'ചികിത്സ തുടരുന്നു, സുഖമായി വരുന്നു'; എത്രയും വേഗത്തിൽ സ്റ്റേജിലേക്ക് തിരികെ വരാനുള്ള പോരാട്ടത്തിലാണ്; ഫെയ്സ്ബുക്ക് ലൈവിൽ ഉല്ലാസ് പന്തളം

കൊച്ചി: ചികിത്സയിലാണെന്നും സുഖം പ്രാപിച്ചുവരികയാണെന്നും എത്രയും പെട്ടെന്ന് സ്റ്റേജിലേക്ക് തിരിച്ചെത്താൻ പോരാടുകയാണെന്നും മിനിസ്ക്രീൻ പ്രേക്ഷകരുടെ പ്രിയതാരവും ഹാസ്യകലാകാരനുമായ ഉല്ലാസ് പന്തളം. ഫെയ്സ്ബുക്ക് ലൈവിലൂടെ രോഗവിവരങ്ങൾ പങ്കുവെച്ച് രംഗത്തെത്തിയിരിക്കുന്നത്.

ഏറെ നാളുകൾക്ക് ശേഷമാണ് താരം സാമൂഹിക മാധ്യമങ്ങളിൽ ലൈവിൽ എത്തുന്നത്. ചികിത്സയിലൂടെ തനിക്ക് നല്ല പുരോഗതിയുണ്ടെന്നും മുഖത്ത് ഉണ്ടായിരുന്ന നീര് കുറഞ്ഞുവരികയാണെന്നും ഉല്ലാസ് പന്തളം പറഞ്ഞു. മരുന്നുകളും തെറാപ്പികളും മുടങ്ങാതെ തുടരുന്നുണ്ട്. അതേസമയം, ഇടതുകൈയിലെ വേദന പൂർണ്ണമായി മാറിയിട്ടില്ലെന്നും വിരലുകൾക്ക് ഇപ്പോഴും ബാൻഡേജ് കെട്ടിയിരിക്കുകയാണെന്നും അദ്ദേഹം വെളിപ്പെടുത്തി. വ്യായാമങ്ങൾ തുടങ്ങിയപ്പോൾ വേദന വീണ്ടും കൂടിയതായും താരം കൂട്ടിച്ചേർത്തു.

ഉല്ലാസ് പന്തളത്തിന്റെ രോഗവിവരം സാമൂഹിക മാധ്യമങ്ങളിലൂടെ അടുത്തിടെയാണ് പുറത്തുവന്നത്. നിരവധി പേരാണ് അന്ന് മുതൽ അദ്ദേഹത്തിന് പിന്തുണയുമായി രംഗത്തെത്തിയത്. കുട്ടിക്കാലം മുതൽ കലാരംഗത്ത് സജീവമായിരുന്ന ഉല്ലാസ് നാടകങ്ങളിലൂടെയാണ് ശ്രദ്ധ നേടിയത്. പന്തളം ബാലന്റെ തിരുവനന്തപുരത്തെ 'ഹാസ്യ' എന്ന ട്രൂപ്പിൽ നിന്ന് പ്രൊഫഷണൽ മിമിക്രിയിലേക്ക് കടന്ന അദ്ദേഹം പിന്നീട് കോമഡി ഷോകളിലൂടെയും 'കുട്ടനാടൻ മാർപ്പാപ്പ', 'നാം', 'ചിന്ന ദാദ' തുടങ്ങിയ സിനിമകളിലൂടെയും പ്രേക്ഷകർക്ക് സുപരിചിതനായി.