വസ്ത്രധാരണത്തിന്റെ പേരിൽ സാമൂഹിക മാധ്യമങ്ങളിൽ വിമർശനം; സദാചാരവാദികളുടെ വായടപ്പിച്ച് മീര നന്ദൻ; ഞരമ്പൻമാരുടെ കമന്റ്സ് മൈന്റ് ചെയ്യണ്ടെന്ന് ആരാധകരും
സീഷെൽസ്: വസ്ത്രധാരണത്തിന്റെ പേരിൽ സാമൂഹിക മാധ്യമങ്ങളിൽ വിമർശനങ്ങൾ നേരിട്ടത്തിന് പിന്നാലെ അതേ നാണയത്തിൽ മറുപടി നൽകി നടി മീര നന്ദൻ. ഹണിമൂൺ ആഘോഷങ്ങളിൽ നിന്നുള്ള ഗ്ലാമറസായ ചിത്രങ്ങൾ പങ്കുവെച്ചതിനെ തുടർന്നായിരുന്നു താരത്തിനെതിരെ വ്യാപക വിമർശനമുയർന്നത്. എന്നാൽ, സമാനമായ വസ്ത്രങ്ങളിലുള്ള കൂടുതൽ ചിത്രങ്ങൾ പോസ്റ്റ് ചെയ്തുകൊണ്ടാണ് മീര തന്റെ നിലപാട് വ്യക്തമാക്കിയത്.
കിഴക്കൻ ആഫ്രിക്കയിലെ മനോഹരമായ സീഷെൽസ് ദ്വീപിലാണ് മീര നന്ദനും ഭർത്താവ് ശ്രീജുവും ഹണിമൂൺ ആഘോഷിക്കുന്നത്. 2024 ജനുവരിയിൽ വിവാഹിതരായ ഇരുവരുടെയും ഹണിമൂൺ ഒരു വർഷത്തിന് ശേഷമാണ് ആഘോഷിക്കപ്പെടുന്നത്. ഈ യാത്ര വൈകിയെങ്കിലും, ഒട്ടും നഷ്ടബോധം തോന്നുന്നില്ലെന്ന് മീര തന്റെ സോഷ്യൽ മീഡിയ പോസ്റ്റിൽ കുറിച്ചു.
ബീച്ചിൽ നിന്നുള്ള ചിത്രങ്ങളിൽ മീര ധരിച്ച വസ്ത്രങ്ങൾ "അതീവ ഗ്ലാമറസാണ്" എന്ന് ചൂണ്ടിക്കാട്ടി ഒരു വിഭാഗം സോഷ്യൽ മീഡിയ ഉപയോക്താക്കൾ രംഗത്തെത്തി. ഇത് "സദാചാരവാദികൾക്ക്" ഇടയിൽ വലിയ ചർച്ചയാവുകയും, അവർ താരത്തിനെതിരെ വ്യാപകമായ സൈബർ ആക്രമണത്തിന് തുടക്കമിടുകയുമായിരുന്നു. മീര പങ്കുവെച്ച ചിത്രങ്ങൾക്ക് താഴെ കമന്റ് ബോക്സുകളിലൂടെ നിരവധി പേർ താരത്തെ അവഹേളിക്കുകയും വ്യക്തിപരമായ അധിക്ഷേപങ്ങൾ നടത്തുകയും ചെയ്തു.
എന്നാൽ ഈ വിമർശനങ്ങൾക്ക് വഴങ്ങാതെ, മീര നന്ദൻ തന്റെ അതേ വസ്ത്രധാരണ ശൈലിയിലുള്ള കൂടുതൽ ചിത്രങ്ങൾ സമൂഹമാധ്യമങ്ങളിൽ പങ്കുവെച്ച് ഞെട്ടിച്ചു. പുതിയ ചിത്രങ്ങൾക്കും സമാനമായ കമന്റുകൾ വരുന്നുണ്ടെങ്കിലും, ഇത്തരം സൈബർ ആക്രമണങ്ങൾ തന്നെ തളർത്തില്ലെന്ന് മീര നന്ദൻ ആവർത്തിച്ചു വ്യക്തമാക്കിയിട്ടുണ്ട്. അഭിനയത്തിൽ നിന്ന് വിട്ടുനിൽക്കുന്ന മീര ഇപ്പോൾ ദുബായിൽ ഒരു റേഡിയോ ജോക്കിയായി ജോലി ചെയ്യുകയാണ്. സാമൂഹിക മാധ്യമങ്ങളിൽ സജീവമായ മീര, തന്റെ വ്യക്തിപരമായ നിമിഷങ്ങളും കാഴ്ചപ്പാടുകളും ആരാധകരുമായി പങ്കുവെക്കാറുണ്ട്.
