'എല്ലാ മുഖങ്ങളിലും സന്തോഷം, നിറഞ്ഞ ചിരി..', ആർത്തുവിളിച്ചും കയ്യടിച്ചും വിദ്യാർഥികൾ; ജോർജുകുട്ടിയായി സ്‌കൂളിലെത്തിയ മോഹൻലാലിനെ വരവേറ്റ് കുരുന്നുകൾ; വൈറലായി വീഡിയോ
തൃപ്പൂണിത്തറ: 'ദൃശ്യം' സിനിമയിലെ ജോർജുകുട്ടി എന്ന കഥാപാത്രത്തിൻ്റെ ലുക്കിൽ തൃപ്പൂണിത്തറയിലെ ഭവൻസ് മുൻഷി വിദ്യാശ്രമം സ്കൂളിലെ വിദ്യാർത്ഥികളെ സന്ദർശിച്ച മോഹൻലാലിന്റെ വീഡിയോ സാമൂഹമാധ്യമങ്ങളിൽ വൈറൽ. വിദ്യാർത്ഥികൾ ആവേശഭരിതരാകുകയും നിറഞ്ഞ കൈയ്യടികളോടെയും ആർപ്പുവിളികളോടെയും താരത്തെ സ്വീകരിക്കുകയുമായിരുന്നു.
ആശിർവാദ് സിനിമാസാണ് ഈ ഹൃദ്യമായ നിമിഷങ്ങൾ പകർത്തിയ വീഡിയോ പങ്കുവെച്ചത്. വീഡിയോയിൽ, തന്നെ കാണാനായി ഓടിയെത്തുന്ന വിദ്യാർത്ഥികളെ മോഹൻലാൽ സ്നേഹത്തോടെ അഭിവാദ്യം ചെയ്യുന്നതും കാണാം. കുട്ടികളുടെ മുഖങ്ങളിലെ സന്തോഷവും നിറഞ്ഞ ചിരിയും ഈ കൂടിക്കാഴ്ചയുടെ പ്രത്യേകതയായി ചൂണ്ടിക്കാണിക്കുന്നു. കുട്ടികളിലൊരാൾ "ലാലേട്ടാ" എന്ന് വിളിക്കുന്ന ശബ്ദവും വീഡിയോയിൽ ഉൾപ്പെടുത്തിയിട്ടുണ്ട്.
സമൂഹമാധ്യമങ്ങളിൽ ഈ വീഡിയോക്ക് മികച്ച പ്രതികരണമാണ് ലഭിക്കുന്നത്. കുട്ടികളുടെ സന്തോഷം കണ്ട് സന്തോഷം പ്രകടിപ്പിക്കുന്നതായും, മോഹൻലാൽ എല്ലാ തലമുറകളുടെയും നായകനാണെന്നും ആരാധകർ കമന്റ് ചെയ്യുന്നു. 'ദൃശ്യം 3' യുടെ ചിത്രീകരണം അണിയറയിൽ പുരോഗമിക്കുന്നതിനിടയിലാണ് മോഹൻലാലിൻ്റെ ഈ സ്കൂൾ സന്ദർശനം. 'ദൃശ്യം' മൂന്നാം ഭാഗത്തിൽ ജോർജുകുട്ടി എന്ന കഥാപാത്രത്തിനുണ്ടാകുന്ന മാറ്റങ്ങൾ അവതരിപ്പിക്കുമെന്ന് സംവിധായകൻ ജീത്തു ജോസഫ് നേരത്തെ വ്യക്തമാക്കിയിരുന്നു.
