തിരുവനന്തപുരം: മലയാളത്തിലെ പ്രിയനടി മഞ്ജു വാര്യരെ പ്രശംസിച്ച് എഴുത്തുകാരി ശാരദക്കുട്ടി. പെൺകുട്ടികൾക്ക് പഠിക്കാൻ ഒരു മികച്ച പാഠപുസ്തകമാണ് മഞ്ജു വാര്യരെന്നും കുടുംബമില്ലെങ്കിലും തനിക്ക് ഒന്നും നഷ്ടപ്പെടില്ലെന്ന് തെളിയിച്ച ധീരയായ സ്ത്രീയാണ് താരമെന്നും അവർ കൂട്ടിച്ചേർത്തു. മഞ്ജു വാര്യരുടെ അതിരുകൾ ഭേദിക്കാനുള്ള കഴിവിനും ധൈര്യത്തിനും 'ബിഗ് സല്യൂട്ട്' നൽകുന്നതായും ശാരദക്കുട്ടി തന്റെ കുറിപ്പിൽ വ്യക്തമാക്കി.

"ആണിനും വീടിനും കുടുംബത്തിനും സദാചാരബോധ്യങ്ങൾക്കും കടമകൾക്കും അച്ചടക്കങ്ങൾക്കും നിന്ദകൾക്കും വഴങ്ങാതെ പറന്നു നടന്നു ജീവിക്കുവാൻ കേരളം കണി കണ്ടുണരുന്ന പെണ്മയാണ് മഞ്ജു. കുടുംബത്തിന് താനില്ലെങ്കിലും ഒന്നും നഷ്ടപ്പെടില്ല എന്ന് മാത്രമല്ല, തനിക്ക് കുടുംബമില്ലെങ്കിലും ഒന്നും നഷ്ടപ്പെടില്ല എന്നും തെളിയിച്ച സ്ത്രീയാണവർ," ശാരദക്കുട്ടി പറഞ്ഞു. മഞ്ജുവിന്റെ വളർച്ചയുടെ വഴികൾ എളുപ്പമായിരുന്നില്ലെന്നും, കഴിവുകൾ തേച്ചു മിനുക്കി നിലനിർത്തുന്ന മിടുക്കാണ് അവരുടെ പ്രത്യേകതയെന്നും എഴുത്തുകാരി ചൂണ്ടിക്കാട്ടി.

സിനിമയിൽ നിന്ന് ഒരിടവേളയെടുത്ത ശേഷം 'ഹൗ ഓൾഡ് ആർ യു' എന്ന ചിത്രത്തിലൂടെയാണ് മഞ്ജു വാര്യർ ശക്തമായ തിരിച്ചുവരവ് നടത്തിയത്. പിന്നീട് മലയാളത്തിന് പുറമെ തമിഴ് സിനിമകളിലും സജീവസാന്നിധ്യമായി. ധനുഷ്, അജിത്ത്, രജനികാന്ത്, വിജയ് സേതുപതി തുടങ്ങിയ മുൻനിര താരങ്ങൾക്കൊപ്പം അഭിനയിച്ച് തെന്നിന്ത്യയിലും താരം തന്റെ സ്ഥാനം ഉറപ്പിച്ചു. ബൈക്ക് റൈഡിംഗിനോടുള്ള മഞ്ജുവിന്റെ താൽപ്പര്യവും അടുത്തിടെ ഏറെ ശ്രദ്ധ നേടിയിരുന്നു.

പുതുവർഷത്തോട് അനുബന്ധിച്ച് ധനുഷ്കോടി വഴി ബൈക്ക് ഓടിക്കുന്ന മഞ്ജുവിന്റെ വീഡിയോ സമൂഹമാധ്യമങ്ങളിൽ തരംഗമായിരുന്നു. ഇരുന്നും നിന്നുമെല്ലാം താരം വണ്ടി ഓടിക്കുന്നത് ഈ വിഡിയോയിൽ കാണാമായിരുന്നു. ഈ വീഡിയോക്ക് പിന്നാലെ നിരവധി പേരാണ് മഞ്ജുവിനെ അഭിനന്ദിച്ച് രംഗത്തെത്തിയത്. റോൾ മോഡലാണ് മഞ്ജു വാര്യർ എന്നാണ് പലരും അന്ന് കുറിച്ചത്.

മഞ്ജു വാര്യർശാരദക്കുട്ടിഫേസ്ബുക്ക് പോസ്റ്റ്

സ്വന്തം ലേഖകൻ