ആര്‍തിയുടെ പിറന്നാള്‍ ദിനത്തില്‍ മേജര്‍ മുകുന്ദിന്റെ വേഷത്തില്‍ എത്തി ശിവകാര്‍ത്തികേയന്റെ സര്‍പ്രൈസ്; എന്തൊരു ക്യൂട്ടെന്ന് ആരാധകര്‍; വീഡിയോ വൈറല്‍
ഭാര്യ ആര്‍തിക്ക് പിറന്നാള്‍ സര്‍പ്രൈസ് നല്‍കുന്ന ശിവകാര്‍ത്തികേയന്റെ വിഡിയോ ആണിപ്പോള്‍ സോഷ്യല്‍ മീഡിയയില്‍ വൈറലായി മാറുന്നത്. അടുത്തിടെ റിലീസ് ചെയ്ത താരത്തിന്റെ 'അമരന്‍' എന്ന ചിത്രത്തിലെ മേജര്‍ മുകുന്ദിന്റെ വേഷത്തില്‍ വീട്ടിലെത്തിയാണ് ശിവകാര്‍ത്തികേയന്‍ ഭാര്യയ്ക്കു പിറന്നാള്‍ സമ്മാനം നല്‍കിയത്.
മനോഹരമായ ഈ വിഡിയോ ശിവകാര്‍ത്തികേയന്‍ തന്റെ ഇന്‍സ്റ്റഗ്രാം പേജില്‍ പങ്കുവച്ചിട്ടുണ്ട്. ''ജന്മദിനാശംസകള്‍ ആര്‍തി ഞാന്‍ നിന്നെ ഒരുപാട് സ്‌നേഹിക്കുന്നു'' എന്ന കുറിപ്പോടെയാണ് ശിവകാര്‍ത്തികേയന്‍ വിഡിയോ പങ്കുവച്ചത്. അടുക്കളയില്‍ ജോലി ചെയ്തു കൊണ്ട് നിന്ന ആര്‍തി തിരിഞ്ഞു നോക്കുമ്പോള്‍ പിന്നില്‍ പട്ടാള വേഷത്തില്‍ ശിവകാര്‍ത്തികേയന്‍ നില്‍ക്കുകയാണ്.
പെട്ടെന്ന് ഇങ്ങനെ കണ്ട ഞെട്ടലില്‍ ആര്‍തി പകച്ചുപോയെങ്കിലും ശിവയുടെ വേഷം കണ്ട് സന്തോഷത്താല്‍ ആര്‍തി പുഞ്ചിരിക്കുന്നത് വിഡിയോയില്‍ കാണാം. മേജര്‍ മുകുന്ദ് വരദരാജന്റെ ജീവിത കഥയാണ് 'അമരന്‍' പറയുന്നത്. ഒക്ടോബര്‍ 31ന് റിലീസ് ചെയ്ത ഈ ചിത്രം ശിവകാര്‍ത്തികേയന്റെ കരിയറിലെ ഏറ്റവും മികച്ച കളക്ഷന്‍ നേടിയ ചിത്രമായി മാറിയിരുന്നു. മുകുന്ദിന്റെ ഭാര്യ ഇന്ദു റെബേക്ക വര്‍ഗീസ് ആയി സായ് പല്ലവിയാണ് വേഷമിട്ടത്.
