'പഞ്ചസാര വേണ്ടെന്നു വച്ചെങ്കിലും പണം ഞാന്‍ വേണ്ടെന്നു വച്ചിട്ടില്ല; ആര്‍ക്കാണു പണം ആവശ്യമില്ലാത്തത്; തോന്നിയത് വിളിച്ചുപറയാമായിരുന്നു, പക്ഷേ ചെയ്തില്ല; ചാഹലിന്റെ 'ഷുഗര്‍ ഡാഡി'ടീ ഷര്‍ട്ടിന് മറുപടിയുമായി വീണ്ടും ധനശ്രീ വര്‍മ
ചാഹലിന്റെ 'ഷുഗര്‍ ഡാഡി'ടീ ഷര്‍ട്ടിന് മറുപടിയുമായി വീണ്ടും ധനശ്രീ വര്‍മ
മുംബൈ: ഇന്ത്യന്‍ ക്രിക്കറ്റ് താരം യുസ്വേന്ദ്ര ചെഹലുമായുള്ള വിവാഹമോചനത്തെക്കുറിച്ചു വീണ്ടും പ്രതികരിച്ച് ഇന്‍ഫ്‌ലുവന്‍സറും മോഡലുമായ ധനശ്രീ വര്‍മ. ഉത്തരവാദിത്തമുള്ളതുകൊണ്ടാണ് മുന്‍ പങ്കാളിക്കെതിരെ ഒന്നും വിളിച്ചുപറയാതിരുന്നതെന്നു ധനശ്രീ ഒരു റിയാലിറ്റി ഷോയില്‍ പ്രതികരിച്ചു. കുടുംബമെന്ന സ്ഥാപനത്തോടു ബഹുമാനമുണ്ടെന്നും അതുകൊണ്ടാണ് ആരോപണങ്ങളില്‍ ഒന്നും മിണ്ടാതിരിക്കുന്നതെന്നും ധനശ്രീ വ്യക്തമാക്കി. വിവാഹമോചനക്കേസില്‍ വിധി പറയുന്ന ദിവസം യുസ്വേന്ദ്ര ചാഹല്‍ ഷുഗര്‍ ഡാഗി പരാമര്‍ശമുള്ള ടീ ഷര്‍ട്ട് ധരിച്ച് കുടുംബ കോടതയിലിയെത്തിയതിനെക്കുറിച്ചാണ് റൈസ് ആന്‍ഡ് ഫോള്‍ റിയാലിറ്റി ഷോയില്‍ പങ്കെടുക്കുന്ന ധനശ്രീ മനസുതുറന്നത്.
''വിവാഹം കഴിഞ്ഞാല്‍ പങ്കാളിയോട് എപ്പോഴും ഉത്തരവാദിത്തവും ബഹുമാനവും വേണം. അങ്ങനെയാണു ഞാന്‍ കരുതുന്നത്. എനിക്ക് തോന്നിയതുപോലെ എന്തും വിളിച്ചു പറയാമായിരുന്നു. പക്ഷേ അതു ചെയ്തില്ല.'' ധനശ്രീ പ്രതികരിച്ചു. വിവാഹ മോചനം നേടിയെങ്കിലും അദ്ദേഹം എന്റെ ഭര്‍ത്താവായിരുന്ന ആളായിരുന്നു. അദ്ദേഹത്തോട് ഇപ്പോഴും ബഹുമാനമുണ്ട്. കോടതിയില്‍ അദ്ദേഹം ഷുഗര്‍ ഡാഡി എന്ന ടി ഷര്‍ട്ട് ധരിച്ചതിനെക്കുറിച്ചാണെങ്കില്‍ പഞ്ചസാര എനിക്ക് ഇഷ്ടമല്ലെന്ന് എല്ലാവര്‍ക്കും അറിയാം. പഞ്ചസാര വേണ്ടെന്നു വച്ചെങ്കിലും പണം ഞാന്‍ വേണ്ടെന്നുവച്ചിട്ടില്ല. കാരണം പണം ജീവിതത്തില്‍ വളരെ പ്രധാനപ്പെട്ടതാണ്. ആര്‍ക്കാണു പണം ആവശ്യമില്ലാത്തത്.'' ധനശ്രീ വ്യക്തമാക്കി.
ഒരുപാട് ആളുകളുമായി ബന്ധപ്പെടുത്തി തന്റെ പേര് ഉയര്‍ന്നു കേള്‍ക്കാറുണ്ടെന്നും അതിലൊന്നും ഒരു കാര്യവുമില്ലെന്നും ധനശ്രീ പറഞ്ഞു. ചെഹല്‍ ഇപ്പോഴും മെസേജുകള്‍ അയക്കാറുണ്ടെന്നും മാ എന്നാണു തന്നെ വിളിക്കാറെന്നും ധനശ്രീ കഴിഞ്ഞ ദിവസം പ്രതികരിച്ചിരുന്നു. വിവാഹമോചനത്തിന്റെ ഭാഗമായി ചെഹല്‍ ധനശ്രീക്ക് നാലു കോടി രൂപ ജീവനാംശമായി നല്‍കിയിരുന്നെന്നാണു റിപ്പോര്‍ട്ടുകള്‍.
ചാഹലിന്റെയും ധനശ്രീയുടെയും വിവാഹമോചന ഹര്‍ജിയില്‍ കുടുംബകോടതി വിധി പറയുന്ന ദിവസം 'Be Your Own Sugar Daddy' എന്നെഴുതിയ ടീ ഷര്‍ട്ട് ധരിച്ചായിരുന്നു ചാഹല്‍ കോടതി മുറിയിലെത്തിയത്. ഇതിലൂടെ ധനശ്രീക്ക് ഒരു സന്ദേശം നല്‍കാനാണ് താന്‍ ഉദ്ദേശിച്ചതെന്ന് പിന്നീട് ചാഹല്‍ ഒരു പോഡ്കാസ്റ്റില്‍ വെളിപ്പെടുത്തിയിരുന്നു. 2020ല്‍ വിവാഹിതരായ ചാഹലും ധനശ്രീയും ഈ വര്‍ഷം ഫെബ്രുവരി അഞ്ചിനാണ് പരസ്പര സമ്മതത്തോടെ ബാന്ദ്ര കുടുംബ കോടതിയില്‍ വിവാഹമോചന ഹര്‍ജി നല്‍കിയത്. കഴിഞ്ഞ വര്‍ഷം നടന്ന ടി20 ലോകകപ്പില്‍ ടീമിലുണ്ടായിരുന്ന ചാഹല്‍ പിന്നീട് ടീമില്‍ നിന്ന് പുറത്തായി. ദീര്‍ഘനാളായി ഇന്ത്യന്‍ ടീമിലില്ലാത്ത ചാഹലിപ്പോള്‍ കൗണ്ടി ക്രിക്കറ്റില്‍ കളിക്കുകയാണ്.
