'കേരളത്തിൽ കളരിപ്പയറ്റ് അഭ്യസിക്കുകയാണ്'; പരിശീലനച്ചിത്രങ്ങള്‍ പങ്കുവെച്ച് ഇഷ തല്‍വാര്‍; ഇനി തട്ടമിട്ട ആയിഷ അല്ല, അറക്കൽ ആയിഷയെന്ന് ആരാധകർ
തൃശ്ശൂര്‍: കേരളത്തിൽ കളരിപ്പയറ്റ് അഭ്യസിക്കുകയാണെന്ന് ചലച്ചിത്രതാരം ഇഷ തല്‍വാര്‍. തൃശൂരിലെ ചാവക്കാടുള്ള ശ്രീനാരായണഗുരു സ്മാരക വല്ലഭട്ട കളരിസംഘത്തിലാണ് താരം പരിശീലനം നടത്തുന്നത്. കളരിപ്പയറ്റ് പരിശീലനത്തിനിടെയുള്ള ചിത്രങ്ങളും അനുഭവങ്ങളും ഇഷ തൻ്റെ ഔദ്യോഗിക ഇൻസ്റ്റഗ്രാം പേജിലൂടെ ആരാധകരുമായി പങ്കുവെച്ചു.
ഗുരുക്കന്മാർക്കൊപ്പം പരിശീലനം നടത്തുന്നതിൻ്റെയും കളരി പരിശീലനത്തിൻ്റെയും ദൃശ്യങ്ങളാണ് താരം പോസ്റ്റ് ചെയ്തത്. കളരിപ്പയറ്റ് എന്ന കലാരൂപത്തെ അതിൻ്റെ തനിമയോടെ നിലനിർത്താനും അടുത്ത തലമുറകളിലേക്ക് പകർത്താനും ശ്രമിക്കുന്ന പത്മശ്രീ ഗുരുജി ശങ്കരനാരായണ മേനോനോടുള്ള നന്ദിയും ഇഷ അറിയിച്ചു. കളരി പഠിപ്പിച്ച ഗുരുജി കൃഷ്ണദാസ്, ഗുരുജി ദിനേശ് ജി, ഗുരുജി രാജീവ് ജി എന്നിവരെയും താരം പ്രത്യേകം പരാമർശിച്ചു.
"ക്ഷമയോടെ എന്നെ പഠിപ്പിച്ച എൻ്റെ ഗുരുക്കന്മാർക്ക് ഞാൻ നന്ദി പറയുന്നു. ഈ കലാരൂപത്തെ അതിൻ്റെ തനിമയോടെ പുനഃസ്ഥാപിക്കുകയും ആചാരാനുഷ്ഠാനങ്ങൾ നിലനിർത്തുകയും അവയെല്ലാം തങ്ങളുടെ കുടുംബത്തിലേക്ക് മനോഹരമായി പകർന്നു നൽകുകയും ചെയ്യുന്ന പത്മശ്രീ ഗുരുജി ശങ്കരനാരായണ മേനോനും എൻ്റെ പ്രത്യേക നന്ദി," ഇഷ കുറിച്ചു.
വിവിധ ഭാഷകളിൽ അഭിനയിച്ചിട്ടുണ്ടെങ്കിലും മലയാള സിനിമയിൽ ശ്രദ്ധേയമായ വേഷങ്ങൾ ചെയ്ത നടിയാണ് ഇഷ തൽവാർ. 'തട്ടത്തിൻ മറയത്ത്', 'ബാംഗ്ലൂർ ഡെയ്സ് 'തുടങ്ങിയ ചിത്രങ്ങളിലൂടെ മലയാളികൾക്ക് സുപരിചിതയായ താരമാണ് ഇഷ തൽവാർ. തൻ്റെ പരിശീലന ചിത്രങ്ങൾ പങ്കുവെച്ചതിലൂടെ ആരാധകരിൽ നിന്നും മികച്ച പ്രതികരണമാണ് ലഭിക്കുന്നത്. 'ഇനി തട്ടമിട്ട ആയിഷ അല്ല, അറക്കൽ ആയിഷ' എന്നായിരുന്നു താരം പങ്കുവെച്ച ചിത്രങ്ങൾക്ക് ലഭിച്ച ഒരു കമന്റ്. ആയിഷ കളരിയും തുടങ്ങിയോ എന്നായിരുന്നു മറ്റൊരാളുടെ സംശയം.
