'ഇതെന്താ മാലാപാർവ്വതി ഈ വേഷത്തിൽ.. വൈകിയാണ് അറിയുന്നത് സാരി പാടില്ലാന്ന്, പെട്ടു!'; സൈമ നോമിനേഷൻ പാർട്ടിയിൽ സാരിക്ക് 'നോ എൻട്രി'; സ്റ്റൈലിഷ് ഗൗണിൽ തിളങ്ങി മാലാ പാർവതി; ചിത്രങ്ങൾ വൈറൽ

കൊച്ചി: സൈമ (സൗത്ത് ഇന്ത്യൻ ഇന്റർനാഷണൽ മൂവി അവാർഡ്സ്) 2025 നോമിനേഷൻ പാർട്ടിയിൽ വേറിട്ട വസ്ത്രധാരണത്തിലൂടെ ശ്രദ്ധനേടി നടി മാലാ പാർവതി. പാർട്ടിയിൽ സാരിക്ക് പ്രവേശനമില്ലെന്ന ഡ്രസ് കോഡ് നിലനിന്നതിനാലാണ് താരം പതിവ് ശൈലിയിൽ നിന്ന് മാറി സ്റ്റൈലിഷ് ഗൗൺ തിരഞ്ഞെടുത്തത്. താരത്തിന്റെ ഈ പുതിയ ലുക്ക് സമൂഹമാധ്യമങ്ങളിൽ തരംഗമായി.

'മുറ' എന്ന സിനിമയിലെ പ്രകടനത്തിന് മികച്ച സഹനടിക്കുള്ള നോമിനേഷൻ ലഭിച്ചതിനെ തുടർന്നാണ് മാലാ പാർവതി പാർട്ടിയിൽ പങ്കെടുത്തത്. വെള്ള നിറത്തിലുള്ള ഗൗണിനൊപ്പം വെള്ളി ആഭരണങ്ങളും മുത്തുകൾ പതിപ്പിച്ച ക്ലച്ച് ബാഗുമായിരുന്നു താരത്തിന്റെ വേഷം. പനമ്പിള്ളി നഗറിലെ 'സാൾട്ട് സ്റ്റുഡിയോ' ആണ് ഈ വസ്ത്രം ഒരുക്കിയത്.

പാർട്ടിക്കായി ആദ്യം സാരിയാണ് തയ്യാറാക്കിയിരുന്നതെന്നും എന്നാൽ അവസാന നിമിഷം ഡ്രസ് കോഡിനെക്കുറിച്ച് അറിഞ്ഞതോടെയാണ് പുതിയ വസ്ത്രം തിരഞ്ഞെടുത്തതെന്നും മാലാ പാർവതി സമൂഹമാധ്യമങ്ങളിൽ കുറിച്ചു. 'സൈമ അവാർഡിന് നോമിനേഷൻ ലഭിച്ചവർക്ക് ഒരു പാർട്ടി ഉണ്ടെന്ന് പറഞ്ഞപ്പോൾ, സാധാരണ പോലെ സാരി റെഡി ആക്കി. ഇന്നലെ കാലത്ത് അറിയുന്നു, സാരി പാടില്ലാന്ന്. പെട്ടു! ഒടുവിൽ സാൾട്ട് സ്റ്റുഡിയോ ഒരു മാജിക് തീർത്തു,' എന്നാണ് താരം ചിത്രങ്ങൾക്കൊപ്പം കുറിച്ചത്.

പൊതുവേദികളിൽ സാധാരണയായി സാരിയിൽ പ്രത്യക്ഷപ്പെടാറുള്ള മാലാ പാർവതിയുടെ ഈ പുതിയ മേക്കോവറിന് ആരാധകരിൽ നിന്ന് മികച്ച പ്രതികരണമാണ് ലഭിക്കുന്നത്. 'മുറ' എന്ന ചിത്രത്തിലെ പ്രകടനമാണ് താരത്തിന് സൈമ അവാർഡ് നോമിനേഷൻ നേടിക്കൊടുത്തത്.