'പാതിരാത്രി'യുടെ ഓഡിയോ ലോഞ്ച് കഴിഞ്ഞ് മടങ്ങവെ മാളില്‍ നവ്യയോട് മോശം പെരുമാറ്റം; സമയോചിതമായി ഇടപെട്ട് സൗബിന്‍; രൂക്ഷമായി പ്രതികരിച്ച് നടിയും
കോഴിക്കോട്: പുതിയ ചിത്രമായ 'പാതിരാത്രി' പ്രമോഷന്റെ ഭാഗമായി കോഴിക്കോട് മാളില്‍ എത്തിയ നടി നവ്യ നായരോട് മോശമായി പെരുമാറാന്‍ ശ്രമിച്ച ആളെ തടഞ്ഞ് നടന്‍ സൗബിന്‍ ഷാഹിര്‍. ശനിയാഴ്ച വൈകുന്നേരം മാളില്‍ നടന്ന പ്രമോഷന്‍ പരിപാടിക്ക് ശേഷം ഹോട്ടലിലേക്ക് മടങ്ങുന്നതിനിടെയാണ് സംഭവം. താരങ്ങളെ കാണാനായി വലിയ തിരക്കായിരുന്നു മാളില്‍ അനുഭവപ്പെട്ടത്. ഈ തിരക്കിനിടെ ഒരാള്‍ നവ്യ നായരെ സ്പര്‍ശിക്കാന്‍ ശ്രമിക്കുകയായിരുന്നു. നവ്യയ്ക്ക് നേരെ നീണ്ട കൈ സൗബിന്‍ സാഹിര്‍ ഉടന്‍ തന്നെ തടയുകയും നവ്യയെ സുരക്ഷിതമായി മുന്നോട്ട് നടക്കാന്‍ സഹായിക്കുകയും ചെയ്തു. ചടങ്ങിന് ശേഷമുള്ള വീഡിയോയാണ് ഇപ്പോള്‍ ചര്‍ച്ചയാവുന്നത്. ചടങ്ങില്‍ പങ്കെടുത്തു മടങ്ങുന്ന നവ്യാ നായര്‍ക്കുനേരെ ഒരു കൈ നീണ്ടുവരുന്നതും സൗബിന്‍ ഷാഹിര്‍ അത് തട്ടിമാറ്റുന്നതും വീഡിയോയില്‍ കാണാം.
അപ്രതീക്ഷിതമായി തനിക്ക് നേരെ അതിക്രമം ഉണ്ടായപ്പോള്‍ രൂക്ഷമായ ഒരു നോട്ടത്തോടെയാണ് നവ്യ നായര്‍ പ്രതികരിച്ചത്. നടി ആന്‍ അഗസ്റ്റിനും പ്രമോഷന്‍ പരിപാടിക്കായി താരങ്ങള്‍ക്കൊപ്പം ഉണ്ടായിരുന്നു. പൊതുപരിപാടികള്‍ക്ക് എത്തുന്ന സിനിമാ താരങ്ങള്‍ക്ക് നേരെ, പ്രത്യേകിച്ച് നടിമാര്‍ക്ക് നേരെ, മോശം അനുഭവങ്ങള്‍ ഉണ്ടാകുന്നത് സമീപകാലത്ത് പതിവായി മാറിയിട്ടുണ്ട്. സുരക്ഷാ ജീവനക്കാര്‍ ഒപ്പമുണ്ടെങ്കില്‍ പോലും ചെറിയൊരു ഇടവേള കിട്ടുമ്പോള്‍ താരങ്ങളെ സ്പര്‍ശിക്കാനോ ശല്യപ്പെടുത്താനോ ചിലര്‍ ശ്രമിക്കാറുണ്ട്.
താരങ്ങള്‍ മടങ്ങുമ്പോഴുള്ള തിരക്കിനിടെ നടിയെ ഒരാള്‍ സ്പര്‍ശിക്കാന്‍ ശ്രമിക്കുകയായിരുന്നു. നവ്യയ്ക്കുനേരെ നീണ്ട കൈ സൗബിന്‍ തടഞ്ഞു. തന്നെ സ്പര്‍ശിക്കാന്‍ ശ്രമിച്ച ആളെ രൂക്ഷമായി നടി നോക്കുന്നതായി വീഡിയോയില്‍ കാണാം. സൗബിനും നവ്യയ്ക്കും പുറമേ, ചിത്രത്തില്‍ പ്രധാനവേഷങ്ങളിലെത്തിയ ആന്‍ അഗസ്റ്റിന്‍, ആത്മീയ തുടങ്ങിയവും സംവിധായിക റത്തീനയും രചയിതാവ് ഷാജി മാറാടും ചടങ്ങിനെത്തിയിരുന്നു.
നവ്യ നായരെയും സൗബിന്‍ ഷാഹിറിനെയും കേന്ദ്ര കഥാപാത്രങ്ങളാക്കി റത്തീന സംവിധാനം ചെയ്യുന്ന ചിത്രമാണ് 'പാതിരാത്രി'. മമ്മൂട്ടി നായകനായ 'പുഴു'വിനു ശേഷം റത്തീന സംവിധാനം ചെയ്യുന്ന ചിത്രമാണിത്. 'പാതിരാത്രി'യില്‍ സണ്ണി വെയ്ന്‍, ആന്‍ അഗസ്റ്റിന്‍ എന്നിവരും നിര്‍ണ്ണായക വേഷങ്ങളില്‍ എത്തുന്നുണ്ട്. ഡോക്ടര്‍ കെ വി അബ്ദുള്‍ നാസര്‍, ആഷിയ നാസര്‍ എന്നിവര്‍ ചേര്‍ന്ന് ബെന്‍സി പ്രൊഡക്ഷന്‍സിന്റെ ബാനറിലാണ് ചിത്രം നിര്‍മിക്കുന്നത്. ചിത്രം ഒക്ടോബര്‍ 17ന് തിയറ്ററുകളില്‍ റിലീസിനെത്തും.
