'വിദ്യ ബാലനും ഞാനും അടുത്ത ബന്ധുക്കൾ, പക്ഷെ ഞങ്ങൾ പൊതുവെ സംസാരിക്കാറില്ല, അത്തരമൊരു കണക്ഷൻ ഞങ്ങൾക്കിടയിലില്ല'; സ്‌ക്രീനിൽ താരത്തെ ഒരുപാട് മിസ് ചെയ്യുന്നുവെന്നും പ്രിയാമണി
കൊച്ചി: ബോളിവുഡ് നടി വിദ്യ ബാലനും താനും അടുത്ത ബന്ധുക്കളാണെങ്കിലും, തമ്മിൽ സംസാരിക്കാനുള്ള ബന്ധം തങ്ങൾക്കിടയിൽ ഇല്ലെന്നും നടി പ്രിയാമണി. സി.എൻ.എൻ ന്യൂസ് 18ന് നൽകിയ അഭിമുഖത്തിലാണ് പ്രിയാമണി ഇക്കാര്യം വ്യക്തമാക്കിയത്. ഇരുവർക്കും മുത്തച്ഛന്മാർ സഹോദരങ്ങളാണെന്നും, കുടുംബബന്ധം നിലവിലുണ്ടെങ്കിലും വ്യക്തിപരമായ അടുപ്പം തങ്ങൾ തമ്മിൽ ഇല്ലെന്നും അവർ കൂട്ടിച്ചേർത്തു.
'ഞങ്ങൾ പൊതുവെ സംസാരിക്കാറില്ല. ബന്ധുക്കളാണെങ്കിലും അത്തരമൊരു കണക്ഷൻ ഞങ്ങൾക്കിടയിലില്ല,' പ്രിയാമണി പറഞ്ഞു. വിദ്യയുടെ അച്ഛൻ ബാലൻ അങ്കിളുമായിട്ടാണ് താൻ കൂടുതൽ സംസാരിക്കുന്നതെന്നും, ചില സന്ദർഭങ്ങളിൽ അദ്ദേഹം തന്റെ പിതാവിനെ വിളിച്ച് കാര്യങ്ങൾ തിരക്കാറുണ്ടെന്നും അവർ കൂട്ടിച്ചേർത്തു. വിദ്യ ബാലൻ ഒരു മികച്ച നടിയാണെന്നും, അവരുടെ തിരിച്ചുവരവിനായി ആകാംക്ഷയോടെ കാത്തിരിക്കുകയാണെന്നും ഒരു പ്രേക്ഷക എന്ന നിലയിൽ അവരെ ഒരുപാട് മിസ് ചെയ്യുന്നുവെന്നും പ്രിയാമണി കൂട്ടിച്ചേർത്തു.
വിദ്യ ബാലൻ അവസാനമായി അഭിനയിച്ച ചിത്രം 2024-ൽ പുറത്തിറങ്ങിയ 'ഭൂൽ ഭുലയ്യ 3' ആണ്. അനീസ് ബസ്മി സംവിധാനം ചെയ്ത ഈ ചിത്രത്തിൽ കാർത്തിക് ആര്യൻ, മാധുരി ദീക്ഷിത്, തൃപ്തി ദിമ്രി എന്നിവരും പ്രധാന വേഷങ്ങളിൽ അഭിനയിച്ചു. ഈ ചിത്രം ബോക്സ് ഓഫീസ് വിജയകരമായി പ്രദർശിപ്പിക്കുകയും 389.28 കോടി രൂപ കളക്ഷൻ നേടുകയും ചെയ്തു. വിദ്യയുടെ പുതിയ പ്രോജക്റ്റുകളെക്കുറിച്ച് ഇതുവരെ ഔദ്യോഗിക വിവരങ്ങളൊന്നും പുറത്തുവന്നിട്ടില്ല.
പ്രിയമണിയുടെ അവസാനമായി പുറത്തിറങ്ങിയ ചിത്രം കുഞ്ചാക്കോ ബോബൻ നായകനായ ആക്ഷൻ ത്രില്ലർ 'ഓഫീസർ ഓൺ ഡ്യൂട്ടി' ആണ്. എച്ച്. വിനോദ് സംവിധാനം ചെയ്യുന്ന 'ജൻ നായകൻ' എന്ന ചിത്രത്തിലാണ് പ്രിയാമണി അടുത്തതായി അഭിനയിക്കുന്നത്. വിജയ്, പൂജ ഹെഗ്‌ഡെ, ബോബി ഡിയോൾ എന്നിവർ പ്രധാന വേഷങ്ങളിൽ എത്തുന്ന ചിത്രം 2026 ജനുവരിയിൽ റിലീസ് ചെയ്യുമെന്നാണ് റിപ്പോർട്ടുകൾ.
