'എന്റെ മകളുടെ ചെണ്ട അരങ്ങേറ്റം ആറ്റുകാൽ ദേവീക്ഷേത്രത്തിൽ'; സന്തോഷം പങ്കുവെച്ച് മേനക സുരേഷ്; വൈറലായി വീഡിയോ
തിരുവനന്തപുരം: മകൾ രേവതി സുരേഷിൻറെ ചെണ്ടമേള അരങ്ങേറ്റത്തിന്റെ വീഡിയോ പങ്കുവെച്ച് മേനക സുരേഷ്. തിരുവനന്തപുരത്തെ ആറ്റുകാൽ ദേവീക്ഷേത്രത്തിൽ വെച്ച് നടന്ന ചടങ്ങിന്റെ വീഡിയോ നടി മേനക സുരേഷ് സമൂഹമാധ്യമങ്ങളിലൂടെ പങ്കുവെച്ചത്. സിനിമാ നിർമാതാവ് സുരേഷ് കുമാറിന്റെയും മേനകയുടെയും മൂത്ത മകളായ രേവതി സുരേഷ്. മകളുടെ കലാപരമായ പുതിയ ചുവടുവെപ്പിന് സിനിമാരംഗത്തെ നിരവധി പേർ ആശംസകളർപ്പിച്ചു.
"എന്റെ മകൾ രേവതി സുരേഷിന്റെ ചെണ്ട അരങ്ങേറ്റം ആറ്റുകാൽ ദേവീക്ഷേത്രത്തിൽ," എന്ന കുറിപ്പോടെയാണ് മേനക സുരേഷ് രേവതി ചെണ്ടമേളം അവതരിപ്പിക്കുന്നതിന്റെ ദൃശ്യങ്ങൾ പങ്കുവെച്ചത്. മുൻപ് നൃത്തവേദികളിലൂടെ പരിചിതയായിരുന്ന രേവതിക്ക് ഇത് വാദ്യകലാരംഗത്തെ ആദ്യ ചുവടുവെപ്പാണ്. വിഷ്വൽ ഇഫക്ട്സ് ആർട്ടിസ്റ്റ്, സിനിമാ നിർമാതാവ്, ക്ലാസിക്കൽ ഡാൻസർ എന്നീ നിലകളിൽ രേവതി സുരേഷ് തൻ്റേതായ വ്യക്തിമുദ്ര പതിപ്പിച്ചിട്ടുണ്ട്.
സഹോദരി കീർത്തി സുരേഷ് ക്യാമറയ്ക്ക് മുന്നിലെ ലോകം തിരഞ്ഞെടുത്തപ്പോൾ, ക്യാമറയ്ക്ക് പിന്നിലാണ് രേവതി കഴിവ് തെളിയിച്ചത്. സംവിധായകൻ പ്രിയദർശന്റെ സഹായിയായി വർഷങ്ങളോളം പ്രവർത്തിച്ച രേവതി, 'താങ്ക് യു' എന്ന ഹ്രസ്വചിത്രത്തിലൂടെ സംവിധാന രംഗത്തും അരങ്ങേറ്റം കുറിച്ചു.
'മരക്കാർ; അറബിക്കടലിന്റെ സിംഹം', 'വാശി', മോഹൻലാൽ ചിത്രം 'ബാറോസ്' തുടങ്ങിയ സിനിമകളിലും നിരവധി ബോളിവുഡ് ചിത്രങ്ങളിലും നിർമാണത്തിലും സാങ്കേതിക വിഭാഗത്തിലും രേവതി സജീവമായി പ്രവർത്തിച്ചിട്ടുണ്ട്. നിലവിൽ രേവതി കലാമന്ദിർ ഫിലിം അക്കാദമി നിയന്ത്രിക്കുന്നതും പ്രമുഖ നർത്തകി ഡോ. പത്മ സുബ്രഹ്മണ്യത്തിന്റെ ശിഷ്യയുമാണ്.
