കേരളം കീഴടക്കാന്‍ കങ്കുവ വരുന്നു; കങ്കുവയ്ക്ക് 500 ല്‍ അധികം സ്‌ക്രീനുകള്‍, 100 ല്‍ അധികം ഫാന്‍സ് ഷോ; വിതരത്തിന് എത്തിക്കുന്നത് ശ്രീ ഗോകുലം മൂവീസ്
; കങ്കുവയ്ക്ക് 500 ല്‍
ചെന്നൈ: സൂര്യ നായകനായി എത്തുന്ന ഏറ്റവും പുതിയ ചിത്രമാണ് 'കങ്കുവ'. വന്‍ ബജറ്റില്‍, വലിയ ഹൈപ്പില്‍ വരുന്ന സിനിമയുടെ മേല്‍ കേരളത്തിലെ പ്രേക്ഷകര്‍ക്കും വലിയ പ്രതീക്ഷയാണുള്ളത്. കേരളത്തിലും സൂര്യ ചിത്രം മാസാകുമെന്ന കാര്യം ഉറപ്പായി. കേരളത്തില്‍ 500 ല്‍ അധികം സ്‌ക്രീനുകളായിലാണ് സിനിമ റിലീസ് ചെയ്യുക. അതിനൊപ്പം 100 ല്‍ അധികം ഫാന്‍സ് ഷോകളും സിനിമയ്ക്ക് ഉണ്ടാകുമെന്നാണ് സൂചന. ഇത് ഒരു സൂര്യ ചിത്രത്തെ സംബന്ധിച്ച് റെക്കോര്‍ഡാണ്. ശ്രീ ഗോകുലം മൂവീസിന്റെ ബാനറില്‍ ഗോകുലം ഗോപാലനാണ് ചിത്രം കേരളത്തിലെത്തിക്കുന്നത്.
നവംബര്‍ 14 നാണ് ചിത്രം ആഗോളതലത്തില്‍ റിലീസ് ചെയ്യുന്നത്. കേരളത്തിന് പുറമെ കര്‍ണാടക, ആന്ധ്രാപ്രദേശ്, വടക്കേ ഇന്ത്യന്‍ സംസ്ഥാനങ്ങള്‍ എന്നിവിടങ്ങളിലും സിനിമയ്ക്ക് വലിയ സ്‌ക്രീന്‍ കൗണ്ട് തന്നെയാണ് ലഭിച്ചിരിക്കുന്നത്. സ്റ്റുഡിയോ ഗ്രീനിന്റെ ബാനറില്‍ കെ ഇ ജ്ഞാനവേല്‍ രാജ, യു വി ക്രിയേഷന്‍സിന്റെ ബാനറില്‍ വംശി പ്രമോദ് എന്നിവര്‍ ചേര്‍ന്നാണ് ചിത്രം നിര്‍മ്മിക്കുന്നത്. ശിവയ്ക്കൊപ്പം ആദി നാരായണയും മദന്‍ ഗാര്‍ഗിയും ചേര്‍ന്നാണ് ചിത്രത്തിന്റെ തിരക്കഥ ഒരുക്കിയിരിക്കുന്നത്.
അതേസമയം സിനിമയുടേതായി പുറത്തിറങ്ങിയ പുതിയ ഗാനത്തില്‍ നിര്‍ണ്ണായകമായ മാറ്റങ്ങള്‍ വരുത്തുവാന്‍സെന്‍ട്രല്‍ ബോര്‍ഡ് ഓഫ് ഫിലിം സര്‍ട്ടിഫിക്കേഷന്‍ നിര്‍ദേശിച്ചതായുള്ള റിപ്പോര്‍ട്ടുകളും പുറത്തുവരുന്നുണ്ട്. യോലോ എന്ന് തുടങ്ങുന്ന ഗാനത്തിന്റെ റിലീസിന് മുന്നോടിയായി ഗാനത്തിലെ രംഗങ്ങള്‍ പരിഷ്‌കരിക്കാന്‍ സെന്‍സര്‍ ബോര്‍ഡ് ആവശ്യപ്പെട്ടിരുന്നു എന്നാണ് ടൈംസ് നൗ റിപ്പോര്‍ട്ട് ചെയ്യുന്നത്.
ഗാനരംഗങ്ങളില്‍ അമിത ശരീര പ്രദര്‍ശനമുണ്ടെന്നും ആ രംഗങ്ങള്‍ നീക്കം ചെയ്യുകയോ സി ബി എഫ് സി അംഗങ്ങളുടെ നിര്‍ദേശങ്ങള്‍ക്ക് അനുസരിച്ച് പരിഷ്‌കരിക്കുകയോ വേണമെന്നാണ് സെന്‍സര്‍ ബോര്‍ഡ് ആവശ്യപ്പെട്ടത്.
