റിലീസിനൊരുങ്ങി മുഹമ്മദ് മുസ്തഫ ചിത്രം; യുവ താരം ഹൃദു ഹറൂണിനൊപ്പം സുരാജ് വെഞ്ഞാറമൂടും; ആക്ഷൻ ഡ്രാമ ചിത്രം 'മുറ' നവംബർ 8 ന് തിയറ്ററുകളിലെത്തും
ആക്ഷൻ ചിത്രങ്ങൾക്ക് വലിയ ആരാധകരുള്ള സിനിമ ഇൻഡസ്ട്രയിയാണ് മോളിവുഡ്. 'കപ്പേള' എന്ന ചിത്രത്തിന് ശേഷം മുഹമ്മദ് മുസ്തഫ സംവിധാനം ചെയ്യുന്ന ആക്ഷൻ ഡ്രാമ ചിത്രമാണ് 'മുറ'. ട്രെയ്‌ലർ എത്തിയത് മുതൽ വലിയ പ്രതീക്ഷയാണ് ചിത്രത്തിൽ പ്രേക്ഷകർ പ്രകടിപ്പിച്ചത്. യുവ താരം ഹൃദു ഹറൂണും സുരാജ് വെഞ്ഞാറമൂടും മാല പാർവതിയും കേന്ദ്ര കഥാപാത്രങ്ങളായെത്തുന്ന ചിത്രത്തിന്റെ റിലീസ് തീയതി പുറത്ത് വിട്ടിരിക്കുകയാണ് അണിയറ പ്രവർത്തകർ. എച്ച് ആർ പിക്ചേഴ്‌സിന്റെ ബാനറിൽ റിയ ഷിബുവാണ് 'മുറ' നിർമ്മിച്ചിരിക്കുന്നത്. ചിത്രം നവംബർ 8 ന് തിയറ്ററുകളിലെത്തും.
നേരത്തെ, വിജയ് സേതുപതി, എസ് ജെ സൂര്യ, ടൊവിനോ തോമസ്, നസ്രിയ, ദുഷാര വിജയൻ തുടങ്ങി നിരവധി താരങ്ങൾ ചേർന്ന് മുറയുടെ ട്രെയ്‌ലർ സോഷ്യൽ മീഡിയയിലൂടെ റിലീസ് ചെയ്തിരുന്നു. ചിത്രത്തിന്റെ റിലീസ് ചെയ്ത ടീസറും ഗാനങ്ങളും സോഷ്യൽ മീഡിയയിൽ നേരത്തെ തന്നെ വലിയ ചർച്ചയായിരുന്നു. കനി കുസൃതി, കണ്ണൻ നായർ, ജോബിൻ ദാസ്, അനുജിത് കണ്ണൻ, യെദു കൃഷ്ണ, വിഘ്‌നേശ്വർ സുരേഷ്, കൃഷ് ഹസ്സൻ, സിബി ജോസഫ് എന്നിവരാണ് മുറയിലെ മറ്റു പ്രധാന വേഷങ്ങളിലെത്തുന്നത്.
ഉപ്പും മുളകും ഫെയിം സുരേഷ് ബാബുവാണ് ചിത്രത്തിന്റെ രചന നിർവഹിക്കുന്നത്. ഫാസിൽ നാസർ ഛായാഗ്രഹണം നിർവഹിക്കുന്ന ചിത്രത്തിന്റെ എഡിറ്റിംഗ് ചമൻ ചാക്കോയാണ്. ചിത്രത്തിനായി സംഗീതം ഒരുക്കിയിരിക്കുന്നത് ക്രിസ്റ്റി ജോബിയാണ്. കലാസംവിധാനം ശ്രീനു കല്ലേലിൽ, മേക്കപ്പ് റോണെക്സ് സേവ്യർ, വസ്ത്രാലങ്കാരം നിസാർ റഹ്‍മത്ത്, ആക്ഷൻ പി സി സ്റ്റണ്ട്സ്, പ്രൊഡക്ഷൻ കൺട്രോളർ ജിത്ത് പിരപ്പൻകോട്, പി ആർ ഒ ആൻഡ് മാർക്കറ്റിംഗ് കൺസൾട്ടന്റ് പ്രതീഷ് ശേഖർ. എക്സിക്യൂട്ടീവ് പ്രൊഡ്യൂസർ റോണി സക്കറിയ എന്നിവരാണ്.
