കടുക്കനിട്ട്, ഡബിള് പോക്കറ്റ് ഷര്ട്ട് ധരിച്ച് ചിരിച്ചു നില്ക്കുന്ന കാരിക്കാമുറി ഷണ്മുഖന്; 22 വര്ഷങ്ങള്ക്കുശേഷം തിരിച്ചുവരവ്; രഞ്ജിത്ത് ചിത്രത്തില് അതിഥി വേഷത്തില് മമ്മൂട്ടി; നായകന് പ്രകാശ് വര്മ
കൊച്ചി: കടുക്കനിട്ട്, ഡബിള് പോക്കറ്റ് ഷര്ട്ട് ധരിച്ച് ചിരിച്ചുകൊണ്ട് നില്ക്കുന്ന ആ ചിത്രം കണ്ട മമ്മൂട്ടി ആരാധകര്ക്ക് ഒരു സംശയം, അത് കാരിക്കാമുറി ഷണ്മുഖന് അല്ല, ഒടുവില് ഉറപ്പിച്ചു. 'ബ്ലാക്കി'ലെ നായക കഥാപാത്രം തിരിച്ചുവരുന്നു. ഇത്തവണ അതിഥി വേഷത്തിലാണ് മമ്മൂട്ടി എത്തുന്നത്. 'തുടരും' എന്ന ചിത്രത്തിലെ ജോര്ജ് സാറിനെ അവതരിപ്പിച്ച് കയ്യടി നേടിയ പ്രകാശ് വര്മയെ കേന്ദ്ര കഥാപാത്രമാക്കി രഞ്ജിത്ത് സംവിധാനം ചെയ്യുന്ന ചിത്രത്തിലാണ് ഷണ്മുഖനായി മമ്മൂട്ടി വീണ്ടും എത്തുക. 22 വര്ഷങ്ങള്ക്കുശേഷമാണ് കാരിക്കാമുറി ഷണ്മുഖന് തിരിച്ചുവരുന്നത്.
മമ്മൂട്ടിയുടെ ഭാഗങ്ങളുടെ ചിത്രീകരണം കൊച്ചിയില് തുടങ്ങി. കോട്ടയം സിഎംഎസ് കോളജും ഒരു ലൊക്കേഷനാണ്. അഞ്ച് ദിവസത്തോളം മമ്മൂട്ടി ഈ സിനിമയുടെ ഭാഗമാകും. 'ചത്താ പച്ച'യ്ക്കുശേഷം മമ്മൂട്ടി അതിഥി വേഷത്തിലെത്തുന്ന സിനിമ കൂടിയാണിത്. മമ്മൂട്ടിയെ നായകനാക്കി 2004 ല് രഞ്ജിത്ത് സംവിധാനം ചെയ്ത ചിത്രം 'ബ്ലാക്കി'ലെ നായക കഥാപാത്രത്തിന്റെ പേരായിരുന്നു കാരിക്കാമുറി ഷണ്മുഖന്. മമ്മൂട്ടിയുടെ കരിയറിലെ സ്റ്റൈലിഷ് കഥാപാത്രങ്ങളിലൊന്നായിരുന്നു ഇത്. അമല് നീരദ് ആദ്യമായി സ്വതന്ത്ര ഛായാഗ്രാഹകനായതും ഈ ചിത്രത്തിലാണ്.
അതേസമയം ഈ രഞ്ജിത്ത് ചിത്രം കൊച്ചിയിലെ പൊലീസുകാരുടെ കഥയാണ് പറയുന്നത്. പ്രകാശ് വര്മയ്ക്കൊപ്പം പുതുമുഖങ്ങളാണ് ചിത്രത്തിലെ മറ്റ് പ്രധാന കഥാപാത്രങ്ങളെ അവതരിപ്പിക്കുന്നത്. അഭിരാമിയും സിദ്ധിഖും ആണ് മറ്റു പ്രധാന വേഷങ്ങളില്. ഉദയകൃഷ്ണയാണ് ചിത്രത്തിന്റെ തിരക്കഥ ഒരുക്കുന്നത്. കോഡയറക്ടര് ശങ്കര് രാമകൃഷ്ണന്. പ്രശാന്ത് രവീന്ദ്രന് ആണ് ഛായാഗ്രഹണം. സത്യം സിനിമാസിന്റെ ബാനറില് എം.ജി. പ്രേമചന്ദ്രനും വര്ണ ചിത്രയുടെ ബാനറില് മഹാ സുബൈറും ചേര്ന്നാണ് നിര്മാണം
നീണ്ട എട്ട് വര്ഷങള്ക്കിപ്പുറം രഞ്ജിത്ത് സംവിധാനം ചെയ്യുന്ന ഫീച്ചര് ചിത്രമായിരിക്കും ഇത്. മോഹന്ലാലിനെ നായകനാക്കി 2018ല് സംവിധാനം ചെയ്ത 'ഡ്രാമ' എന്ന ചിത്രത്തിന് ശേഷം രഞ്ജിത്തിന്റേതായി ഫീച്ചര് ലെങ്ത് ചിത്രങ്ങളൊന്നും എത്തിയിട്ടില്ല. അതേസമയം എം.ടി. വാസുദേവന് നായരുടെ രചനകളെ ആസ്പദമാക്കി തയ്യാറാക്കപ്പെട്ട ആന്തോളജിയിലെ ഒരു ലഘുചിത്രം രഞ്ജിത്തിന്റേതായിരുന്നു. കടുഗണ്ണാവ ഒരു യാത്ര കുറിപ്പ് എന്ന ചിത്രത്തില് കേന്ദ്ര കഥാപാത്രത്തെ അവതരിപ്പിച്ചത് മമ്മൂട്ടി ആയിരുന്നു.
കഴിഞ്ഞ വര്ഷം ശ്യാമപ്രസാദ്, മഞ്ജു വാരിയര് എന്നിവരെ കഥാപാത്രങ്ങളാക്കി രഞ്ജിത്ത് സംവിധാനം ചെയ്ത 'ആരോ' എന്ന ഹ്രസ്വ ചിത്രം നിര്മ്മിച്ചത് മമ്മൂട്ടി ആയിരുന്നു. മമ്മൂട്ടി കമ്പനിയുടെ യുട്യൂബ് ചാനലിലൂടെയാണ് ഈ ചിത്രം എത്തിയത്.
അര്ജുന് അശോകന്, റോഷന് മാത്യു, വിശാഖ് നായര്, ഇഷാന് ഷൗക്കത്ത് എന്നിവര് പ്രധാനവേഷങ്ങളിലെത്തുന്ന ചത്താ പച്ച എന്ന ചിത്രത്തില് മമ്മൂട്ടി അതിഥി വേഷത്തിലുണ്ട്. ഇന്ത്യയില് ആദ്യമായി WWE ആസ്പദമാക്കി ഒരുങ്ങുന്ന ചിത്രമാണ് ചത്താ പച്ച. ഇതുവരെ കാണാത്ത ഗംഭീര ഗെറ്റപ്പിലാകും മമ്മൂട്ടി ഈ ചിത്രത്തില് പ്രത്യക്ഷപ്പെടുക. ജനുവരി 22ന് ചിത്രം തിയേറ്ററുകളിലെത്തും.
