കൊച്ചി: അന്തരിച്ച നടി സുബി സുരേഷിന്റെ പ്രൊഫഷണലിസത്തെക്കുറിച്ചുള്ള ഒരപൂർവാനുഭവം പങ്കുവെച്ച് സംവിധായകൻ ലാൽ ജോസ്. ഒരു ചടങ്ങിനിടെ നടന്ന അപ്രതീക്ഷിതമായി സംഭവത്തെകുറിച്ചാണ് അദ്ദേഹം യൂട്യൂബ് ചാനലിലൂടെ വെളിപ്പെടുത്തിയത്. 2023-ൽ കരൾ സംബന്ധമായ അസുഖത്തെ തുടർന്ന് അകാലത്തിൽ പൊലിഞ്ഞ സുബിയെ മലയാളികൾ ഇന്നും വേദനയോടെ ഓർക്കുന്നു. സ്റ്റേജിൽ പൊട്ടിച്ചിരികൾ സൃഷ്ടിച്ചിരുന്ന, പ്രൊഫഷണലായി കാര്യങ്ങൾ കൈകാര്യം ചെയ്യുന്ന ഒരു കലാകാരിയെ ഒരിക്കലും മറക്കാൻ സാധിക്കില്ലെന്ന് ലാൽ ജോസ് എടുത്തുപറഞ്ഞു.

സംഭവം നടന്നത് 'മീശമാധവൻ' എന്ന ചിത്രത്തിന്റെ 202-ാം ദിവസത്തെ വിജയാഘോഷവും ലാൽ ജോസ് സംവിധാനം ചെയ്ത 'പട്ടാളം' എന്ന സിനിമയുടെ ഓഡിയോ ലോഞ്ചും ഒരേ ദിവസം കൊച്ചിയിൽ നടന്ന വലിയൊരു പരിപാടിയിലാണ്. മെഗാ സ്റ്റാറുകളായ മമ്മൂട്ടി, ദിലീപ്, കാവ്യ മാധവൻ തുടങ്ങിയ പ്രമുഖർ വേദിയിൽ അണിനിരന്ന ഈ ചടങ്ങിൽ ചില അപാകതകൾ സംഭവിച്ചിരുന്നതായും ലാൽ ജോസ് ഓർമ്മിച്ചു.

പരിപാടികൾക്ക് ആളുകളെ സ്വാഗതം ചെയ്ത ശേഷം, ലാൽ ജോസ് സ്റ്റേജിന്റെ ഒരു വശത്തുള്ള ഗ്രീൻ റൂമിനടുത്തിരുന്ന് ചില കുറിപ്പുകൾ എഴുതുകയായിരുന്നു. അതേസമയം, സുബിയും ടിനിയും ചേർന്ന് ഒരു സ്കിറ്റ് അവതരിപ്പിക്കുകയായിരുന്നു. അടുത്ത രംഗത്തിനായി വേഷം മാറുന്നതിന് സുബി ധൃതിയിൽ ഗ്രീൻ റൂമിലേക്ക് ഓടിയെത്തി. താൻ അവിടെ ഇരിക്കുന്നത് സുബി കണ്ടിരുന്നില്ലെന്ന് ലാൽ ജോസ് പറയുന്നു. വന്നയുടൻ അവൾ ധരിച്ചിരുന്ന നൈറ്റി ഊരിമാറ്റിയപ്പോഴാണ് തന്നെ കാണുന്നത്.

ഒരൊറ്റ നിമിഷം എന്തു ചെയ്യണമെന്നറിയാതെ താനും സുബിയും ഞെട്ടിപ്പോയെന്ന് ലാൽ ജോസ് വിവരിച്ചു. അന്ന് സുബി ഒരു ചെറിയ പെൺകുട്ടിയായിരുന്നുവെന്നും തനിക്ക് പെട്ടെന്ന് അവിടെ നിന്ന് മാറിപ്പോകാൻ സാധിക്കുമായിരുന്നില്ലെന്നും അദ്ദേഹം ഓർമ്മിച്ചു. എന്നാൽ, കൂടുതൽ ഒന്നും ചിന്തിക്കാതെ, അടുത്ത കോസ്റ്റ്യൂം എടുത്ത് സുബി വേദിയിലേക്ക് മടങ്ങിയെന്ന് ലാൽ ജോസ് പറഞ്ഞു. ഒരു പെൺകുട്ടിക്ക്, അന്യപുരുഷന്റെ മുന്നിൽ വെച്ച് അപ്രതീക്ഷിതമായി വസ്ത്രം മാറേണ്ടി വരുന്ന സാഹചര്യം വളരെ വിഷമം പിടിച്ച ഒന്നാണെങ്കിലും, സുബി ആ നിമിഷം പ്രൊഫഷണലായും കൈകാര്യം ചെയ്തെന്ന് അദ്ദേഹം കൂട്ടിച്ചേർത്തു. വർഷങ്ങൾക്കിപ്പുറം 'എൽസമ്മ എന്ന ആൺകുട്ടി' എന്ന സിനിമയിൽ അഭിനയിക്കാൻ താൻ സുബിയെ ക്ഷണിക്കുന്നതിന് ഈ സംഭവം നിമിത്തമായിരുന്നില്ലെന്നും ലാൽ ജോസ് വെളിപ്പെടുത്തി.

സുബി സുരേഷ്യൂട്യൂബ് ചാനൽലാൽ ജോസ്

സ്വന്തം ലേഖകൻ