കൊച്ചി: മലയാള മിനിസ്ക്രീൻ താരവും ഗായകനുമായ വിജയ് മാധവ്, നടി ദേവിക നമ്പ്യാരുമായുള്ള തൻ്റെ ബന്ധത്തെക്കുറിച്ചുള്ള ഓർമ്മ പങ്കുവെച്ച് പോസ്റ്റ്. വിവാഹ നിശ്ചയത്തിൻ്റെ ഒന്നാം വാർഷികത്തോട് അനുബന്ധിച്ച് ഇൻസ്റ്റഗ്രാമിൽ പങ്കുവെച്ച കുറിപ്പിലാണ് ഇരുവരും വീണ്ടും ഒരുമിക്കാൻ ഇടയായ സാഹചര്യത്തെക്കുറിച്ച് വിജയ് വ്യക്തമാക്കിയത്.

2016 മെയ് 5-ന് തൻ്റെ അനുജത്തി നന്ദുവിൻ്റെ വിവാഹത്തിൻ്റെ ചിത്രത്തോടൊപ്പമാണ് വിജയ് ഈ ഓർമ്മ പങ്കുവെച്ചത്. ആ സമയത്ത് താനും ദേവികയും തമ്മിൽ പിണങ്ങുകയും ബന്ധം വീണ്ടും ശരിയാകില്ലെന്ന് ഉറപ്പിച്ച് ദേവികയെ ഫോണിൽ ബ്ലോക്ക് ചെയ്യുകയുമുണ്ടായതായി വിജയ് വെളിപ്പെടുത്തി. അന്ന് സമാധാനത്തോടെ വീട്ടിൽ ടിവി കണ്ടിരിക്കുകയായിരുന്ന തനിക്ക് നന്ദു അയച്ചുകൊടുത്ത ചിത്രവും സന്ദേശവുമാണ് വീണ്ടും ഒരുമിക്കാനുള്ള പ്രേരണയായതെന്ന് വിജയ് കുറിച്ചു.

"ഈ പടം എടുത്ത ഒറ്റ കാരണം കൊണ്ടാണോ ഞാനും ദേവികയും ഒരുമിച്ചത് എന്ന് എനിക്ക് തോന്നിയിട്ടുണ്ട്. കാരണം ഞങ്ങൾ അടിച്ച് പിരിഞ്ഞ് ഇനി ഈ ബന്ധം ശരിയാവില്ല എന്ന് ഉറപ്പിച്ച് ദേവികയെ ഞാൻ ഫോണിൽ ബ്ലോക്ക് ചെയ്ത്, സമാധാനമായിട്ട് വീട്ടിൽ ടിവി കണ്ടു കിടന്നപ്പോൾ ആണ് എന്റെ അനിയത്തി നന്ദു, ഈ പടം അയച്ച് തന്നിട്ട് വെറുതെ അഹങ്കാരം കാണിക്കാതെ ഈ കൊച്ചിനെ കെട്ടാൻ നോക്ക്. കണ്ടില്ലേ നിങ്ങൾ ബെസ്റ്റ് ജോഡി ആണ്. ഇതിലും നല്ലതൊന്നും ഇനി നിനക്ക് കിട്ടാൻ പോണില്ല… എന്നൊക്കെ അവളുടെ ഭാഷയിൽ പറഞ്ഞത്. അത് എന്നെ ചിന്തിപ്പിച്ചു. അങ്ങനെയാണ് ഞങ്ങൾ വീണ്ടും ഒരുമിക്കാൻ കാരണമായത്," വിജയ് കുറിച്ചു.

ജീവിതത്തിലെ ഓരോ ഘട്ടങ്ങളും തിരിഞ്ഞുനോക്കുമ്പോൾ, ഒരുപക്ഷേ എല്ലാം ആരോ നിശ്ചയിച്ചതാണോ എന്ന് തോന്നാറുണ്ടെന്നും അദ്ദേഹം കൂട്ടിച്ചേർത്തു. ഇരുവരുടെയും അടുത്തിടെയുള്ള സോഷ്യൽ മീഡിയ പോസ്റ്റുകൾ ആരാധകർക്കിടയിൽ വലിയ ശ്രദ്ധ നേടിയിരുന്നു. ഈ ഓർമ്മ പങ്കുവെച്ചതിലൂടെ തൻ്റെ വ്യക്തിജീവിതത്തിലെ ഒരു നിർണ്ണായക നിമിഷത്തെക്കുറിച്ചാണ് വിജയ് മാധവ് ആരാധകരുമായി സംവദിച്ചത്.

പോസ്റ്റിന്റെ പൂർണരൂപം...

'മെയ് 5, 2016 ഉച്ചക്ക് 1.42 ന് എന്റെ അനിയത്തിയുടെ കല്യാണത്തിന് ഈ പടം എടുത്ത ഒറ്റ കാരണം കൊണ്ടാണോ ഞാനും ദേവികയും ഒരുമിച്ചത് എന്ന് എനിക്ക് തോന്നിയിട്ടുണ്ട്. കാരണം ഞങ്ങൾ അടിച്ച് പിരിഞ്ഞ് ഇനി ഈ ബന്ധം ശരിയാവില്ല എന്ന് ഉറപ്പിച്ച് ദേവികയെ ഞാൻ ഫോണിൽ ബ്ലോക്ക് ചെയ്ത്, സമാധാനമായിട്ട് വീട്ടിൽ ടിവി കണ്ടു കിടന്നപ്പോൾ ആണ് എന്റെ അനിയത്തി നന്ദു, ഈ പടം അയച്ച് തന്നിട്ട് വെറുതെ അഹങ്കാരം കാണിക്കാതെ ഈ കൊച്ചിനെ കെട്ടാൻ നോക്ക്. കണ്ടില്ലേ നിങ്ങൾ ബെസ്റ്റ് ജോഡി ആണ്. ഇതിലും നല്ലതൊന്നും ഇനി നിനക്ക് കിട്ടാൻ പോണില്ല… എന്നൊക്കെ അവളുടെ ഭാഷയിൽ പറഞ്ഞത്.

അത് എന്നെ ചിന്തിപ്പിച്ചു. അങ്ങനെയാണ് ഞങ്ങൾ വീണ്ടും ഒരുമിക്കാൻ കാരണമായത്. ഓരോരോ ജീവിതങ്ങൾ. വന്നവഴികൾ ഇടക്ക് തിരിഞ്ഞു നോക്കുമ്പോൾ എല്ലാം ആരോ നിശ്ചയിച്ചത് നമ്മൾ വെറുതെ ജീവിക്കുകയല്ലേ എന്ന് തോന്നിപോകും'', വിജയ് മാധവ് കുറിച്ചു.

വിജയ് മാധവ്ദേവിക നമ്പ്യാർ

സ്വന്തം ലേഖകൻ