ഗോവ: ചലച്ചിത്രലോകത്ത് അഞ്ച് പതിറ്റാണ്ട് പൂർത്തിയാക്കിയ സൂപ്പർതാരം രജനീകാന്തിന് 56-ാമത് അന്താരാഷ്ട്ര ചലച്ചിത്രോത്സവത്തിൽ (IFFI) ആജീവനാന്ത പുരസ്കാരം നൽകി ആദരിച്ചിരുന്നു. ഗോവയിൽ നടന്ന സമാപന ചടങ്ങിൽ പുരസ്കാരം ഏറ്റുവാങ്ങിയ താരം, ഇത് സിനിമാ വ്യവസായത്തിൽ പ്രവർത്തിക്കുന്നവർക്കും തന്നെ പിന്തുണച്ച തമിഴ് ജനതയ്ക്കും സമർപ്പിക്കുന്നതായി പ്രഖ്യാപിച്ചു.

സിനിമാ ജീവിതത്തിലെ 50 വർഷങ്ങളെ "പത്തോ പതിനഞ്ചോ വർഷം പോലെയാണ് തോന്നിയത്" എന്ന് രജനീകാന്ത് പ്രസംഗത്തിൽ പറഞ്ഞു. "അടുത്ത 100 ജന്മത്തിലും ഒരു നടനായി, രജനികാന്ത് ആയി തന്നെ ജനിക്കാനാണ് എനിക്ക് ആഗ്രഹം" എന്ന് കൂട്ടിച്ചേർത്തു. ഈ പുരസ്കാരം സംവിധായകർക്കും നിർമാതാക്കൾക്കും എഴുത്തുകാർക്കും, ഒപ്പം തന്നെ 'രജനികാന്ത്' ആക്കി മാറ്റിയ തമിഴ് മക്കൾക്കും സമർപ്പിക്കുന്നതായി അദ്ദേഹം ആവർത്തിച്ചു. ചടങ്ങിൽ എഴുന്നേറ്റുനിന്നുള്ള കരഘോഷത്തോടെയാണ് സദസ്സ് രജനീകാന്തിനെ വരവേറ്റത്.

കൈകൾ കൂപ്പി സദസ്സിനെ അഭിവാദ്യം ചെയ്ത അദ്ദേഹം ആരാധകരുടെ സ്നേഹം ഏറ്റുവാങ്ങി. ചലച്ചിത്രമേളയുടെ അവസാന ദിവസം ഗോവയിലെത്തിയ രജനീകാന്തിന് ഹോട്ടൽ ജീവനക്കാരും ആരാധകരും ചേർന്ന് ഉജ്ജ്വല സ്വീകരണമാണ് ഒരുക്കിയത്. വാദ്യഘോഷങ്ങളുടെ അകമ്പടിയോടെ അദ്ദേഹം വേദിയിലേക്ക് പ്രവേശിക്കുന്നതിന്റെയും ആരാധകരെ അഭിവാദ്യം ചെയ്യുന്നതിന്റെയും വീഡിയോകൾ സമൂഹമാധ്യമങ്ങളിൽ വൈറലായിരുന്നു.

നെൽസൺ ദിലീപ്കുമാർ സംവിധാനം ചെയ്യുന്ന 'ജയിലർ 2', രാജ്കമൽ ഫിലിംസ് ഇന്റർനാഷണൽ നിർമിക്കുന്ന 'തലൈവർ 173' എന്നിവയാണ് രജനീകാന്തിന്റേതായി അണിയറയിൽ ഒരുങ്ങുന്ന ചിത്രങ്ങൾ.

ഗോവചലച്ചിത്ര മേളരജനികാന്ത്

സ്വന്തം ലേഖകൻ