അപ്പാ..ഒരിക്കൽ കൂടി കാണാനാവുമോ; എങ്കിൽ വരണേ..!!; വേദനയായി അന്തരിച്ച റോബോ ശങ്കറിന്റെ മകളുടെ കുറിപ്പ്

തമിഴ് സിനിമാ ലോകത്തെ വേദനിപ്പിച്ച നടൻ റോബോ ശങ്കറിന്റെ വിയോഗത്തിൽ മകൾ ഇന്ദ്രജയുടെ വൈകാരികമായ കുറിപ്പ് സാമൂഹ്യ മാധ്യമങ്ങളിൽ വൈറലാകുന്നു. ഷൂട്ടിം​ഗ് സെറ്റിൽ കുഴഞ്ഞുവീണ റോബോ ശങ്കർ ഒരാഴ്ചത്തെ ആശുപത്രി വാസത്തിനു ശേഷമാണ് 46-ാം വയസ്സിൽ അന്തരിച്ചത്. പോസിറ്റിവിറ്റിയുടെ പ്രതീകമായിരുന്ന അദ്ദേഹം എല്ലാവർക്കും സന്തോഷം നൽകാൻ ആഗ്രഹിച്ച വ്യക്തിത്വമായിരുന്നു.

അച്ഛന്റെ വേർപാടിന് ദിവസങ്ങൾ മാത്രം പിന്നിടുമ്പോൾ, ഇന്ദ്രജ പങ്കുവെച്ച ഹൃദയസ്പർശിയായ പോസ്റ്റ് ആരാധകരുടെ കണ്ണു നിറയ്ക്കുന്നു. "ഇനിയൊരിക്കൽ കൂടി കാണാൻ പറ്റുമോ അപ്പാ. അങ്ങനെയെങ്കിൽ എന്റെ അടുത്തേക്ക് വരണേ," എന്ന തലക്കെട്ടോടെയാണ് ഇന്ദ്രജ കുറിപ്പ് പങ്കുവെച്ചത്. താൻ കുട്ടിയായിരുന്നപ്പോഴും പിന്നീടുമുള്ള കാലഘട്ടങ്ങളിലും അച്ഛനൊപ്പമുള്ള ചിത്രങ്ങളും വീഡിയോയും റീലായി മാറ്റിയാണ് ഇന്ദ്രജ പങ്കുവെച്ചത്. വീഡിയോയുടെ പശ്ചാത്തലത്തിൽ അച്ഛനും മകളും തമ്മിലുള്ള സംഭാഷണവുമുണ്ട്. താൻ എങ്ങോട്ടാണ് പോകുന്നതെന്ന് മകൾ ചോദിക്കുമ്പോൾ, നീണ്ട യാത്രക്കാണെന്ന് അച്ഛൻ മറുപടി നൽകുന്നു. "നിങ്ങളെ ഇനി കാണാനാവുമോ" എന്ന ചോദ്യത്തിന് "ഉറപ്പായും" എന്നാണ് അച്ഛന്റെ മറുപടി. ഈ പോസ്റ്റിന് നിരവധിപേർ ആശ്വാസ വാക്കുകളുമായി രംഗത്തെത്തി.

നടൻ കൂടിയായ ഇന്ദ്രജ ശങ്കർ 2019-ൽ പുറത്തിറങ്ങിയ 'ബി​ഗിൽ' എന്ന ചിത്രത്തിലൂടെയാണ് സിനിമാ ലോകത്തേക്ക് എത്തുന്നത്. ചിത്രത്തിൽ 'പാണ്ഡിയമ്മ' എന്ന ഫുട്‌ബോൾ കളിക്കാരിയുടെ വേഷം അവതരിപ്പിച്ചത് ഇന്ദ്രജയായിരുന്നു.