ഔട്ട്‌ഡോർ ഷൂട്ടിംഗിനിടെ ഏത് മുറിയിലാണ് താമസിക്കുന്നതെന്ന് ആർക്കും അറിയാതിരിക്കാനായി എല്ലാ ദിവസവും മുറികൾ മാറുമായിരുന്നു..; കാസ്റ്റിംഗ് കൗച്ച് അനുഭവങ്ങളെ കുറിച്ച് നടി രേണുക
സിനിമാരംഗത്തെ കാസ്റ്റിംഗ് കൗച്ച് അനുഭവത്തെക്കുറിച്ച് നടി രേണുക ഷഹാനെ നടത്തിയ വെളിപ്പെടുത്തൽ സിനിമാ ലോകത്ത് ചർച്ചകൾക്ക് വഴിവെച്ചിരിക്കുകയാണ്. സൂമിന് നൽകിയ അഭിമുഖത്തിലാണ് 'ഹം ആപ്കെ ഹേ കോൻ', 'ത്രിഭംഗ' തുടങ്ങിയ ചിത്രങ്ങളിലൂടെ ശ്രദ്ധേയയായ രേണുക തൻ്റെ കരിയറിൻ്റെ തുടക്കകാലത്ത് നേരിട്ട ദുരനുഭവം തുറന്നുപറഞ്ഞത്.
ഒരു പ്രമുഖ നിർമ്മാതാവ് വീട്ടിലെത്തി തനിക്ക് മുന്നിൽ വെച്ച പ്രലോഭനത്തെക്കുറിച്ചാണ് രേണുക വിവരിച്ചത്. വിവാഹിതനായിരുന്നിട്ടും, ഒരു സാരി കമ്പനിയുടെ ബ്രാൻഡ് അംബാസഡറാക്കാമെന്നും, കൂടാതെ തന്നോടൊപ്പം ജീവിക്കുന്നതിനായി എല്ലാ മാസവും സ്റ്റൈപ്പെൻഡ് നൽകാമെന്നുമായിരുന്നു നിർമ്മാതാവിൻ്റെ വാഗ്ദാനം. ഈ വാഗ്ദാനം കേട്ട് ഞെട്ടിപ്പോയെന്നും, അത് നിരസിച്ചപ്പോൾ ആ നിർമ്മാതാവ് മറ്റൊരാളെ സമീപിക്കുകയായിരുന്നു എന്നും നടി വെളിപ്പെടുത്തി. ഇത്തരം മോശം സമീപനങ്ങളെ എതിർക്കുന്നവർക്ക് വലിയ വില നൽകേണ്ടി വരുമെന്ന് രേണുക കൂട്ടിച്ചേർത്തു.
സിനിമാരംഗത്ത് ഇത്തരം അനുഭവങ്ങൾ നേരിട്ടവർക്ക് നീതി ലഭിക്കുന്നില്ലെന്നും, പലപ്പോഴും ആരോപണവിധേയർക്ക് തിരിച്ചുവരാൻ അവസരം ലഭിക്കുന്നുണ്ടെന്നും അവർ പറഞ്ഞു. ശക്തരായ ആളുകൾക്ക് എതിർക്കുന്നവരെ ഭീഷണിപ്പെടുത്താനും, സിനിമകളിൽ നിന്ന് ഒഴിവാക്കാനും സാധിക്കുമെന്നും, ചിലപ്പോൾ ജോലിക്കുള്ള പ്രതിഫലം പോലും നിഷേധിക്കുമെന്നും രേണുക കൂട്ടിച്ചേർത്തു. ഔട്ട്‌ഡോർ ഷൂട്ടിംഗിനിടെ ഏത് മുറിയിലാണ് താമസിക്കുന്നതെന്ന് ആർക്കും അറിയാതിരിക്കാനായി എല്ലാ ദിവസവും മുറികൾ മാറുമായിരുന്നുവെന്നും അവർ വ്യക്തമാക്കി.
