അവനെ കണ്ടപ്പോൾ തന്നെ...എന്റെ മനസ്സിൽ എന്തൊക്കെയോ തോന്നി; ആളൊരു സര്വൈവര് ആണ്; അങ്ങനെ മറക്കാൻ പറ്റാത്ത കുറെ നിമിഷങ്ങൾ; തുറന്നുപറഞ്ഞ് രഞ്ജിനി
പ്രമുഖ ടെലിവിഷൻ അവതാരക രഞ്ജിനി ഹരിദാസ് തൻ്റെ പ്രിയപ്പെട്ട വളർത്തുനായ റിക്കിയെക്കുറിച്ച് വികാരാധീനയായി വെളിപ്പെടുത്തലുകൾ നടത്തി. ആസിഡ് ആക്രമണത്തെയും അണലി കടിയേയും അതിജീവിച്ച റിക്കി ഇപ്പോൾ വാർധക്യസഹജമായ ബുദ്ധിമുട്ടുകളിലൂടെ കടന്നുപോവുകയാണെന്നും, തൻ്റെ ജീവിതത്തിൽ റിക്കി ചെലുത്തിയ സ്വാധീനം വലുതാണെന്നും രഞ്ജിനി പറയുന്നു.
മനുഷ്യരുമായിട്ടുള്ളതിനേക്കാൾ മൃഗങ്ങളോട് തനിക്ക് ആഴത്തിലുള്ള ബന്ധമുണ്ടെന്ന് രഞ്ജിനി ഹരിദാസ് ഒരു വീഡിയോയിലൂടെ വ്യക്തമാക്കി. 2012-ൽ താൻ റിക്കിയെ ദത്തെടുക്കുകയായിരുന്നു. ആസിഡ് ആക്രമണത്തിന് ഇരയായി 60 ശതമാനം പൊള്ളലുകളോടെ കൊച്ചിയിലെ ഒരു ആശുപത്രിയിൽ ചികിത്സയിൽ കഴിയുന്ന ഒരു നായയെക്കുറിച്ച് പത്രത്തിൽ വന്ന വാർത്ത കണ്ടാണ് രഞ്ജിനി ആശുപത്രിയിൽ എത്തുന്നത്. പ്രദീപ് എന്നയാളാണ് റിക്കിയെ അന്ന് രക്ഷപ്പെടുത്തിയത്. സംഭവം നടന്ന് അഞ്ച് മാസങ്ങൾക്ക് ശേഷമാണ് രഞ്ജിനി റിക്കിയെ കാണുന്നത്. അന്ന് ഒന്നോ രണ്ടോ വയസ്സ് പ്രായം തോന്നിക്കുന്ന റിക്കിയെ കണ്ടപ്പോൾ തന്നെ ദത്തെടുക്കാൻ തീരുമാനിക്കുകയായിരുന്നുവെന്ന് രഞ്ജിനി പറയുന്നു.
അതുല്യമായ അതിജീവനത്തിൻ്റെ ഓർമ്മയ്ക്കായി ഡോക്ടറാണ് 'റിക്കവറി' എന്നതിൻ്റെ ചുരുക്കരൂപമായ 'റിക്കി' എന്ന് പേര് നൽകിയത്. ആസിഡ് ആക്രമണത്തെ അതിജീവിച്ചതിന് പിന്നാലെ, ഒരു ദിവസം റിക്കിയെ അണലി കടിക്കുകയുണ്ടായി. ചെന്നൈയിൽ കൊണ്ടുപോയി ഡയാലിസിസ് നടത്തിയാണ് റിക്കി അന്ന് മരണത്തെ അതിജീവിച്ചത്. ഈ സംഭവങ്ങളെല്ലാം റിക്കിയിലൂടെ താൻ കണ്ട അത്ഭുതങ്ങളായി രഞ്ജിനി ഓർമ്മിക്കുന്നു.
ഇപ്പോൾ ഏകദേശം 16 വയസ്സുള്ള റിക്കിക്ക് വാർധക്യസഹജമായ ബുദ്ധിമുട്ടുകളുണ്ട്. കഴിഞ്ഞ 14 വർഷമായി തനിക്കൊപ്പമുള്ള റിക്കിക്ക് ഡിമെൻഷ്യയും കേൾവിശക്തി കുറവും നടക്കാൻ പ്രയാസവുമുണ്ട്. കഴിഞ്ഞ ഒരു മാസമായി റിക്കി സ്വയം ഭക്ഷണം കഴിക്കാത്തതിനാൽ രഞ്ജിനിയുടെ അമ്മയാണ് അവന് ഭക്ഷണം വാരിക്കൊടുക്കുന്നത്. തൻ്റെ "ആദ്യ പ്രണയം" എന്നും ജീവിതത്തിലെ ഏറ്റവും വലിയ പ്രചോദനം എന്നും രഞ്ജിനി റിക്കിയെ വിശേഷിപ്പിക്കുന്നു. റിക്കിയാണ് തന്നെ മൃഗക്ഷേമ പ്രവർത്തനങ്ങളിലേക്ക് എത്തിച്ചതെന്നും തൻ്റെ ജീവിതം തന്നെ അവൻ മാറ്റിമറിച്ചെന്നും രഞ്ജിനി കൂട്ടിച്ചേർത്തു.
സാധാരണഗതിയിൽ താൻ അത്ര വികാരാധീനയാകാത്ത ആളാണെങ്കിലും, റിക്കിയുടെ കാര്യത്തിൽ അങ്ങനെയാകാൻ സാധിക്കുന്നില്ലെന്നും, ഇനിയും കുറച്ചുവർഷങ്ങൾ കൂടി അവൻ ജീവിച്ചിരിക്കണമെന്നാണ് തൻ്റെ ആഗ്രഹമെന്നും രഞ്ജിനി പങ്കുവെച്ചു.
