'വാനപ്രസ്ഥത്തിലെ രംഗങ്ങൾ അനശ്വരമാക്കാൻ സഹായിച്ചത് ഗുരുവിന്റെ ആ വാക്കുകൾ'; സംസ്കൃത നാടകത്തിനായി തയ്യാറെടുത്തത് 8 ദിവസം കൊണ്ടെന്നും മോഹൻലാൽ
തിരുവനന്തപുരം: തൻ്റെ കരിയറിലെ ഏറ്റവും മികച്ചതും വെല്ലുവിളി നിറഞ്ഞതുമായ കഥാപാത്രങ്ങളിലൊന്നായിരുന്നു 'വാനപ്രസ്ഥ'ത്തിലെ കുഞ്ഞികുട്ടനെന്ന കഥാപാത്രമെന്ന് മോഹൻലാൽ. ചിത്രത്തിലെ പൂതനാമോക്ഷം അവതരണത്തിന് ജീവൻ നൽകിയത് അന്നത്തെ 92 വയസ്സുള്ള കഥകളി ആചാര്യന്റെ നിർദ്ദേശങ്ങളാണെന്ന് അദ്ദേഹം വെളിപ്പെടുത്തി. ദാദാ സാഹിബ് ഫാൽക്കെ പുരസ്കാരം ഏറ്റുവാങ്ങിയ ശേഷം നൽകിയ അഭിമുഖത്തിലാണ് മോഹൻലാൽ ഇക്കാര്യങ്ങൾ വ്യക്തമാക്കിയത്.
'ലാൽ, മദ്ദളത്തിൽ വായിച്ചു കേൾക്കുന്ന ഭാവങ്ങൾ മുഖത്ത് കൊണ്ടുവരാൻ ശ്രമിക്കൂ' എന്ന കഥകളി ഗുരുവിൻ്റെ വാക്കുകളാണ് ആ രംഗത്തെ അനശ്വരമാക്കാൻ തനിക്ക് ഊർജ്ജം നൽകിയതെന്ന് മോഹൻലാൽ പറയുന്നു. 'കർണഭാരം' എന്ന സംസ്കൃത നാടകത്തിന് വെറും എട്ട് ദിവസങ്ങൾ കൊണ്ട് തയ്യാറെടുത്തതിനെക്കുറിച്ചും അദ്ദേഹം സംസാരിച്ചു. ആരാധകരുടെ മനസ്സിൽ ഇന്നും നിറഞ്ഞുനിൽക്കുന്ന മോഹൻലാലിൻ്റെ മികച്ച പ്രകടനങ്ങളെക്കുറിച്ചുള്ള ഓർമ്മകളും അദ്ദേഹം പങ്കുവെച്ചു.
'വാനപ്രസ്ഥം' താൻ നിർമ്മിച്ച ചിത്രമാണെന്നും ഫ്രഞ്ച് സഹകരണത്തോടെയുള്ള ആദ്യ ഇന്ത്യൻ ചലച്ചിത്ര നിർമ്മാണ സംരംഭമായിരുന്നു അതെന്നും മോഹൻലാൽ പറഞ്ഞു. കാൻ ചലച്ചിത്രോത്സവത്തിൽ ദേശീയ പതാക ഉയർത്തിയതും ദേശീയ ഗാനം കേട്ടതും ഏറെ അഭിമാനകരമായ നിമിഷങ്ങളായി അദ്ദേഹം ഓർക്കുന്നു. കഥകളി മഹത്തായതും ത്രിമാന സ്വഭാവമുള്ളതുമായ കലാരൂപമാണെന്നും മികച്ച കലാകാരനാകാൻ 40 വർഷത്തെ പരിശീലനം വേണ്ടിവരുമെന്നും അദ്ദേഹം കൂട്ടിച്ചേർത്തു.
'വാനപ്രസ്ഥ'ത്തിൽ താനൊഴികെ മറ്റെല്ലാവരും യഥാർത്ഥ കഥകളി കലാകാരന്മാരായിരുന്നുവെന്നും അവരുടെ സൂക്ഷ്മമായ തിരുത്തലുകൾ തനിക്ക് വലിയ സഹായമായെന്നും അദ്ദേഹം പറഞ്ഞു. രാവണൻ, അർജുനൻ, ഹനുമാൻ തുടങ്ങി പല വേഷങ്ങളും താൻ കെട്ടി എന്നും, അത് ധൈര്യപൂർവ്വമുള്ള കാര്യമാണെന്നും മോഹൻലാൽ കൂട്ടിച്ചേർത്തു.
