കൊച്ചി: അഭിനയ ജീവിതത്തിലെ അനുഭവങ്ങളെയും വെല്ലുവിളികളെയും കുറിച്ച് തുറന്ന് പറഞ്ഞ് പ്രശസ്ത ടെലിവിഷൻ നടി കാർത്തിക കണ്ണൻ. സീരിയലുകളിലെ നെഗറ്റീവ് കഥാപാത്രങ്ങളിലൂടെയാണ് താൻ കൂടുതൽ ശ്രദ്ധ നേടിയതെന്നും, ഇത്തരം വേഷങ്ങളുടെ പേരിൽ പ്രേക്ഷകരിൽ നിന്ന് വഴക്ക് കേൾക്കേണ്ടി വന്നിട്ടുണ്ടെന്നും അവർ ഒരു അഭിമുഖത്തിൽ പറഞ്ഞു. നിലവിൽ ഏഷ്യാനെറ്റിലെ 'സാന്ത്വനം' സീരിയലിലാണ് കാർത്തിക അഭിനയിക്കുന്നത്.

ആദ്യകാലത്ത് നായികയായിട്ടാണ് അഭിനയം തുടങ്ങിയതെങ്കിലും പിന്നീട് കൂടുതലും ലഭിച്ചത് വില്ലത്തിയുടെയും കുശുമ്പത്തിയുടെയും വേഷങ്ങളായിരുന്നുവെന്ന് കാർത്തിക പറയുന്നു. ഈ വേഷങ്ങളിലൂടെയാണ് താൻ പ്രേക്ഷകർക്കിടയിൽ പരിചിതയായതെന്നും അവർ കൂട്ടിച്ചേർത്തു. ഒരിക്കൽ ഒരു അമ്പലത്തിൽ വെച്ച് ഒരു അമ്മ തന്നോട് 'ഗുണം പിടിക്കില്ല' എന്ന് പറഞ്ഞ് വഴക്ക് പറഞ്ഞ അനുഭവം അവർ ഓർത്തെടുത്തു. അത്തരം കഥാപാത്രങ്ങൾ അഭിനയിക്കുന്നതല്ലേ എന്ന് താൻ മറുപടി നൽകിയതായും കാർത്തിക വ്യക്തമാക്കി.

തുടക്കകാലത്തെ കഷ്ടപ്പാടുകളെക്കുറിച്ചും നടി വിവരിച്ചു. ആദ്യമായി നായികയായി അഭിനയിക്കുന്ന സമയത്ത് ലൊക്കേഷനുകളിലേക്ക് പോകാൻ ട്രെയിനോ ഫ്ലൈറ്റോ ലഭ്യമല്ലായിരുന്നു. പ്രൊഡക്ഷൻ ടീം ബസ് യാത്രാ പൈസ മാത്രമാണ് നൽകിയിരുന്നത്. എന്നാൽ ഇന്ന് പുതിയ തലമുറയിലെ അഭിനേതാക്കൾ ബെൻസിൽ വന്നിറങ്ങുന്ന കാലമാണെന്നും, തങ്ങളെല്ലാം ഒരുപാട് കഷ്ടപ്പെട്ട് വന്നവരാണെന്നും അതിന്‍റെ ഗുണം തങ്ങൾക്കുണ്ടെന്നും കാർത്തിക അഭിപ്രായപ്പെട്ടു.

തന്‍റെ ട്രേഡ്മാർക്കായ വലിയ പൊട്ടിനെക്കുറിച്ചും അവർ സംസാരിച്ചു. ചെറുപ്പം മുതൽ അമ്മ തൊട്ടുതന്നിരുന്നത് വലിയ കറുത്ത പൊട്ടായിരുന്നുവെന്നും പിന്നീട് അത് ഇല്ലാതിരിക്കുമ്പോൾ എന്തോ ഒരു കുറവ് തോന്നിയെന്നും, അങ്ങനെയാണ് അത് തന്‍റെ ഒരു അടയാളമായി മാറിയതെന്നും കാർത്തിക വിശദീകരിച്ചു. തന്‍റെ പ്രതിഫലത്തെക്കുറിച്ചുള്ള അഭ്യൂഹങ്ങളെക്കുറിച്ചും നടി പ്രതികരിച്ചു. അതൊക്കെ വെറുതെ പറയുന്നതാണെന്നും, ഒരിക്കൽ തന്‍റെ പ്രതിഫലം കേട്ട് താൻ തന്നെ അത്ഭുതപ്പെട്ടുപോയെന്നും അവർ പറഞ്ഞു. അക്കൗണ്ടിലേക്ക് എത്ര പണം വരുന്നു എന്ന് മറ്റുള്ളവർ എങ്ങനെ അറിയാനാണ് എന്നും കാർത്തിക ചോദിച്ചു.

ടെലിവിഷൻ നടികാർത്തിക കണ്ണൻസാന്ത്വനം

സ്വന്തം ലേഖകൻ