'ഒരേ സമയം പുതുമ നിറഞ്ഞതും മനുഷ്യരോട് ചേർന്ന് നിൽക്കുന്നതും, എന്തുകൊണ്ടാണ് ഇങ്ങനെയെന്ന് ചർച്ച ചെയ്യാറുണ്ട്'; ഇന്ത്യയിൽ ലോക നിലവാരത്തിലുള്ള സിനിമകൾ മലയാളത്തിലാണെന്ന് മകരന്ദ് ദേശ്പാണ്ഡേ

കൊച്ചി: ഇന്ത്യയിൽ നിലവിൽ ലോകനിലവാരമുള്ള സിനിമകൾ നിർമ്മിക്കപ്പെടുന്നത് മലയാളത്തിലാണെന്ന് പ്രശസ്ത ബോളിവുഡ് നടൻ മകരന്ദ് ദേശ്പാണ്ഡേ. ഇവിടുത്തെ പ്രേക്ഷകരുടെ സിനിമയെക്കുറിച്ചുള്ള അറിവും കാഴ്ചപ്പാടുമാണ് താരങ്ങൾക്ക് പരീക്ഷണ ചിത്രങ്ങൾ ചെയ്യാൻ ധൈര്യം നൽകുന്നതെന്നും അദ്ദേഹം കൂട്ടിച്ചേർത്തു.

‘മലയാള സിനിമ ഒരേ സമയം പുതുമ നിറഞ്ഞതും മനുഷ്യരോട് ചേർന്ന് നിൽക്കുന്നതുമാണ്. എന്തുകൊണ്ടാണ് മലയാളത്തിൽ മികച്ച സിനിമകൾ ഉണ്ടാകുന്നത് എന്ന് ഞങ്ങൾ ചർച്ച ചെയ്യാറുണ്ട്. സുഹൃത്തുക്കളെ കാണുമ്പോൾ അടുത്തിടെ ഏത് മലയാളം സിനിമ കണ്ടു എന്ന് ചോദിക്കാറുണ്ട്. അതിന് കാരണം ഇവിടുത്തെ പ്രേക്ഷകരുടെ സിനിമപരിജ്ഞാനമാണ്. ഇതാണ് പരീക്ഷണ ചിത്രങ്ങൾ ചെയ്യാൻ മലയാളത്തിലെ സൂപ്പർ താരങ്ങൾക്ക് ധൈര്യം നൽകുന്നത്. എന്നാൽ ബോളിവുഡിൽ അങ്ങനെയൊരു സാഹചര്യം നിലവിലില്ല,’ മകരന്ദ് ദേശ്പാണ്ഡേ പറഞ്ഞു.

ഷഹ്‌മോൻ തിരക്കഥ രചിച്ച് സംവിധാനം ചെയ്യുന്ന ‘വവ്വാൽ’ എന്ന പുതിയ സിനിമയുടെ പൂജ ചടങ്ങുകൾക്ക് കൊച്ചിയിൽ എത്തിയതായിരുന്നു അദ്ദേഹം. ഓൺഡിമാന്റ്സിന്റെ ബാനറിലാണ് ചിത്രം നിർമ്മിക്കുന്നത്. ചാവറ കൾച്ചറൽ സെന്ററിൽ നടന്ന ചടങ്ങിൽ സിനിമയുടെ അണിയറപ്രവർത്തകരും പ്രധാന താരങ്ങളായ ലെവിൻ സൈമൺ, ലക്ഷ്മി ചപോർക്കർ, പ്രവീൺ, ഗോകുലൻ എന്നിവരും പങ്കെടുത്തു. ജോസഫ് നെല്ലിക്കൽ ആദ്യ ക്ലാപ്പ് നൽകി.

മനോജ് എംജെ ഛായാഗ്രഹണം നിർവഹിക്കുന്ന ചിത്രത്തിന്റെ പ്രൊഡക്ഷൻ ഡിസൈനർ ജോസഫ് നെല്ലിക്കലാണ്. ഫൈസൽ പി ഷഹ്‌മോനാണ് എഡിറ്റർ. ജോൺസൺ പീറ്റർ സംഗീതവും അനിൽ മാത്യു പ്രൊഡക്ഷൻ കൺട്രോളും നിർവഹിക്കുന്നു. ചിത്രീകരണം അടുത്തയാഴ്ച ആരംഭിക്കും.