നെറ്റിയിൽ വെടി കൊണ്ട ആ എക്സ്പ്രെഷൻ മറക്കാൻ പറ്റോ?; ഒട്ടുമിക്ക കമെന്റുകളിൽ വരെ നിറയുന്ന 'മീം'; 'അത് ട്രോള് ആകുമെന്ന് ഒരിക്കലും കരുതിയില്ലെന്ന് ശരത്
മിനിസ്ക്രീനിലെ 'നിത്യഹരിത താരം' എന്ന് വിശേഷിപ്പിക്കപ്പെടുന്ന നടനാണ് ശരത് ദാസ്. സിനിമകളിലൂടെയും നിരവധി സൂപ്പർഹിറ്റ് സീരിയലുകളിലൂടെയും പ്രേക്ഷകരുടെ മനസ്സിൽ ഇടം നേടിയ ശരത്, അടുത്തിടെ ഒരു യൂട്യൂബ് ചാനലിന് നൽകിയ അഭിമുഖത്തിൽ തന്നെക്കുറിച്ചുള്ള ട്രോളുകളെക്കുറിച്ച് മനസ്സ് തുറന്നു.
ഒരു സീരിയലിൽ ശരത് അവതരിപ്പിച്ച കഥാപാത്രം വെടിയേറ്റു വീഴുന്ന രംഗം സോഷ്യൽ മീഡിയയിൽ വലിയ രീതിയിൽ ട്രോളുകൾക്ക് വഴിയൊരുക്കിയിരുന്നു. ഇതിലെ ശാരീരിക ഭാഷയും അവതരണവുമാണ് ട്രോളന്മാർ ആഘോഷമാക്കിയത്. കാലങ്ങൾക്കിപ്പുറവും ആ രംഗം ഇൻസ്റ്റാഗ്രാമിലും ഫേസ്ബുക്കിലും റീലുകളായും സ്റ്റിക്കറുകളായും പ്രത്യക്ഷപ്പെടാറുണ്ട്.
"അത്തരം ട്രോളുകൾ ഇപ്പോൾ താൻ അധികം ശ്രദ്ധിക്കാറില്ല. എന്നാൽ ആ രംഗം വെച്ചുള്ള വാട്സാപ്പ് സ്റ്റിക്കറുകൾ തന്റെ ഫോണിലുണ്ട്. തമാശയായി പലർക്കും താൻ തന്നെ ആ സ്റ്റിക്കറുകൾ അയച്ചു കൊടുക്കാറുണ്ട്," എന്ന് ശരത് ചിരിച്ചുകൊണ്ട് പറഞ്ഞു. തന്റെ അഭിനയത്തെ പരിഹസിച്ചവർക്കെതിരെ പിണങ്ങുന്നതിന് പകരം, അതിനെ ഒരു തമാശയായി കണ്ട് ആസ്വദിക്കുന്ന ശരത്തിന്റെ നിലപാടിനെ ആരാധകർ അഭിനന്ദിക്കുന്നു.
