'ആരെക്കൊണ്ടും എന്നെ തകർക്കാൻ സാധിക്കില്ല, തോൽക്കില്ല എന്നത് വാശിയാണ്'; കേസിൽ ശ്രീയ്ക്ക് ഒരിക്കലും ടെൻഷൻ കൊടുത്തിട്ടില്ല; ഒരിക്കലും കോംപ്രമൈസ് ചെയ്യിലെന്നും സ്നേഹ ശ്രീകുമാർ

കൊച്ചി: നടന്‍ എസ്പി ശ്രീകുമാറിനെതിരെ സഹനടി ഉന്നയിച്ച ലൈംഗികാതിക്രമ പരാതിയിൽ പ്രതികരിച്ച് ഭാര്യയും നടിയുമായ സ്നേഹ ശ്രീകുമാർ. ‘ഉപ്പും മുളകും’ സീരിയലിൽ അഭിനയിച്ചിരുന്ന ഒരു നടി, അതേ പരമ്പരയിലെ അഭിനേതാക്കളായ ശ്രീകുമാറിനും ബിജു സോപ്പാനത്തിനും എതിരെയാണ് പരാതി നൽകിയിരിക്കുന്നത്. ഈ സംഭവത്തെക്കുറിച്ചാണ് സ്നേഹ ഇപ്പോൾ തുറന്നു സംസാരിച്ചത്.

ആദ്യമൊക്കെ താൻ ഈ വിഷയത്തിന്റെ ഗൗരവം മനസ്സിലാക്കാതെ തമാശയായി കണ്ടിരുന്നെന്ന് സ്നേഹ പറയുന്നു. വാർത്തകളിൽ പേര് വന്നാൽ പ്രശസ്തി ലഭിക്കുമെന്നുപോലും കരുതി. പിന്നീട് തന്റെ സുഹൃത്തും അഭിഭാഷകയുമായ മനീഷ രാധാകൃഷ്ണനാണ് വിഷയത്തിന്റെ ഗൗരവം തനിക്ക് മനസ്സിലാക്കിത്തന്നത്. "ഞങ്ങൾ നിരപരാധികളാണെന്ന് ഉറച്ച വിശ്വാസമുള്ളതുകൊണ്ട് പേടിയില്ല. പക്ഷേ നിയമപരമായ കാര്യങ്ങളിൽ അറിവില്ലായിരുന്നു," അവർ പറഞ്ഞു. കേസ് നടന്ന സമയത്ത് താൻ ഒരിക്കലും ശ്രീകുമാറിന് സമ്മർദ്ദം നൽകിയിട്ടില്ലെന്നും സ്നേഹ കൂട്ടിച്ചേർത്തു.

"ആരെക്കൊണ്ടും എന്നെ തകർക്കാൻ സാധിക്കില്ല. ഞാൻ വിഷമിച്ചേക്കാം, പക്ഷേ പിന്നീട് ശക്തിയായി തിരിച്ചുവരും. തോൽക്കില്ല എന്നത് എന്റെ വാശിയാണ്," അവർ പറഞ്ഞു. ഇന്ത്യയിലെ നിയമവ്യവസ്ഥയിലൂടെയാണ് തങ്ങൾ നീതി നേടുകയെന്ന് സ്നേഹ ഊന്നിപ്പറഞ്ഞു. "ആരും നമ്മെ രക്ഷിക്കില്ല, കോടതി മാത്രമാണ് വഴിയുള്ളത്. അല്ലെങ്കിൽ കോംപ്രമൈസ് ചെയ്യണമെന്നാകും. പക്ഷേ അതിന് ഞാൻ തയ്യാറല്ല. 90 വയസ്സായാലും ഈ കേസിൽ നിന്ന് പിന്മാറില്ല," സ്നേഹയുടെ വാക്കുകൾ വ്യക്തമാക്കുന്നു.