ് ട്വിങ്കിൾ' പരിപാടിയിലൂടെ ബോളിവുഡ് താരങ്ങളായ കജോളും ട്വിങ്കിൾ ഖന്നയും വ്യത്യസ്ത വിഷയങ്ങളെക്കുറിച്ച് സംസാരിക്കാൻ പ്രമുഖരെ ക്ഷണിക്കുന്നു. സെലിബ്രിറ്റി അതിഥികളെ പങ്കെടുപ്പിച്ച്, ജീവിതം, പ്രശസ്തി, സമൂഹം തുടങ്ങിയ വിഷയങ്ങളെക്കുറിച്ച് സ്ത്രീകളുടെ കാഴ്ചപ്പാടിലൂടെയുള്ള സംഭാഷണങ്ങൾ അവതരിപ്പിക്കുന്ന ഒരു ടോക്ക് ഷോയാണിത്. ലൈറ്റ്, ഡാർക്ക് മോഡ് ഓപ്ഷനുകളിൽ ലഭ്യമായ ഈ പരിപാടി പ്രേക്ഷകശ്രദ്ധ നേടുന്നുണ്ട്.