'സീനിയര് ചേട്ടനോട് ക്രഷായിരുന്നു, ഞാനതു പറഞ്ഞില്ല'; പകരം വേറൊരു കുട്ടിയെ 'സെറ്റാക്കി' കൊടുത്തു; എനിക്ക് എന്തിന്റെ കേടായിരുന്നു; ലവ് സ്റ്റോറിയെപ്പറ്റി റിയ ഷിബു പറഞ്ഞതിങ്ങനെ
കൊച്ചി: തന്റെ കോളേജ് കാലത്തെ പ്രണയകഥയെ കുറിച്ച് മനസ്സ് തുറന്ന് 'സർവ്വം മായ' എന്ന ചിത്രത്തിലൂടെ മലയാളികളുടെ പ്രിയങ്കരിയായി മാറിയ നടി റിയ ഷിബു. ഒരു പ്രമുഖ വനിതാ മാധ്യമത്തിന് നൽകിയ അഭിമുഖത്തിലാണ് റിയ തന്റെ ക്രഷ് കഥ പങ്കുവെച്ചത്. ഇഷ്ടം തുറന്നുപറയാതെ, തന്റെ ക്രഷിന് മറ്റൊരു പെൺകുട്ടിയെ സെറ്റാക്കി കൊടുത്തുമെന്നാണ് നടി പറഞ്ഞത്.
"പെൺകുട്ടികൾക്കു പൊതുവേ പ്രായം കൂടിയവരോടാകും പ്രണയം തോന്നുക എന്നാണെന്റെ തോന്നൽ. എനിക്കും കോളജിൽ സീനിയർ ചേട്ടനോട് ക്രഷ് ഉണ്ടായിരുന്നു. ഡെലൂലുവിനെപ്പോലെ ഞാനതു പറഞ്ഞില്ല. പകരം ആൾക്ക് വേറൊരു പെൺകുട്ടിയെ സെറ്റ് ആക്കിക്കൊടുത്തു," റിയ വിവരിച്ചു. തന്നോട് ഇഷ്ടമാണെന്ന് തിരികെ കേൾക്കാൻ വേണ്ടിയാണ് അങ്ങനെയൊരു നീക്കം നടത്തിയതെങ്കിലും, ഒടുവിൽ ആ സീനിയർ മറ്റേ പെൺകുട്ടിയുമായി പ്രണയത്തിലാവുകയായിരുന്നുവെന്നും റിയ കൂട്ടിച്ചേർത്തു. "ഒടുവിൽ അവരു സെറ്റ് ആയി. എനിക്കു സത്യത്തില് എന്തിന്റെ കുഴപ്പമായിരുന്നു? ദാറ്റ് ഈസ് മൈ ലവ് സ്റ്റോറി," റിയ ഷിബു പറഞ്ഞു.
'സർവ്വം മായ' എന്ന ചിത്രത്തിലെ 'ഡെലൂലു' എന്ന കഥാപാത്രത്തിലൂടെയാണ് റിയ ഷിബു പ്രേക്ഷകരുടെ ശ്രദ്ധ നേടിയത്. ചിത്രത്തിൽ നിവിൻ പോളിയുമായുള്ള റിയയുടെ കോമ്പിനേഷൻ വലിയ വിജയത്തിന് കാരണമായി. ക്രിസ്മസിന് റിലീസ് ചെയ്ത 'സർവ്വം മായ' ബോക്സ് ഓഫീസിൽ മികച്ച പ്രകടനം കാഴ്ചവെക്കുകയും ജനുവരിയിലും കുതിപ്പ് തുടരുകയുമാണ്. ആറ് വർഷത്തിന് ശേഷമുള്ള നിവിൻ പോളിയുടെ ശക്തമായ തിരിച്ചുവരവ് കൂടിയായി ഈ ചിത്രം വിലയിരുത്തപ്പെടുന്നു. ഇതിനോടകം 130 കോടി രൂപ നേടിയ ചിത്രം അധികം വൈകാതെ 150 കോടി ക്ലബ്ബിൽ എത്തുമെന്നാണ് സിനിമാ വിദഗ്ദ്ധർ പ്രവചിക്കുന്നത്.
