'വെല്ലുവിളികൾ ഏറ്റെടുക്കുന്നു, ചെറിയ വിജയങ്ങൾ ഞാൻ ആഘോഷിക്കുകയാണ്, ഒന്നും ഒളിക്കാനില്ല'; രാജുമായി സമാന്ത പ്രണയത്തിൽ?; വൈറലായി പോസ്റ്റ്
ചെന്നൈ: തെന്നിന്ത്യൻ സിനിമാ താരം സമാന്ത റൂത്ത് പ്രഭുവും സംവിധായകൻ രാജ് നിദിമോരുമായി പ്രണയത്തിലാണെന്ന അഭ്യൂഹങ്ങൾക്ക് ആക്കം കൂട്ടി നടിയുടെ ഇൻസ്റ്റാഗ്രാം പോസ്റ്റ്. രാജ് നിദിമോരുവിനെ ചേർത്തുപിടിച്ചുള്ള ചിത്രം സമാന്ത ഇൻസ്റ്റാഗ്രാമിൽ പങ്കുവെച്ചതോടെയാണ് ചർച്ചകൾ വീണ്ടും സജീവമായിരിക്കുന്നത്. കഴിഞ്ഞ ഒന്നര വർഷമായി താൻ ജീവിതത്തിൽ എടുത്ത ധീരമായ ചുവടുവെപ്പുകളെക്കുറിച്ചായിരുന്നു സമാന്തയുടെ പോസ്റ്റ്.
തൻ്റെ പുതിയ പെർഫ്യൂം ബ്രാൻഡിൻ്റെ ലോഞ്ച് ചടങ്ങിൽ നിന്നുള്ള ചിത്രങ്ങളാണ് സമാന്ത പങ്കുവെച്ചത്. ഇതിൽ അതിഥിയായി സുഹൃത്ത് തമന്നയും എത്തിയിരുന്നു. 'ചുറ്റും സുഹൃത്തുക്കളും കുടുംബാംഗങ്ങളും. കഴിഞ്ഞ ഒന്നര വർഷമായി, എൻ്റെ കരിയറിലെ ഏറ്റവും ധീരമായ ചില ചുവടുകളാണ് ഞാൻ എടുത്തത്. വെല്ലുവിളികൾ ഏറ്റെടുക്കുന്നു, ഉൾപ്രേരണയെ വിശ്വസിക്കുന്നു, മുന്നോട്ട് പോകുമ്പോൾ പഠിക്കുകയും ചെയ്യുന്നു. ഇന്ന്, ഞാൻ ചെറിയ വിജയങ്ങൾ ആഘോഷിക്കുകയാണ്,' സമാന്ത കുറിച്ചു.
താൻ കണ്ടുമുട്ടിയതിൽ വെച്ച് ഏറ്റവും മിടുക്കരും കഠിനാധ്വാനികളും ആത്മാർഥതയുള്ളവരുമായ ചില ആളുകളോടൊപ്പം പ്രവർത്തിക്കാൻ കഴിഞ്ഞതിൽ നന്ദിയുണ്ടെന്നും അവർ കൂട്ടിച്ചേർത്തു. പങ്കുവെച്ച ചിത്രങ്ങളിൽ ഏറ്റവും ശ്രദ്ധേയമായത് രാജ് നിദിമോരുവിനൊപ്പം ആലിംഗനം ചെയ്തു നിൽക്കുന്ന ചിത്രമായിരുന്നു. ഈ ചിത്രങ്ങൾക്കൊടുവിൽ 'ഒന്നും ഒളിക്കാനില്ല' എന്ന ഹാഷ്ടാഗും സമാന്ത ചേർത്തിട്ടുണ്ട്. ഇത് ഇരുവരും തങ്ങളുടെ ബന്ധം പരസ്യമാക്കുകയാണോ എന്ന ചോദ്യമാണ് ആരാധകർക്കിടയിൽ ഉയർന്നിരിക്കുന്നത്.
സമാന്തയും രാജ് നിദിമോരുവും തങ്ങൾ 'ദി ഫാമിലി മാൻ 2' എന്ന വെബ് സീരീസിൽ ഒരുമിച്ച് പ്രവർത്തിച്ചതിന് ശേഷം പ്രണയത്തിലാണെന്ന് അഭ്യൂഹങ്ങളുണ്ട്. കഴിഞ്ഞ വർഷം അമേരിക്കയിൽ ഇരുവരും അവധിയാഘോഷിക്കുന്ന ചിത്രങ്ങൾ പുറത്തുവന്നിരുന്നു. 2021-ൽ നടൻ നാഗചൈതന്യയുമായുള്ള വിവാഹബന്ധം വേർപെടുത്തിയതിന് ശേഷമാണ് ഈ അഭ്യൂഹങ്ങൾ പ്രചരിക്കുന്നത്.
