ചെങ്ങന്നൂർ: 'ചെങ്ങന്നൂർ പെരുമ 2026' വേദിയെ ആവേശത്തിലാഴ്ത്താൻ എത്തിയ നടൻ ടിനി ടോമിന്റെ 'എമ്പുരാൻ' പ്രകടനത്തിന് സോഷ്യൽ മീഡിയയിൽ ട്രോൾ മഴ. പൃഥ്വിരാജ് സുകുമാരൻ സംവിധാനം ചെയ്യുന്ന 'എമ്പുരാൻ' സിനിമയിലെ മോഹൻലാലിന്റെ അബ്രാം ഖുറേഷി എന്ന കഥാപാത്രത്തിന്റെ ലുക്കിൽ ടിനി ടോം വേദിയിലെത്തിയപ്പോൾ, പ്രകടനത്തിന് സമ്മിശ്ര പ്രതികരണങ്ങളാണ് ലഭിച്ചത്.

'എമ്പുരാനേ' എന്ന തരംഗമായ ഗാനത്തിന്റെ പശ്ചാത്തലത്തിൽ, മോഹൻലാലിന്റെ സ്റ്റൈലിഷ് നടത്തവും മാനറിസങ്ങളും അനുകരിച്ചുകൊണ്ടായിരുന്നു ടിനി ടോമിന്റെ വേദിയിലേക്കുള്ള പ്രവേശനം. ഈ രംഗം നിമിഷനേരം കൊണ്ട് ശ്രദ്ധിക്കപ്പെട്ടുവെങ്കിലും, സോഷ്യൽ മീഡിയ പ്ലാറ്റ്‌ഫോമുകളായ ഇൻസ്റ്റാഗ്രാം ഉൾപ്പെടെയുള്ളവയിൽ പ്രകടനത്തിനെതിരെ വിമർശനങ്ങളും ട്രോളുകളും നിറഞ്ഞു.

"വോയ്‌സ് ചെയ്താലും ഫിഗർ ചെയ്താലും അവസാനം ടിനി ടോം തന്നെ ആകുന്ന പ്രതിഭാസം" എന്ന് ഒരാൾ കുറിച്ചപ്പോൾ, മോഹൻലാലിന്റെ ഗാംഭീര്യം അവതരിപ്പിക്കാൻ ടിനി ശ്രമിച്ചെങ്കിലും അത് വിജയിച്ചില്ലെന്നും വിമർശകർ അഭിപ്രായപ്പെട്ടു. "ലാലേട്ടന്റെ മാസ്സ് ലുക്ക് കാണിക്കാൻ പോയിട്ട് അവസാനം ടിനി ടോം തന്നെയായി ഒതുങ്ങിപ്പോയി" തുടങ്ങിയ പരിഹാസങ്ങളും വീഡിയോയ്ക്ക് താഴെ വ്യാപകമായി പ്രചരിച്ചു.

ടിനി ടോമിന്റെ അനുകരണശ്രമം ഫലപ്രദമായില്ലെന്നാണ് ഭൂരിഭാഗം അഭിപ്രായങ്ങളും ചൂണ്ടിക്കാണിക്കുന്നത്. മോഹൻലാലിന്റെ ലുക്ക് മനസ്സിലുണ്ടെങ്കിലും അത് പുറത്തേക്ക് വരുന്നില്ലെന്നും ചിലർ വിമർശിച്ചു. മുൻപും മോഹൻലാലിനെ അനുകരിച്ച് കയ്യടി നേടിയിട്ടുള്ള നടനാണ് ടിനി ടോം. എന്നാൽ, 'എമ്പുരാൻ' ലുക്കിലുള്ള അദ്ദേഹത്തിന്റെ ഈ പരീക്ഷണം അത്ര ഗുണം ചെയ്തില്ലെന്നാണ് സോഷ്യൽ മീഡിയ വിലയിരുത്തൽ.

ചെങ്ങന്നൂർ പെരുമടിനി ടോംസോഷ്യൽ മീഡിയ

സ്വന്തം ലേഖകൻ